Nog adres

АРХАЙÆМ, НÆ УАВÆРТÆ НÆ КУЫД АМОНЫНЦ, АФТÆ

Дунейы алы цивилизацион бæстæйы дæр уæвынад кæнынц æмæ кусынц алыгъуызон хæрзаудæн фондтæ, уыцы нымæцы сывæллæтты фондтæ дæр, кæцытæ стыр æххуыс кæнынц æххуысхъуаг адæмæн. Сывæллæтты фонд та, сæрмагондæй, æххуыс кæны сидзæр æмæ тыхст уавæры бахауæг, афтæ ма инвалид сывæллæттæн дæр.
2006 азы Хуссар Ирыстоны дæр арæзт æрцыд сывæллæтты хæрзаудæн фонд «Хуры тын», æмæ йæ сæргъ слæууыд куыстуарзаг æмæ курдиатджын адæймаг Джиоты Замирæ, кæцы дæргъвæтин азты кусы рæзгæ фæлтæры хъомылады къабазы, уыд РХИ-йы Ахуырады министр дæр. Фонды сконды ма уыдысты Бестауты Алинæ, Битеты Ингæ (ныртæккæ - дзæнæттаг), Кокойты Тамарæ æмæ Тедеты Аленæ. РХИ-йы Сывæллæтты хæрзаудæн фондæн уыд йæхи Устав дæр, цыран фыст сты фонды архайд æмæ нысæнтты уагæвæрдтæ. Фонд специалон æххуыс хъуамæ кæна æндæр бæстæты сывæллæттæн, кæцытæ хъыгдард баййæфтой хæстыты, æрдзон æна-монддзинæдты æмæ эпидемиты рæстæджы. Дзыллон информацийы фæрæзты пропагандистон архайды руаджы сæхимæ хъуамæ здахой æхсæнады хъусдард нæ бæстæйы æмæ фæсарæнты сывæллæтты æнæаскъуыддзаггонд проблемæтæм æмæ афтæ дарддæр. Джиоты Замирæ ацы фонды сæргъ лæууыд 2013 азы онг, уый фæстæ та фонды сæргъ слæууыд Цхинвалы скъола-интернаты директор Тедеты Роланд. Уый нын фонды тыххæй афтæ радзырдта:

- Куыд æндæр бæстæты, афтæ Хуссар Ирыстоны дæр уæвынад кæны Сывæллæтты фонд, фæлæ æндæр размæдзыд бæстæтау махæн нæ авналæнтæ къуындæг сты, уымæн æмæ 20 азы дæргъы цардыстæм хæстон уавæрты æмæ уый тынг бандæвта Хуссар Ирыстоны экономикæйыл. Æмæ нын уымæ гæсгæ фадат нæй куыд нæ фæнды, афтæ æххуысхъуаг сывæллæттæн æххуыс кæнын. Фæлæ уæддæр архайæм, куыд нæ бон у, нæ къух нæ куыд амоны, афтæ.
2008 азы августы хæсты фæстæ Цæгат Ирыстоны Беслæнмæ æртахт Уæрæсейы Федерацийы Сывæллæтты фонды сæргълæууæг, фыссæг, журналист Альберт Лиханов, уый ма у дунеон сывæллæтты фондты ассоциацийы президент дæр, кæцы гуманитарон æххуыс æрласта нæ хæстæфхæрд сывæллæттæн. Беслæны йемæ базонгæ сты йæ хуссарирыстойнаг коллегæтæ. 2008 азы августы хæсты размæ Хуссар Ирыстоны уавæр бонæй-бон æндыгъддæр куы кодта, уæд эвакуаци кæнын райдыдтой сывæллæтты æдас рæттæм. Алы рæттæм эвакуаци æрцыдысты Цхинвалы скъола-интер-наты сывæллæттæ дæр, кæцытæй бирæтæ уыдысты бынтон сидзæртæ кæнæ та æх-хуысхъуаг бинонтæй. Уæд Лиханов бахæс кодта Цæгат Ирыстон-Аланийы Сывæллæтты фондæн, цæмæй ссардтаиккой Цхинвалы скъола-интернаты сидзæр сы-вæллæтты æнæхъæн Цæгат Кавказы. Агуырдта сæ хæрзаудæн фонд «Память»-ы сæргълæууæг Тедеты Зæринæ, кæцы æрæмбырд кодта 25 сывæллоны. Уæрæсейы Федерацийы Сывæллæтты фондæн Мæскуыйы цур поселок Нагорноейы ис тынг хорз реабилитацион центр æмæ сывæллæтты Лиханов фæхуыдта ацы центрмæ, цыран баззадысты æмæ баулæфыдысты æртæ мæйы.
Уый æдтейæ ма Лиханов Хуссар Ирыстоны сывæллæттæн æххуысæн сарæзта программæ «Помощь детям Южной Осетии», зæгъгæ. Ацы программæйы фæлгæтты УФ-йы Сывæллæтты фонд Лихановы сæргълæудæй Хуссар Ирыстоны сывæллæттæн æрласта авд КамАЗ-ы гуманитарон æххуыс, сывæллæтты хæлцæй райдайгæйæ, оргтехникæ, инвентарь æмæ бирæ æндæртæй фæугæйæ. Ацы гуманитарон æххуыс дих кодта УФ-йы Сывæллæтты фонды уæнг Любовь Крыжановская, кæцы у тынг раст адæймаг æмæ гуманитарон æххуыс æххæстæй дæр сæмбæлд сæ адресаттыл. Иннæ ахæм ма Крыжановская фæд-фæдыл дыууæ азы дæргъы УФ-йы сывæл-лæтты фондæй Ногазон лæвæрттæ æрласта Хуссар Ирыстоны сывæллæттæн. 2009-2010 азты Цхинвалы скъола-интернаты 120 сывæллоны баулæфыдысты ацы фонды реабилитацион центры. Æз бахатыдтæн Лихановмæ, цæмæй Хуссар Ирыстоны Сывæллæтты фонды се скондмæ айстаиккой, фæлæ мын уый сдзуапп кодта, зæгъгæ, сымах стут хицæн бæстæ æмæ уын хъуамæ уа уæхи Сывæллæтты фонд, æз та уын æххуыс кæндзынæн. Ацы фонды сæргъ куы слæууыдтæн, уæд 2013 азы октябры мæйы хайад райстон Мæскуыйы УФ-йы Сывæллæтты фонды хыгъдон-æвзарæн конференцийы. Конференцийы ма уыдысты куыд ХПÆ-йы бæстæтæ, афтæ Европæйы бæстæты минæвæрттæ дæр. Уыцы бæстæты Сывæллæтты фондты сæрдæрттæ сты УФ-йы Сывæллæтты фонды уæнгтæ дæр.
Альберт Лиханов ма нын баххуыс кодта скъола-интернаты бæстыхай сцалцæг кæны дæр. Уый бахатыд ООО Уæрæсейы æфсæнвæндæгты президент В.Якунинмæ, цæмæй уый баххуыс кодтаид Цхинвалы скъола-интернаты бæстыхайы арæзтадæн, кæцы 2008 азы августы хæсты хъыгдард баййæфта. Якунины бахæсмæ гæсгæ нын Уæрæсейы æфсæнвæндаджы кусджытæ æрæмбырд кодтой 220 милуан сомы, кæцытæй 180 милуан сомы бахардз сты бæстыхайы арæзтад æмæ капиталон цалцæг кæныныл. Иннæ æхцайы фæрæзтæ дæр хардз æрцыдысты нысанмæздæхтæй. Иудзырдæй, Лиханов нын тынг хорз зыдта нæ царды уавæртæ æмæ нын ахæм æххуыстæ дæр уымæн фæкодта, кæцыйы тыххæй йын дзурын стыр бузныг.
Нæ къух нæ куыд амоны, афтæ не 'ххуысы къух фæдаргъ кæнæм, уæлдай тыхстдæр уавæры чи бахауы, уыцы сывæллæттæм. Зæгъæм, «Шанхай»-ы районы цæрæг Цхуырбаты Викторияйæн йæ мад у уæззау рынчын, йæхицæн дæр йе 'нæниздзинад нывыл нæу, хæдзар дæр сын кæй нæй, уымæ гæсгæ цæрынц æххуырст хæдзары. Ацы чызгæн 2013 азы æххуысы хуызы радтам 2 мин сомы æмæ 2014 азы та - 5 мин сомы. Скъола-интернаты 11-æм къласы ахуыргæнинаг Хаситы Робертæн дæр бахъуыд æвæстиатæй медицинон æххуыс бакæнын, мах æй арвыстам Мæскуымæ æмæ йын уым хос кæнынц. Нæ ахуыргæнинаг Бекъойты Русланæн Беслæны йæ къахыл сарæзтой операци, кæцыйыл бахардз 25 мин сомы. Баххуыс нын кодта амалиуæггæнæг Джыккайты Алан æмæ дзы баззадыстæм тынг райгондæй. Ацы аз скъола-интернаты рауагъдонтæй дæсæн баххуыс кодтам фæйнæ 10 мин сомы. РХИ-йы скъола-интернаты рауагъдонтæй бирæтæ сты бынтон сидзæртæ æмæ сын скъола каст фæуыны фæстæ нæ вæййы цæрæнуат, ахæмтæ сты Сиукъаты Алан, Джиоты Мендик, Æлборты Оксанæ æмæ æндæртæ. Бирæты уавæры дзы бацæуын æмæ сæ рæстæгмæ ныууадзын нæхи уагдоны.
Сывæллæтты фондмæ бирæ хорз фæнд-тæ бæргæ ис, нæ къух нæ куы амонид, уæд. Фæлæ нæ ныфс ис, тагъд рæстæджы нæ уавæртæ кæй фæхуыздæр уыдзысты, уымæй. Мæнæ куыд фæдзурынц, бон цæуы æмæ фарн йемæ хæссы, - радзырдта Тедеты Роланд.
Сывæллæтты фонды сæрдар сиды не 'мбæстæгтæм, кæцытæ куыдфæндыйы цæстæй нæ кæсынц æххуысхъуаг сывæллæттæм, цæмæй, куыд сæ бон у, уымæй баххуыс кæной. РХИ-йы Сывæллæтты фонды адрес: г. Цхинвал, Октябры уынг, 74. Республикæ Хуссар Ирыстоны националон банчы фонды сæрмагонд хыгъд: к/с 30231810300220000001. Фонды сæрдар Тедеты Роланды телефоны номыртæ: 8 929 805 40 36.
ДЖИОТЫ Екатеринæ