Nog adres

АДДЖЫН ДÆ ЗÆРДÆЙÆН

Мæ мадæлон æвзагыл мын æрцæугæ цаутæ фыццаг хатт бамбарын кодта нæ уарзон газет «Хурзæрин». Чысылæй, цалынмæ газет кæсын мæ бон нæма уыдис, уæддæр-иу зæрдиагæй хъуыстон, газет-иу ацæргæ адæймæгтæн чи кастис, уыдонмæ. Мæ зæрдæмæ тынг хъардта йæ алы уац дæр. Стæй æдæрсгæ кæсын куы базыдтон, уæд ын кастæн йæ алы номыр дæр. Арæх-иу афарстон ахуыргæнджыты дæр исты-иу мын дзы æнæмбæрст куы уыдис, уæд.

Газет арæх мыхуыр кодта æрмæджытæ дыргъгуысты фæдыл. Уыцы рæстæджы стыр хъусдард здæхтой дыргъгуыстмæ хъæууон фæллойгæнджытæ. Уыцы цаутæ мæнæн дæр тынг бауарзын кодтой дыргъгуыст, æмæ институтмæ дæр бацыдтæн уыцы хайадмæ. Райстон агрономы ном.
«Хурзæрин» исын æмæ кæсын тынг зæрдиагæй. Уæлдай зæрдиагдæрæй фæкæсын хъæууон хæдзарады специалистты хæстæ, куыст, хъæууонхæдзарадон продуктты парахатдзинад саразыны тыххæй дзы цы уацтæ вæййы, уыдон.
Зæрдæмæхъаргæ вæййынц газеты фæрстыл фæсивæды хæрзæгъдауы хъомылады фарстыл цы уацтæ вæййынц, уыдон дæр. Арæх дзы бакæсын, йæ цард нæ республикæйы сæрибардзинады тыххæй нывондæн чи æрхаста, уыцы лæппуты тыххæй номарæн уацтæ. Хорз уаид бинонты æмуд царды æмæ æвзонг фæсивæды хъомыл кæныны фæдыл газет фылдæр уацтæ куы мыхуыр кæнид, уæд. Ныфс мæ ис, уыцы уацтæ ахъаз кæй уыдзысты адæмы кæрæдзимæ æрбангом кæнынæн.
Ноджыдæр арфæйаг у, нæ уарзон газет, æмæ хорз хабæрттæхæссæг у дæ рыст, хæствæллад адæммæ. Тынг мæ фæнды, цæмæй та кæддæрау суай сæ фæллойадон æнтыстытыл дзурæг. Дæ азтæ та кæд зæронды карыл дзурæг сты, уæддæр уыдон дæумæ никуыцæй хауынц, уый нæ, фæлæ кæныс уæндонæй-уæндондæр къахдзæфтæ æмæ дын фæкæлæн макуы уæд.
ДЫГЪУЫЗТЫ Таймураз
агроном