Nog adres

Уыдон бахъахъхъæдтой цхинвал

Хуссар Ирыстоны зæххыл фæмардуæвæг уæрæсейаг
салдатты мысгæйæ

vetchinov.jpg
УФ-йы Хъахъхъæнынады министры хæдивæджы бæрæггæнæнтæм гæсгæ, 2008 азы августы Гуырдзыстоны фидыдадмæ æркæныны фæдыл операцийы рæстæджы фæмард 64 уæрæсейаг æфсæддон службæгæнæджы. Йæ ныхæстæм гæсгæ, цæфтæ та фесты 283 æфсæддон службæгæнæджы.
Абон уал уыдонæй мысæм цалдæры.
Денис Ветчинов
Хуссар Ирыстоны ныхмæ Гуырдзыстон гадзрахатæй æнæмсæр хæст куы расидт, уыцы бон майор Денис Ветчинов уыд штурмгæнæн колоннæйы сконды, кæцы фыццæгтæй сæ иу цыд Цхинвалмæ æмæ бахаудта гуырдзиаг хæстонты тыхджын æхстыты бын. Майор знагимæ бацыд карз тохы. Номхуындæй дæр, йæ удуæлдайдзинад æмæ æфсæддон хъаруйы руаджы бахъахъхъæд æрцыд бирæ салдаттæ æмæ журналистты цард, кæцытæ Цхинвалмæ цыдысты ацы колоннæйы. Уыдонимæ уыдысты уæрæсейаг телекомпанийы æфсæддон журналист Алек-сандр Сладков, «Московский комсомолец»-ы сæрмагонд уацхæссæг Виктор Сокирко æмæ æндæртæ.

Гуырдзиаг дæлхæйттæ ацы колоннæ æхстой дæс позицийæ. Уæззау цæф чи фæцис, уыцы майор Денис Ветчинов ныхкъуырд дæтта атакæтæн. Æмæ, номхуындæй дæр, уый бахъахъхъæдта 58-æм армийы командæгæнæг Анатоли Хрулевы цард æмæ æнæхотых журналистты æмæ салдатты цард дæр, кæцытæ иунæгæй баззадысты тохы эпицентры. Ацы тохы майор Ветчинов æнæхъæнæй дæр уыд цæфтæ, фæлæ иууыл уæззаудæр цæф фæцис йæ сæр. Уый амард госпиталмæ ласгæйæ фæндагыл.
Хъайтардзинад равдисыны тыххæй уый бахъуыд, царды йын иууыл зынаргъдæр цы уыд, уый - йæ цард радтын, æрмæстдæр ыл цыдис 32 азы, афтæмæй. Денис Ветчинов Уæрæсейы хъайтар ссис йæ амæлæты фæстæ.
Майор каст фæцис Фрунзейы номыл Омскы æфсæддон ахуыргæнæндон æмæ уыдис бирæ æндыгъд бынæтты, уыцы нымæцы Цæцæны дæр. Йе 'мслужбæгæнджытæ æмæ йæ амæлæтæн æвдисæн чи уыд, уыдон æй хонынц хъайтар. Йæ райгуырæн бæстæйы Денис Ветчиновæн баззад бинонтæ - ныййарджытæ, цардæмбал æмæ иу чызг.
2009 азы 15 майы РЦИ-Аланийы æфсæддон городок «Спутник»-ы 19-æм мотоæхсæг дивизийы цытджын æгъдауæй гом æрцыд 135-æм мотоæхсæг полчы Денис Ветчиновы бюст. Майоры цытæн митинджы Цæгат-Кавказы æфсæддон зылды командæгæнæг, инæлар-булкъон Сергей Макаров загъта: «Йæ хъайтардзинад ирд æвдисæн у уымæн, æмæ Уæрæсейы æфсады кæй службæ кæнынц æцæг афицертæ, кæцытæ æнувыд сты сæ хæс кæронмæ сæххæст кæныныл. Афицер-тæ æмæ салдаттæ, кæцытæ хайад райстой Хуссар Ирыстоны ссæрибар кæныны операцийы, равдыстой æнæрцæугæ хъайтардзинад. Цæгат-Кавказы æфсæддон зылды коман-дæкæнынад УФ-йы Хъахъхъæнынады министрады раз æрæвæрдзæн фарста, цæ-мæй Денис Ветчиновы ном цæрæнбонтæм хаст æрцæуа 19-æм мотоæхсæг бригадæйы Мысынады номхыгъдмæ, цыран уый службæ кодта йæ амæлæты боны онг».
УФ-йы æмæ Хуссар Ирыстоны хъайтар майор Денис Ветчиновæн Цхинвалы дæр арæзт æрцыд цыртдзæвæн.
kukarin.jpg
Игорь Кукарин
Фæмардуæвæг уæрæсейаг фидауынгæнджыты нымæцы ис Кукарин Игорь дæр. Уæрæ-сейаг афицер, кæцы æнувыд уыд йæ ардбахæрд æмæ хæслæвæрдтæн, фæстæмæ нæ алæууыд æмæ аккаг ныхкъуырд радта мæнгард ныхмæлæууæгæн. Лæгдзинад æмæ хъайтардзинад равдисгæйæ, Кукарин йе 'мслужбæгæнджытимæ сæхимæ райстой æнæмсæр тох. Уыдон урæдтой агрессоры Уæрæсейы æфсады æрбацæуыны онг æмæ уымæй бахъахъхъæдтой сабыр цæрджыты физикон æгъдауæй скуынæг кæнынæй.
Кукарины амæлæтæй Уæрæсе фесæфта йæ хуыздæр фырттæй иуы. Йæ бинонтæ та фесæфтой, стыр ныфс кæмæй æвæрдтой, уыцы адæймаджы. Уый рацыд цыбыр цардвæндаг, фæлæ йыл рацыд афтæ, æмæ йæ номæй сæрыстыр сты, чи йæ зыдта, уыдон иууылдæр.
cinko.jpg
Артем Цинько
Дардхурскæсæйнаг æфсæддон ахуыргæнæндоны рауагъдон фæмард хæстон архайдтыты рæстæджы Цхинвалы. Лейтенант Цинько райгуырд Благовещенскы æмæ ныгæд дæр æрцыд уым.
Ахуыргæнæндон каст фæуыны фæстæ уый æрвыст æрцыд Кæсæг-Балхъармæ горæт Прохладныймæ, уым службæ кодта фæмардуæвæг Денис Ветчинов дæр. Цинькойæн баззад бинонтæ - цардæмбал æмæ астмæйдзыд сывæллон.
parfenov.jpg
Евгений Парфенов
22-аздзыд салдат-контрактон фæмард гуырдзиаг-ирон хæсты фыццаг бон. Женя гуырдзиаг артиллерийы тыхджын æхстыты бын куы бахаудта, уæд æххуыс кодта Цхинвалы цæрджытæн ныккæндты бамбæхсынæн. Цалынмæ æфсадмæ нæ ацыд, уæдмæ цард Казаны йæ ныййарджытæ æмæ хистæр æфсымæримæ. Йæ амæлæты размæ Женя фæдзырдта йæ ныййарджытæм, фæлæ йæ Цхинвалмæ æрвитынц, уый тыххæй сын ницы загъта. Æрмæстдæр сын йæ амæлæты тыххæй куы фехъусын кодтой, уæд базыдтой ныййарджытæ, сæ фырт Хуссар Ирыстоны кæй уыд, уый.
«Женя йæ чысылæй фæстæмæ буцхаст нæ уыд. 5-6 кълæсты уый активон хайад иста спортивон ерысты. 10-æм къласы куы ахуыр кодта, уæд мах фидарæй зыдтам, уый кæй фæнд кæны службæ кæнын. Уый уыд салдат æмæ рæстæг куы æрцыд, уæд бафыста контракт. Уый уыд спартакон», - радзырдта Евгенийы мад Наталья Павлова.
Евгений Парфенов дыууæ азы куы баслужбæ кодта, уæд бафыста контракт. Контрактмæ гæсгæ йын службæ кæнын бантыст æрмæстдæр иу аз æмæ авд мæйы. Бæллыд инæлар суæвынмæ, фæлæ…
ivanov.jpg
Алексей Иванов
Рæнхъон Алексей Иванов, 58-æм армийы 193-æм бригадæйы бастдзинады кусæг (связист), уыд уæрæсейаг салдатты 'хсæн, кæцытæ æрцыдысты йæ туджымæцгæ Цхинвалмæ баххуыс кæнынмæ. Гуджабары хъæумæ уæрæсейаг танктæ фистæг æфсадимæ бацыдысты 10 августы райсомæй. Хъæумæ цæугæйæ, 58-æм армийы дæлхæйттæ бахаудысты гуырдзиаг æф-сæдты тыхджын æхстыты бын.
Никозы хъæуæй цыдысты танктæ фистæг æфсадимæ. Алексей иуцъус фæстейæ аззад, йе 'мбæлтты æмбæрзгæйæ, бынтыст ын гуырдзиаг салдаты амарын æмæ иу та фæцæф кæнын. Фæлæ йæ уæдмæ гуырдзиæгтæ сбæрæг кодтой, æмæ дыууæ минометон снаряды æрхаудтой йæ цуры. Алексей фæмард хъæбатырæй. Цыдис ыл æрмæст-дæр 19 азы…
Цхинвалы Алексей Иванов кæм амард, уыцы бынаты æвæрд æрцыд мемориалон плитæ. Ацы плитæ æрмæст Алексей Ивановы ном мысы-нæн нæу, фæлæ æппæт уæрæсейаг æфсæддонты ном мысынæн, кæцытæ сæ цар-дæй бахъахъхъæдтой Хуссар Ирыстоны хæдбардзинад.
kononov.jpg
Сергей Кононов
7 августы рæнхъон Сергей Кононов лæууыд хъарагъулы 3-æм посты. Райсомырдæм, Кононов бафиппайдта, гуырдзиаг танктæ æмæ гуырдзиаг фистæг æфсæдты. Сергей райста автомат æмæ цæмæй нæмгуытæ дзæгъæлы ма бахардз кодтаид, уый тыххæй банхъæлмæ каст гуырдзиæгты æввахсдæр æрбацыдмæ. Бахъавыд егъæуттæ гуырдзиагмæ, кæцы рауай-бауай кодта танкты 'хсæн. Уый зæххыл сæмбæлд… Кононов æхста, цалынмæ йæ нæмгуытæ нæ фесты, уæдмæ. Балыгъд ка-зармæмæ нæмгуытæм æмæ фæстæмæ йæ посты слæу-уыд. Уæдмæ райдыдта гуырдзиæгты ног атакæ. Кононов удуæлдай тох кодта дыууæ сахаты. Уыцы рæстæгмæ ба-тальоны цæфты ныххастой артгæнæны ныккæндмæ. Сергей йæ посты лæууыд, цалынмæ йын гуырдзиаг снаряд йæ цард нæ аскъуыдта, уæдмæ.
Удмурты Варзи-Ятчийы хъæуы Сережæйы зыдтой иууылдæр. Фæтæнуæхск, бæрзонд æмæ тыхджын лæппу хицæн кодта йе 'мгæртты 'хсæнæй. Сергей схъомыл хуымæтæг бинонты 'хсæн, йæ ныййарджытæн уыд фондз сывæллоны. Лæппу цалынмæ æфсадмæ нæ ацыд, уæдмæ басыгъд сæ хæдзар æмæ баззадысты уынджы. Æрцардысты зæронд хатæны, уым амард йæ мад дæр. Æфсадмæ куы цыд, уæд йæ фыдæн загъта: «Ма мæт кæн, æз контракт бафысдзынæн, бакусдзынæн æхцатæ æмæ сараздзыстæм ноджы хуыздæр хæдзар, æрмæст мæм банхъæлмæ кæс». Йæ амæлæтæй æртæ боны размæ телефонæй ныхас кодта йе 'фсымæримæ, дзырдта йын йæ плæнтты тыххæй, загъта йын, зæгъгæ, æрæмбырд кодта 250 мин сомы æмæ, зæгъ, куы æрцæуа, уæд хæдзар сараздзыстæм. Фæлæ Сергей Кононовæн йæ рæсугъд фæндтæ йæ хъуыры фæбадтысты. Йæ мæлæт ссардта Хуссар Ирыстоны зæххыл. Йæ фыд Виталийы фæлурс рустыл та абоны онг дæр æрызгъæлынц судзгæ цæссыгтæ…

Æрмæг мыхуырмæ бацæттæ кодта
ДЖИОТЫ Екатеринæ