Nog adres

НÆ СÆРМÆ БÆРЗОНДÆЙ ФÆЙЛАУДЗÆН ТЫРЫСА

img_7900_0.jpg
Нæ Республикæйы сæрмæ сæрыстырæй фæйлауы Аланты æртæхуызон тырыса: урс - монон сыгъдæгдзинад, рухс фидæн, сырх - хъайтарты нæмттæ цæмæй ма рох кæнæм, бур - фарн æмæ бæркады нысан. 24 азы дæргъы Паддзахадон тырыса зындзинæдты, хæстон уæззау фæндæгтыл немæ æмдзу кодта сæрибардзинадмæ, хæдбардзинадмæ, ссис уæлахизы сæйраг символ.
Уæздан тырысаимæ нæ егъау рæсугъд æмæ ирд бæрæгбон банысан кодтам нæ ног историйы нысаниуæгджын цау - хæдбардзинад банымайыны бон. Афтæ немæ æмдзу кæны æмæ сæрбæрзондæй фæйлауы нæ тырыса нæ горæтты æмæ нæ хъæуты.
Ныр дыккаг аз 19 сентябрь нысан цæуы Паддзахадон тырысайы бонæй. Ацы райдзаст бæрæгбоны цытæн цытджын мадзалмæ нæ горæты Театралон фæзуатмæ æрæмбырд сты æхсæнады минæвæрттæ, Гарзджын тыхты дæлхæйттæ, Республикæйы къухдариуæгад Президент Тыбылты Леониды сæргълæудæй.
Мадзаламонджытæ æрдзырдтой Паддзахадон тырысайы историйыл, йæ нысаниуæгыл. Ныртæккæ, зæгъгæ, уый у сæрибар æмæ хæдбар бæстæйы символ. Уый мах разæнгард кæны ног цард аразынмæ.
Гарзджын тыхты æфсæддон службæгæнджытæ цыт æмæ кади-мæ æрбахастой нæ Фыдыбæстæйы символ - Паддзахадон тырысайы. Æфсæддон оркестр цагъта Паддзахадон гимны зæлтæ æмæ цытджын уавæрты бæрзонд ист æрцыд Паддзахады символ - нæ сæрбæрзонд тырыса. Цытджын мадзалы цытæн айхъуыст хæдæхсты къæр-къæр.
Республикæ Хуссар Ирыстоны Президент Тыбылты Леонид ацы бон банымадта стыр бæрæгбоныл. Загъта, зæгъгæ, Паддзахадон тырысайыл, бæрзонд схæцыдыстæм уыцы бон, кæцы бон расидт æрцыд Падзахадон тырысайы бонæй.
«Алы адæймаг дæр, мæнмæ гæсгæ, банкъардта, йæ удварны цы стыр цау æрцыдис, уый. Нæ тырысайыл бæрзонд кæй схæцыдыстæм, уый нысан кæны афтæ, æмæ йæ быны иумæ размæ кæй цæуæм æмæ йын кæй аргъ кæнæм.

Мах хорз хъуыды кæнæм 1980-æм азты кæрон. Уæд нæ Республи-кæйы тырыса уыд нæ хъахъхъæнджыты къухы. Уый фæстæ 1990 азы декабры мæйы Хуссар Ирыстоны хицауады райсгæ закъонмæ гæсгæ, фидар æмæ ист æрцыд Паддзахадон тырыса. Тырысайы æртæ уæздан хуызы нысан кæнынц нæ хъуыдыты сыгъдæгдзинад, ныфсхастдзинад, фæрныгад, æмæ дидинæфтыд.
Нæ тырыса йæ райсынæй фæстæмæ ссис бæстæйы суверенитеты символ. Ацы бæрæгбон нысан кæнгæйæ хъуамæ хъуыды кæнæм, ацы бæрæгбон мах иугæнæг кæй у æмæ нæ хъæбатыр лæппутæ ацы тырысаимæ кæй фæтых сты знагыл æмæ кæй бахъахъхъæдтой нæ Фыдыбæстæ.
Абон стæм хæдбар Республикæ. Æмæ нын ацы бæрæгбон ноджыдæр нæ зæрдыл хъуамæ лæууын кæна, иумæ стыр тых кæй стæм. Уымæн æмæ нæ тырыса у сæрмагонд æмæ кады аккаг», - дзырдта йæ ныхасы бæстæйы сæргълæууæг.
Æрсидт Ирыстоны цæрджытæм, цæмæй ма рох кæной нæ хъайтарты, кæцытæ абон нæ фарсмæ нал сты.
Нæ горæты Сæйраг фæзуатæй стыр бузныджы ныхæстимæ æрсидт нæ Фыдыбæстæйы хъахъхъæнджытæм. Уыдон æппæт хæстон азты дæргъы æмбырд кодтой æмзондæй ацы тырысайы бын æмæ хæст уыдысты иу зонд æмæ иу хъуыдыйыл. Уадз, æмæ нын дарддæр дæр нæ тырыса уæд нæ бæстæйы райрæзты фидардзинады æмæ размæцыды символ.
Ацы ирд бæрæгбон бæстæйы сæргълæууæг ракодта æнæниздзинад, хъæрмуддзинад, размæдзыды арфæтæ Ирыстоны адæмæн.
Нæ горæты Аивæдты лицейы 2-æм къласы ахуыргæнинаг Джиоты Сæрмæт æфсæддон салам радта Паддзахадон тырысайы бын Хицауады бæрнон кусджыты рæнхъæйлæууæг скондæн.
Мадзалы кæрон Хъахъхъæнынады министрады æфсæддон дæлхæйттæ цытджын маршæй рацыдысты Паддзахадон тырысайы раз.
КÆБУЛТЫ Маринæ