Nog adres

Хъæууон цард/ СÆ КУЫСТЫ ФÆСТИУДЖЫТÆ

Нæ хъæууон хæдзарады фермерон хæдзарадтæ сæ уавæртæм гæсгæ архайынц, цы куыстытæ сын вæййы бакæнинаг, уыдон сæххæст кæныныл æмæ сын цасдæрбæрцæй æнтысгæ дæр кæны. Хицæнтæй сисгæйæ, Знауыры районы хæдзарадтæ механизатортæ уалдзæджы мæр бахуым кодтой 450 гектары фæзуатыл. Фæззыгон анеулиимæ иумæ культивации та бакодтой 700 гектары. Хæдзарадтæ хорз бакуыстой уалдзыгæнд хъæбæрхор байтауыныл дæр æмæ сын бантыст 670 гектары бакусын.

Сæ уалдзыгон хъæууонхæдзарадон куыстытæ æнтысгæйæ ахицæн кодтой Ленингоры районы фермерон хæдзарадтæ дæр. Иууыл иумæ уалдзæджы хуымгонд æрцыд 720 гектары, механизатортæ цырд фæлæууыдысты æмæ йæ культивации дæр скодтой рæстæгыл. Куыддæр уалдзыгæнд хъæбæрхор тауыны афон æрбалæууыд,афтæ йæм бавнæлдтой æмæ уыцы куыстытæ дæр ахицæн кодтой цыбыр æмгъуыдтæм.Ацы куыстыты фесгуыхтысты Цъинагар, Орчъосан æмæ Абреуы хъæууон фæллойгæнджытæ. Уымæй дарддæр ма республикæйы хицæн фермерон хæдзарадтæ байтыдтой нартхоры культурæ дæр æмæ иууыл иумæ йæ фæзуат ахсы 100 гектарæй фылдæр. Ацы хъæууонхæдзарадон культурæ цы хæзарадтæ байтыдтой, уыдон сты Къостайыхъæуы паддзахадон хæдзарад, афтæ ма Знауыр, Уелит, Тъбеты фермерон хæдзарадтæ.
Республикæйы Агропромсервис «Ир»-ы директор Мамытаты Уахтъанг куыд загъта, афтæмæй æрбалæууыд таугæ æмæ æрдзон кæрдæг кæрдыны рæстæг дæр æмæ уыцы куыстытæ бавналынмæ дæр сты ифтонг. Ис сæм кæрдæн техникæ, уыдонæн фæсауæрц хæйттæ æмæ æртаг дæр. Ныфс æй ис, холлагкуыстгæнджытæ кæй спайда кæндзысты æппæт фадæттæй дæр æмæ сæ холлæгтæ кæй бабæстон кæндзысты мæй æмæ æрдæгмæ.
ХУЫБИАТЫ Н.