Nog adres

ДЗЫРДТОЙ АХУЫРАДЫ ФАРСТАТЫЛ

IMG_8890.JPG
29-æм августы нæ горæты Профцæдисты хæдзары æмбырдгæнæн залы уагъд æрцыдис ахуыргæнджыты æрвылазон республикон конференци ахæм темæйыл «РХИ-йы ахуырады системæйы æнтыстытæ æмæ хæстæ». Ардæм æрбацыдысты куыд Цхинвалы, афтæ нæ республикæйы районты ахуырады æппæт къабæзты кусджытæ дæр.
Конференцийы куысты хайад райстой Республикæ Хуссар Ирыстоны Президент Тыбылты Леонид, Хицауады Сæрдар Хъуылымбегты Доменти, йæ хæдивæг Пухаты Эрик, Парламенты Сæрдар Бибылты Анатоли, РХИ-йы Президенты паддзахадон уынаффæгæнæг Сиукъаты Радион æмæ республикæйы разамынады æндæр бæрнон адæймæгтæ.
Мадзалы райдайæны экраныл æвдыст æрцыдис чысыл видеоролик нæ республикæйы Ахуырад æмæ зонады министрады бакæнгæ куысты фæдыл.
Уый фæстæ æрæмбырдуæвджыты раз доклад бакастис РХИ-йы Ахуырад æмæ зонады министр Цыбырты Маринæ ахæм темæйыл «Достижения и задачи системы образования РЮО.
Уый фыццаджыдæр арфæ ракодта Зонындзинæдты боны цытæн нæ республикæйы æппæт ахуыргæнджытæн æмæ ахуырдзау фæсивæдæн.
Йæ доклады та сæрмагондæй æрдзырдта йæ дæлбаруæвæг министрады бакæнгæ куыстыты фæдыл, сæ дарддæры плæнттыл æмæ сæ проблемæтыл:

- Махæн нæ сæйраг хæс у ахуыры процесс нырыккон дуджы домæнтæм гæсгæ æмбæлон уавæрмæ æркæнын. Уымæй та мæ ныфс ис, нæ ахуыргæнджыты иузæрдион куысты руаджы æппæтдæр нæ къухы кæй бафтдзæнис. Афтæ ма нæ фæнды ахуыргæнинæгтæн ахуыр кæнынæн æппæт уавæртæ дæр саразын, уымæн æмæ уыдон фидæны хъуамæ хæссой æхсæнады раз бæрндзинад, æмæ сæ архайдтытæ та хъуамæ уой æнтыстджын».
Цыбырты чызг доклады лæмбынæг æрдзырдта абон нæ республикæйы скъолайы агъоммæ ахуыргæнæн уагдæтты куысты фæдыл. Уыдоны та æдæппæт сæ ахуыр кæнынц, зæгъгæ, 2080 сывæллоны.
Банысан ма кодта, зæгъгæ, ацы уагдæтты кусджытæн сæ куысты уавæртæ дæр кæй хуыздæр кæнынц, сæ мыздтæ дæр кæй фæфылдæр сты.
Архайдзыстæм ууыл дæр, цæмæй арæзт æмæ цалцæг цæуой фылдæр сывæллæтты цæхæрадæттæ. Уымæн æмæ дзы бирæтæ сыгъд æмæ пырх кæй æрцыдысты, уымæ гæсгæ нæ фаг кæнынц сывæллæттæн бынæттæ, æмæ къордты сты 40-гай сывæллæттæй. Уый та сын сæ куыстæн æвзæрын кæны зындзинæдтæ, - загъта Цыбырты Маринæ. Уый ма куыд загъта, уымæ гæсгæ, 2015-2017 азты социалон-экономикон рæзтæн ахъазгæнæг Инфвестицион программæйы фæлгæтты нæ ныфс ис, кæй нæм фæзындзæнис се ‘нæниздзинад нывыл кæмæн нæу, ахæм сывæллæтты цæхæрадон дæр. Ацы программæмæ ма хаст æрцыдысты ХИПУ-йы корпусы арæзтады, Хъорнисы хъæуы æмæ Къуайсайы скъолаты арæзтадтæ æмæ æндæртæ.
Æрдзырдта ма нæ республикæйы иумиаг ахуыргæнæн скъолаты куысты фæдыл дæр, афтæ ма ноджы бирæ æндæр ахсджиаг фарстатыл, кæцытæ хауынц ахуырады къабазмæ.
Ахуырад æмæ зонады министры хæдивæг Зассеты Мая та æрдзырдта республикæйы ахуырады системæйы кадрон фарстатæ куыд скъуыддзаг цæуынц, ууыл.
Конференцийы ма докладтæ бакастысты ахæм темæтыл: нæ горæты 6-æм астæуккаг скъолайы ахуыргæнæг Джиоты Мадинæ - «Введение новых образовательных стандартов - необходимость сегоднышнего дня», 6-æм астæуккаг скъолайы директор Людмила Александрова - «Об опыте работы СОШ №: 6 по введению профессионального обучения», Ленингоры районы администрацийы ахуыры хайадгæс Гуссойты Ласко - «О проблемах и задачах системы образования Ленингорского района», 5-æм астæуккаг скъолайы райдиан кълæсты ахуыры хайады гæс Мулдарты Аллæ - «О полилингвальной программе».
Ирон æвзаджы проблемæйы фæдыл та йæ хъуыдытæ загъта Дзауы скъола-интернаты ирон æвзаг æмæ литературæйы ахуыргæнæг Гасситы Ильна.
Конференцийы хайадисджытæн ма арфæйы æмæ бузныджы ныхæстæ загътой нæ республикæйы Парламенты Сæрдар Бибылты Анатоли.
Уый фæстæ сын Президент Тыбылты Леонид дæр ракодта арфæ æмæ бæстонæй æрдзырдта, мадзалы цы проблемæтыл дзырд цыди, уыдоны фæдыл.
Ахуыргæнджытимæ йын бацайдагъ æргом ныхас æмæ банысангонд æрцыдысты бирæ алыгъуызон проблемæтæ, афтæ ма сын ныфс бавæрдта ахуырады къабаз райтынг кæныныл кæй архайдзæнис ноджыдæр зæрдиагдæрæй.
Мадзалы кæронбæттæны йæ хайадисджытæ адихтæ сты секцитыл æмæ адарддæр кодтой сæ куыст.
ТУАТЫ Ларисæ