Nog adres

Курсанттæ райстой æфсæддон ардбахæрд

kursanti.jpg
Хуссар Ирыстоны Уæлвæткон уавæрты министрады уагъд æрцыд Æфсæддон ардбахæрды цытджын церемони. Фыдыбæстæйыл иузæрдионæй кæй баззайдзысты, уый тыххæй ард бахордтой Хуссар Ирыстонæй цыппар студенты, кæцытæ ацы аз ахуыр кæнынмæ бацыдысты Уæлвæткон уавæрты министрады хаххыл уæрæсейаг уæлдæр ахуыргæнæндæттæм. Уыдон систы Уæрæсейы Федерацийы зынгхуыссынгæнæн службæйы паддзахадон академи æмæ УФ-йы æмбæстæгты хъахъхъæнынады академийы курсанттæ.

Уæлвæткон уавæрты министры хæстæ æххæстгæнæг Санахъоты Сергей раарфæ кодта курсанттæн ардбахæрд райсыны тыххæй æмæ сын радта бæлвырдгæнæнтæ.
«Мах ныфс ис, сымах не ‘ууæнчы хицау кæй разындзыстут, уæ ныййарджыты фыдæнхъæл кæй нæ фæкæндзыстут æмæ уыцы фондз азы хорз кæй ахуыр кæндзыстут, уымæй. Мах уæм æнхъæлмæ кæсдзыстæм афицертæй», - загъта Санахъоты Сергей.

Уæлвæткон уавæрты министрады материалон техникон ифтонгады хайады сæргълæууæг Тадтаты Алан банысан кодта, зæгъгæ, бацæуæн фæлварæнты курсанттæ сæхи равдыстой хуыздæр фарсырдыгæй.
«Ацы бон уæ царды у ахсджиагдæр цаутæй сæ иу. Сымах хъуамæ уат æгъдауджын æмæ уæ зæрдыл дарут уæ ныйййарджыты фæдзæхстытæ. Мах уæм æнхъæлмæ кæсдзыстæм æмæ нæм хъуамæ æрæздæхат цæттæ специалисттæй. Сымах хъæут Фыдыбæстæйы», - банысан кодта Тадтаты Алан.
Сæ рады курсантты ныййарджытæ дæр бузныджы ныхæстæ загътой Уæлвæткон уавæрты министрады къухдариуæгадæн, сæ сывæллæттæн сын уæрæсейаг уæлдæр ахуыргæнæндæтты ахуыр кæнынæн фадат кæй радтой, уый тыххæй.