Nog adres

УЫДЗÆН ХÆРЗАИВ, РÆСУГЪД

DSCF4330.JPG
Гениалон поэт Хетæгкаты Къостайы райгуырды бон æрвылаз дæр цытджын æгъдауæй банысан кæнынц Ирыстоны дзыллæтæ. Поэты цытæн уагъд æрцæуынц литературон изæртæ, чиныгкæсджыты конференцитæ, скъоладзаутæ бацæттæ кæнынц æмæ равдисынц инсценировкæтæ, нæ поэттæ фембæлынц чиныгкæсджытимæ æмæ æрымысынц Хетæджы фырты стыр ном, бакæсынц се 'мдзæвгæтæ. Цхинвалы районы Къостайыхъæуы дæр традици ссис Хетæгкаты Къостайы райгуырды бон нысан кæнын, афтæ та уыдзæн ацы аз дæр. Уымæ сæхи разæнгардæй цæттæ кæнынц хъæуы фæллойгæнджытæ, хæдархайгæ аивадон къорд равдисдзæн концерт.
Фæлæ иууыл дзыллондæр вæййы, нæ республикæйы æппæт районтæй йæ Хæдзар-музейы цурмæ чи æрцæуы, уыцы аивадон коллективты ралæуд. Цæмæй уыдон ныр дæр зæрдæйы фæндиаг равдисой сæ арæхстдзинад, уый тыххæй дзы ныртæккæ цæуынц цалцæггæнæн-арæзтадон куыстытæ. Нæ республикæйы разамынды фæндонмæ гæсгæ уымæн рахицæн æрцыд 1 милуан æмæ 800 мин сомы æхцайы фæрæзтæ æмæ йæ аразын та хæсгонд æрцыд Цхинвалы районы цæрæнуатон-коммуналон хæдзарады управленийæн. Йæ хистæр Хъотайты Барис куыд радзырдта, афтæмæй культурон мадзæлттæ цы бынаты фæуадзынц, уый алфæмблай хъуамæ æрæмбонд кæной æмæ йæ дæрддзæг та у 500 метры бæрц. Абоны онг уал дзы сарæзтой йе ‘мбисæй фылдæр.

Поэты цыртдзæвæны цур цы къæйдуртæ æвæрд уыд, уыдон базæронд сты, иуæй-иу рæтты та зæххы афсæрстой æмæ уыцы бынат дæр плиткæтæй саив кодтой. Цыртдзæвæнмæ бацæуæн скверæн йæ дæргъ у 240 метры æмæ йæ уæрх та - цыппар метры. Нæ уыд уый дæр хорз уавæры æмæ йын уымæ гæсгæ йæ фæрсты æвæрд æрцыдысты бордюртæ, йæ ацæуæн фæзуаты та уыдзæн лыстæг хуыр калд. Ацы куыстытæ æххæст кæныныл хъаруджынæй архайынц бынæттон лæппутæ: Лохты Олег, Батрадз, Джиоты Ацæмæз, Батрадз, Руслан, Гоцъиты Елдар, Хуыбиаты Ибрагим æмæ æндæртæ.
Бынтон раууатмæ æрцыд, аивадон æмæ культурон мадзæлттæ кæм фæуагъдæуы, уыцы æхгæд сценæ. Уый 2008 азы августы хæсты аххосæй тынг бахъыгдард, йæ агъуыст нæмыгдзæфтæй нал зынд, æрзæбултæ сты хъуымацы гæппæлтæ. Уый сцалцæг кæныныл та кусы æндæр бригадæ æмæ уыдон архайдæй дæр рухс кæны адæймаджы зæрдæ. Йæ цар ын ивынц пластикон цъарæй, ногæй йын схæрзарæзт кæндзысты йæ астæрд дæр. Уыдзæн дзы, артисттæ концерты агъоммæ сæ дарæс кæм раивой, ахæм хатæнтæ, стæй сценæмæкæсджытæн та - бандæттæ. Цалдæр азы размæ ам ныссагъдæуыд хихджын бæлæстæ æмæ сын сæ хус æмæ уæлдай къалиутæ бахсæстæуыд.
Аразджыты æрмдзæф разындзæн Къостайы Хæдзар-музейыл дæр. Бацæуджытæ зонгæ кæндзысты поэты цард æмæ сфæлдыстадимæ дзурæг æрмæджытимæ, уыдзæн дзы, ирон цардуаг æвдыст кæм цæудзæн, ахæм къуым дæр. Иудзырдæй, Хетæджы фырты райгуырды юбилейон бон нысан æрцæудзæн хорз зæрдæйы равгимæ.
ХУЫБИАТЫ Н.