Nog adres

Стыр техникон æнтыстытæ/ Йæ кæронмæ бахæццæ магистралон газы хæтæл «Дзуарыхъæу-Цхинвал»

Æгас Дунейы иууыл бæрзонддæр газы хæтæлыл нымад цæуы проект «Дзуарыхъæу-Цхинвал». Уымæн йæ райдайæн ис Цæгат Ирыстоны, Дзуарыхъæуы. Уырдыгæй рацыд Кавказы ра-гъыл æмæ æрхызт горæт Къуайсамæ. Къуайсайæ та æрхызт горæт Цхинвалмæ. Йæ иумæйаг дæргъ у 175 километры, йе 'лхъывдад 252,5 млн кубометры афæдзы мидæг.
Хæтæлты диаметр у 426 мм. Йæ кусæгон æлхъывдад - 50 атмосферæйы. Газы хæтæл цы трассæйыл рацыд, уым арæзт æрцыд 15 тоннелы, сæ дæргъ иумæйагæй сисгæйæ, 1848 мет-ры кæмæн у, ахæмтæ. Уымæй дарддæр ма газы хæтæл рахызт 29 цæугæдоны сæрты.
Нæ республикæйы территорийыл цы газы хæтæл цæуы, уы-мæн йæ дæргъ у 75 километры бæрц. Æппæт ацы уникалон куыстыты аргъ, сметæмæ гæсгæ уыд 15 миллиард сомы. Ацы арæзтадон куыстытæ бакодта не 'мзæххон, Уæрæсейы зынгæ арæзтадон фирмæ «Стройпро-гресс»-ы директор Джуссойты Альберт.
Уæлдæр куыд загътам, афтæмæй Дзуарыхъæуæй суанг Цхинвалмæ цы газы хæтæл уагъд æрцыд, уый нымад цæуы иууыл бæрзонддæр газы хæтæлыл Къуыдайраг хохы рагъæй, йæ бæрзæнд денджызы æмвæзадæй у 3148 метры. Куыд зæгъынц, афтæмæй «Газпром» æмбырд кæны æппæтхъæуæг гæххæттытæ, цæмæй ацы арæзтад æрцæуа Гинессы рекордты чиныгмæ.
Арæзтад цы маршрутыл рацыд, уый техникон æгъдауæй уыд тынг вазыгджын. Ацы арæз-тады инженер Вячеслав Соркин йæ рæстæджы куыд дзырдта, уымæ гæсгæ «Ам газы хæтæл аразыны рæстæджы, цы сæр-магонд техникæйæ пайда цæуы, уый бынтондæр нæ фæразы, уадид ацъæл вæййынц техникæйы фæрæзтæ. Уымæн æмæ мах, æппынæдзух зын бынæтты чи кусы, уыдоны дæр дисы æфтауы ахæм стыр сакъадахты фидардзинад».
Арæзтадон фирмæ «Строй-прогресс» стыр зындзинæдтæ канд хæхтыл аразгæйæ не 'взæрста. Газы хæтæлы маршрут рахызт Цæгат Ирыстоны паддзахадон «Æвæрд хъæды» территорийыл дæр. Ам, хъыгагæн, хæлд æрцыд æрдз хъахъхъæныны закъон. Цы бæлæстæ дзы æрцыд куынæг, уы-донæн сæ аргъ уыд 20 милуан сомы.
Кæй зæгъын æй хъæуы, уыйбæрц бæлæстæ сцæгъдын «Æвæрд хъæды» территорийыл æрдзы ныхмæ фыдракæнд уыд, фæлæ уый хыгъд газы фæзындимæ ам, Хуссар Ирыстоны, ныр фондз азы дæргъы ирвæзт æрцыд ноджы фылдæр бæлæстæ. Ныр нæ республикæйы цæрджытæ фервæзтысты сæ къорд азты фыдæбæттæй. 2008 азмæ Гуырдзыстонæй Цхинвалмæ цы газ цыд, уый Гуырдзыстоны политиктæ иу æмæ дыууæ хатты нæ ахицæн кодтой ирон адæмæн. Бынтон катайаг та, цы аргъмæ нын æй уæй кодтой, уый уыд 645 лари (450 доллары) - 1000 кубометрæн. Уый та æртæ хатты занаргъдæр у, ныртæккæ Уæрæсейæ цы газ исæм, уымæй.

Йæ рæстæджы, уæды Президент, Кокойты Эдуард дзырдта: «Ныр боныфæстагмæ, фервæздзыстæм, Гуырдзыстоны политиктæ нæ иууыл тынгдæр цæмæй тæрсын кодтой, уымæй...»
Гъе, афтæ, бирæ фыдæбæттæ æмæ зындзинæдтæ бавзаргæйæ, 26 августы 2009 азы фыццаг хатт проект «Дзуарыхъæу-Цхинвал»-мæ гæсгæ, Тъбеты хъæуы фыццаг хатт ссыгъд «Газпром»-ы эмблемæимæ факел.
Уæд 2009 азы 26 августы, нæ республикæйы канд Хæдбардзинад нæ нысан кодтам, фæлæ ма газы æрхæццæ Хуссар Ирыстонмæйы бæрæгбон дæр. Мæскуыйæ æрцыд стыр делегаци. «Газпром»-ы сæргълæууæджы хæдивæг Алек-сандр Ананенков дæр семæ, афтæмæй. Уый цытджын церемонийы рæстæджы зæрдиаг арфæтæ ракодта ирон адæмæн сæ Хæдбардзинады бæрæгбоны тыххæй æмæ уый фæстæ фехъусын кодта, нырæй фæстæмæ проект «Дзуарыхъæу-Цхинвал» Хуссар Ирыстоны кæй архайдзæн.
- Ныр Уæрæсейы æрдзон газæй пайда цæудзæнис сæудæджерад, хъæууон хæдзарад æмæ республикæйы иуæй-иу районты дæр. «Газпром»-ы хъуыдымæ гæсгæ, уый стыр лæвар у Хуссар Ирыстоны адæмæн.
- Ныр уæ цардуагон уавæртæ бæрæг фæхуыздæр уыдзысты, стыр ахъаз уыдзæнис газифтонгдзинад уæ экологийæн дæр. Мах ныфс ис тагъд республикæйы иннæ районтæ дæр газификацигонд кæй æрцæудзысты. Уымæн æмæ уæ республикæйы хицауад Уæрæсейы «Газпром»-имæ иумæ, дыууын азы æмгъуыдмæ къухтæ æрфыстой, æмгуысткæнынадыл. Ныр абонæй фæстæмæ Уæрæсейæ æнæкъуылымпыйæ сымах исдзыстут газ. Ацы вазыгджын арæзтад арæзт æрцыд уе 'мбæстаг, зынгæ амалиуæггæнæг Джуссойты Альберты сæргълæудæй. Кæд йæ гуырахстмæ гæсгæ зын кусинаг уыд, уæддæр фирмæ «Стройпрогресс»-æн йæ бон ссис иу афæдзы æмгъуыдмæ ацы куыстытæ бакæнын. Газы хæтæлты гуырахст та уавæр дæтты, цæмæй Хуссар Ирыстонæй æндæр республикæтæ дæр транзитæй, исой газ», - дзырдта Александр Ананенков.
УАЗÆГТЫ Марфа