Nog adres

Ахуыргæнæджы боны цытæн

den1.jpg Ахуыргæнæджы бон у ахуырады къабазы кусджыты профессионалон бæрæгбон. Советон Цæдисы Уæлдæр Советы 1965 азы 29-æм сентябры Барамындмæ гæсгæ, Ахуыргæнæджы бон нысан кодтой октябры мæйы фыццаг хуыцаубоны. Ныртæккæ, Уæрæсейы Федерацийы Президенты Барамындмæ гæсгæ Уæрæсейы Ахуыргæнæджы бон нысан кæнынц 5-æм октябры. Ацы бон æй нысан кæнæм мах дæр.
Хуссар Ирыстоны ахуырады системæ алыхатт дæр кадджын уыд æнгом æмæ йæ дæсныйад иттæг хорз чи зоны, ахæм ахуыргæнджытæй. Æрвылаз дæр хуссарирыстойнаг ахуыргæнджытæн сæ профессионалон бæрæгбоны цытæн раарфæ кæнынц республикæйы къухдариуæггæнджытæ. Афтæ та уыд ныр дæр, ахуыргæнæджы боны цытæн РХИ-йы Ахуырады министрад нæ горæты Сывæллæтты сфæлдыстады галуаны коллективимæ иумæ бацæттæ кодтой бæрæгбонон мадзал. 7-æм октябры хореографион залмæ æрбамбырд сты нæ республикæйы ахуырадон уагдæтты ахуыргæнджытæ, уыцы нымæцы дæрддаг Ленингоры районæй дæр. Иууылдæр сын уыд бæрæгбонон зæрдæйы равг, кæрæдзийæн дзырдтой арфæйы ныхæстæ.

Хореографион залы фоейы æвæрд æрцыдысты нæ республикæйы скъолаты ахуыргæнджыты къухæй конд куыстытæ, уыдоны ‘хсæн уыдысты 12-æм астуæккаг скъолайы æрмдæсныйы кружок амонæг Коцты Дженнийы куыстытæ дæр, уый йæ алыварс æрбамбырд кодта бирæнымæц ахуыргæнинæгты æмæ сын æнæвгъау амоны хъæддæсныйы сусæгдзинæдтæ. Цалынмæ бæрæгбонон мадзал нæ райдыдта, уæдмæ Сывæллæтты сфæлдыстады галуаны директор Джиоты Арянæ алыгъуызон хорзæхтæй схорзæхджын кодта фоейы æвæрд цы куыстытæ æрцыдысты, уыдоны авторты.
Уæдмæ ахуыргæнджытæн раарфæ кæнынмæ æрбацыдысты РХИ-йы Президент Тыбылты Леонид, Хицауады Сæрдар Хъуылымбегты Доменти, Ахуырад æмæ зонады министр Цыбырты Маринæ æмæ æндæр бæрнон адæймæгтæ, уыдоныл æбамбырдуæвджытæ сæмбæлдысты цины æнкъарæнтимæ. Мадзал амонæг, фæсивæдон организаци «Восход»-ы сæрдар Коцты Михаил арфæйы ныхæстæ загъта ахуыргæнджытæн æмæ уый фæстæ ныхасы бар радта РХИ-йы Ахуырад æмæ зонады министр Цыбырты Маринæйæн: " Зынаргъ ахуыргæджытæ, ацы райдзаст боны мын бар радтут æмæ уын зæрдæбын арфæтæ зæгъон уæ профессионалон бæрæгбон — Ахуыргæнæджы боны цытæн. Ахуыргæнæджы професси у иууыл арфæйагдæр æмæ вазыгджындæр професситæй сæ иу. Вазыгджындæр уымæн æмæ ахуыргæнæджы æрвылбон дæр хъæуы йæхиуыл кусын, йæ зонындзинæдтæ æххæст кæнын. Абон ахуыргæнæг æрмæст хорз профессионал ма хъуамæ уа, фæлæ хъуамæ æмбара æхсæнады цы ивындзинæдтæ цæуы, уыдоны мидис. Абон, уæлдай ахсджиагдæр у, цæмæй ахуыргæнæг сывæллæтты ахуыр кæна хъуыды кæнын, уынаффæтæ исын æмæ йæ равзæрсты тыххæй бæрндзинад хæссын. Ахуыргæнæг алыхатт дæр ис хъусдарды астæу. Абон махæн бирæ хатты фенцондæр кусын, нал нæ хъæуы зымæгмæ сугтæ цæттæ кæнын æмæ пецты арт кæнын. бафæнддзæн мæ, цæмæй æргом кæнат æрмæст ахуыргæнинæгты курдиат нæ, фæлæ уæхи курдиат дæр. Хъæуы цымыдисон уроктæ уадзын. Хуссарирыстойнаг ахуыргæнджыты потенциал тынг бæрзонд у. Æгæрыстæмæй, сымах уæ арфæйаг куыст нæ ныууагътат дæргъвæтин гуырдзиаг агрессийы рæстæджы дæр, равдыстат фидардзинад. Стыр бузныг уæ æвæллайгæ куысты тыххæй. Мæ зæрдæ уын зæгъы сфæлдыстадон æнтыстытæ æмæ æнæниздзинад", — загъта Цыбырты Маринæ.
9 (1).jpg
Уый фæстæ та республикæйы ахуыргæнджытæн раарфæ кодта РХИ-йы Президент Тыбылты Леонид: «Уæ бонтæ хорз, зынаргъ ахуыргæнджытæ! Ирыстонæн сымах бирæ хъæбултæ схъомыл кодтат, кæцыты къухы ис Ирыстоны хъысмæт, сымах аразут Ирыстоны сомбон. Уыдон ахуыр кæнынц Уæрæсейы алы æмæ алы уæлдæр ахуыргæнæндæтты æмæ се ‘гъдау æмæ сæ ахуырæй кад кæнынц сæ радтæг адæмæн, сæ Райгуырæн бæстæйæн. Ирыстоны сомбон уæ къухты ис, сымахыл баст у. Сымах стут ахæм адæймæгтæ, кæцытæ хъомыл кæнынц фидæны гоймаджы характер. Мах аразæм бæрæг къахдзæфтæ нæ республикæйы рæзты хъуыддаджы, цæмæй ахуыргæнинæгтæ æмæ ахуыргæнджытæ дæр сæхи æнкъарой хорз. Ацы ахуыры азы нæ ахуыргæнинæгтæ ахуыр кæнын райдыдтой ног арæзт скъолаты, куыд зæгъæм, Къостайыхъæуы арæзт æрцыд нырыккон домæнтæн дзуапп чи дæтты, ахæм скъола, капиталон цалцæг æрцыд 7-æм астуæккаг скъолайы бæстыхай, уым ацы аз ахуыр райдыдтой скъола «Альбион»-ы ахуыргæнинæгтæ, кæцытæ къуындæг уавæрты ахуыртæ уагътой Сывæллæтты сфæдыстады бæстыхайы, ног скъолайы бæстыхай арæзт æрцыд Цхинвалы районы Бихъары астæуккаг скъолайы ахуыргæнинæгтæн дæр. Æрæджы эксплуатацимæ лæвæрд æрцыд? нæ горæты Хъайтарты уынджы кæрон цы сывæллæтты цæхæрадон ис, уый. Уырдæм бацыдысты 100 сабийæ фылдæр. Банысан кæнын мæ фæнды уый дæр, æмæ Хъайтарты уынджы кæй ис дыууæ сывæллæтты цæхæрадон æмæ 12-æм астæуккаг скъола, фæлæ ацы уынг хæрзарæзт кæй никуы уыд, ныртæккæ ацы уынджы æвæрынц асфальты дыккаг цъар æмæ бирæбæрцæй фæхуыздæр сты ацы районы цæрджыты цардуагон уавæртæ. Æввахс рæстæджы эксплуатацимæ лæвæрд æрцæудзæн æмæ 70 сывæллонæн йæ дуæрттæ байгом кæндзæн Цхинвалы районы Дменисы хъæуы сывæллæтты цæхæрадон. 2016 азы Хуссар Ирыстоны социалон-экономикон рæзтæн ахъазгæнæг Инвестицион программæмæ хаст æрцыд горæт Къуайсайы ног скъолайы арæзтад, Ленингоры æмæ Знауыры районты цалдæр ахуырадон уагдоны. Æппæт уыдæттæ арæpт цæуынц Стыр Уæрæсейы æххуысы ‘руаджы æмæ сын дзурын стыр бузныг.
Зынаргъ ахуыргæнджытæ, цыфæнды фарста аскъуыддзаг кæныны дæр æз æмæ Хъуылымбегты Доменти уæ фарсмæ æрбалæудзыстæм? куыд уæ хорз хæлæрттæ, афтæ. Мах иумæ хъуамæ кусæм рæзгæ фæлтæры хъомылады, Ирыстоны фидæны тыххæй. Республикæйы Хицауад æппæт уавæртæ дæр араздзæн æнтыстджын куысты тыххæй. Ныр та уæ хатыр курын, бæрæгбонон мадзалы кæронмæ мæ бон кæй нæ суыдзæн хайад райсын, уый тыххæй. Мах æнхъæлмæ кæсæм Уæрæсейæ бæрзонд уазджытæм. Ноджы дæр уын арфæ кæнын уæ бæрæгбоны тыххæй. Амондджын ут!«, — загъта РХИ-йы Президент Тыбылты Леонид.
Мадзалы рæстæджы уæлдай хуыздæр ахуыргæнджытæ æмæ куысты ветерантæ хорзæхджын æрцыдысты зæрдылдарæн лæвæрттæй. Мадзал дарддæр кодта бæрæгбонон концертæй, цыран сæ арæхстдзинад равдыстой Хуссар Ирыстоны хореографион коллективтæ æмæ скъоладзаутæ. Ахуыргæнджытæн æмдзæвгæты хуызы раарфæ кодта 5-æм æмæ 6-æм астуæккаг скъолаты пионерты æмбырдгонд командæ. Æрæмбырдуæвджытæн сæ арæхстдзинад равдыстой нæ горæты Колыты Аксойы номыл аивæдты лицейы кафджыты къорд, ансамбль «Амонд», Дзигойты Маринæ, Зассеты Амагæ, Кристина Гогинова æмæ æндæртæ. Сæ коллегæтæн сюрпризы хуызы зарæг «Ивушки» балæвар кодтой нæ горæты скъолаты æхсæз ахуыргæнæджы Дзигойты Маринæйы сæргълæудæй.
ДЖИОТЫ Екатеринæ