Nog adres

Тыбылты Леониды арфæ компани БТК-4-йы къухдариуæгад æмæ кусджытæн

Ныр иу аз Республикæ Хуссар Ирыстоны территорийыл йæ архайд æххæст кæны компани БТК-4. 20 азы хæстон фæндæгтыл цы бæстæ рацыд, уым Цхинвалы хуыйæн фабрикæйы кондад сæндидзын кæнын ссис нысаниуæгджын цау. Гуырдзиаг агресси Хуссар Ирыстоны куынæг кодта æрмæст хæдзæрттæ, бæстыхæйттæ нæ, фæлæ ма хæсты æмæ блокадæйы фæстиугæн ныппырх кондадон инфраструктурæ, кæцы расайдта нæ бæстæйы кондадон культурæйы æрхауд. Хуссар Ирыстоны БТК-4 йæ архайд кæй райдыдта æмæ Цхинвалы хуыйæн фабрикæйы 200 кусæгон бынаты кæй фæзынд, уый у республикæйы экономикæйы рæзты символ.

Инвесторты æрбакæнын у вазыгджын процесс. Фæлæ, не 'мзæххон Боллоты Таймуразæн бирæ дзурын нæ бахъуыд, цæмæй сразы уыдаид Хуссар Ирыстоны кондад бакæныныл. Таймураз Хъазбеджы фырт æрмæст курдиатджын организатор нæу, фæлæ ма у Ирыстоны æцæг патриот дæр. Æз дзы бузныг дæн нæ республикæйы проблемæтæм йæ хъусдарды æмæ йе 'мбæстагон позици равдисыны тыххæй. Боллоты Таймураз йæхи цæвиттонæй фенын кодта, Хуссар Ирыстоны гæнæн кæй ис æмæ куса инвестор, уый.
20 азæй фылдæр цы фабрикæ нæ куыста, уый абон у тынг хорз нырыккон куыстуат. Иу аз у чысыл æмгъуыд, даргъ фæндаджы райдайæн. Уырны мæ, БТК-4 æнтыстджынæй кæй рæзын кæндзæн кондад æрмæст Цхинвалы нæ, фæлæ ма нæ республикæйы иннæ районты дæр. Компанийы къухдариуæгад æмæ коллективæн мæ зæрдæ зæгъы ног æнтыстытæ сæ фæллойадон архайды.