Nog adres

Ног ахуыры аз - ног скъолайы

DSCF4143.JPG
2014-2015-æм ахуыры аз Цхинвалы районы Къостайыхъæуы ахуыргæнджытæ æмæ ахуыргæнинæгтæ сæ ахуыр райдайдзысты ног скъолайы агъуысты. Уый уыдзæн, нырыккон домæнтæн дзуапп чи дæтдзæн, Цæгат æмæ Хуссар Ирыстоны дæр фыццаг иунæг ахæм скъола. Скъолайы арæзтад кæронмæ бахæццæ, аразджытæ бакодтой хъаруджын куыст æмæ йæ рæхджы хъуамæ паддзахадон къамис райса. Арæзтад йæхимæ райста фирмæ «Цъунарарæзтад» æмæ дзы бындуронæй куыстой бынæттон цæрджытæ.
Зындгонд куыд у, афтæмæй 2008 азы августы хæст тынг разиан кодта скъолайы раздæры бæстыхайæн æмæ специалистты хъуыдымæ гæсгæ нал бæззыд дарддæр пайда кæнынæн. Ахуыры процесс кæд никуы бакъуылымпы ахуыргæнджыты хъæппæрисон куысты руаджы, уæддæр æвзæрстой зындзинæдтæ.

Уавæр зыдтой нæ республикæйы разамонджытæ æмæ къуырцдзæвæнæй рахизынæн агуырдтой амæлттæ. Æппынфæстаг, скъолайæн ног бæстыхайы арæзтадон куыстытæ сытынг сты 2011-æм азы. Сæйраг инженер Бæззаты Илья мæ базонгæ кодта, ахуырадон уагдон цахæм лæггад кæндзæн нæ рæзгæ хуртæн, уыдæттимæ.
Райдайæн кълæсты ахуыргæнинæгтæ кæм ахуыр кæндзысты, уыцы фарс хуыйны блок «А» æмæ дзы уыдзысты 1-3-аг кълæсты къабинеттæ. Ацы ран ма уыдзæн, хæринаг аразыныл сæ кæм ахуыр кæной, ахæм хатæн. Æвзонг фæлтæры æнæниздзинадмæ йæ хъус дардзæн педиатр. Уымæн дæр уыдзæн хицæн кабинет.
Ахуыргæнинаг чызджытæ фæллойы урокыл цайдагъ кæндзысты хуыйæджы сусæгдзинæдтыл, уыдзæн дзы хуыйæн машинæтæ æмæ йæ хъуыддаг хорз чи зона, ахæм специалист. Иннæ къаридоры цы кабинеттæ ис, уыдон та хауынц блок «Б»-мæ æмæ дзы æрбынат кæндзысты ирон æмæ уырыссаг æвзæгты кабинеттæ, ифтонг уыдзысты компьютертæй дæр. Æппæтæй дæр æххæст æмæ зæрдæмæдзæугæ у спортивон зал. Урок райдайыны агъоммæ ахуырдзаутæ раивдзысты сæ уæлæдарæс, уый тыххæй куыд чызджытæн, афтæ лæппутæн дæр ис хицæн ивæн хатæнтæ. Урочы фæстæ ахуырдзаутæ сæхи ныхсдзысты сæрмагонд бынаты. Цæттæ сын кæндзысты сихор хицæн бынаты. Хæрæндоны сæвæрдзысты уазалгæнæн, продукттæ æмæ халсар æфснайынæн дæр арæзт ис сæрмагонд бынæттæ. Директор, ахуыры хайы сæргълæууæг æмæ хъомылады фæдыл сæргълæууæгæн уыдзæн хицæн кабинеттæ. Дыккаг уæладзыджы хицæн кабинет уыдзæн ахуыргæнджытæн сæхицæн дæр, æрмæст уыцы хатæн дыууæ дихы хъуамæ уа. Иуы дзы ахуыргæнджытæн æфснайд уыдзысты урок уадзынæн алыгъуызон цæстуынгæ æрмæджытæ æмæ методикон литературæ, иннæ бынаты та ахуыргæнджытæ хъуамæ уой сæ сæрибар рæстæджы. Хими, физикæйы ахуыргæнджытæ сæ предметты цæстуарзонæй амондзысты сæ хъомылгæнинæгтæн сæрмагонд кабинетты. Уæлдæр загъдæуыд, чыз-джытæн кæй амондзысты хуыйыны сусæгдзинæдтæ, уыимæ æвзонг лæппуты та цайдагъ кæндзысты хъæдæрмæг æмæ æфсæйнаджы куыстыл. Алыгъуызон мадзæлттæ уадзынæн дзы ис актон зал æмæ лæггад кæндзæн 150 адæймагæн, афтæ ма пайда кæндзысты библиотекæйы хæрзиуджытæй дæр. Цæмæй тæвд рæстæджы ахуыргæнинæгтæ ма тыхсой, уый тыххæй дзы кусдзæн, уæлдæф чи дæтта, ахæм змæлынгæнджытæ. Кусдзæн дзы лифт дæр.
Аразджытæ зæрдиагæй батыхстысты хъæрмадон системæ æрбæстон кæныныл дæр. Уый тыххæй æрластæуыд пецтæ æмæ уал кусдзысты соляркæйы фæрцы. Фæлæ фидæнмæ хъæумæ æрдзон газ куы æрбауадзой, уæд сын фæивдзысты сæ хæйттæ æмæ рахиздзысты уымæй пайда кæнынмæ. Хорз бакуыстой канализацион системæйыл, уый арæзт у нырыккон домæнтæм гæсгæ, ома уыдзæн, йæхи мидæг чи сыгъдæг кæны, ахæм канализаци. Кæй зæгъын æй хъæуы, нæ фæтыхсдзысты донæй дæр. Ныккæнды æвæрд сты резервуартæ, уыдон дзаг куы уой, уæд сты 10 боны фаг. Фæткмæ æркодтой, зынгсирвæзты ныхмæ цы хъæуы, уыдон дæр. Скъолайы кæрт уыдзæн æмбонд, ацы бонты уыцы куыст дæр бакæндзысты кæронмæ. Хъарм бонты физкультурæйы уроктыл ахуыргæнинæгтæ сæ тыхтæ фæлвардзысты, волейбол æмæ баскетболæн цы фæзуæттæ сараздзысты, уым. Кæстæр кълæсты ахуырдзаутæ улæфдзысты чысыл фæлладуадзæн кæрты, уыдзæн дзы бандæттæ. Æппæт ацы куыстыты чи бафыдæбон кодта, уыдон кой дæр æнæмæнг скæнын хъæуы, уымæн æмæ се 'рмдзæф бæрæгæй разынд ацы рæсугъд нырыккон бæстыхайыл. Уыдон сты Лохты Земфирæ, Тегкаты Маринæ, Хуыбиаты Зураб, Роланд, Бæззаты Уырызмæг, Цхуырбаты Алан, Гуццаты Витали, Хетæгкаты Константин, Алан æмæ æндæртæ. Кусджытæ нæ хъаст кæнынц сæ мыздæй дæр.
ХУЫБИАТЫ Н.