Nog adres

Хуссарирыстойнаг ахуыргæнæг — Пушкины конкурсы лауреат

-0169.jpgÆрвылаз дæр горæт Мæскуыйы уагъд фæцæуы гениалон уырыссаг поэт А. Пушкины Дунеон конкурс, цыран хайад райсынц æввахс æмæ дард фæсарæнты астæуккаг скъолаты ахуыргæнджытæ. Конкурсы организатортæ сты — «Российская газета», горæт Мæскуыйы æддагонэкономикон æмæ дунеон бастдзинæдты департамент Уæрæсейы Федерацийы Фæсарæйнаг хъуыддæгты министрады æххуысæй æмæ «Русский мир»-ы фонд. 2012 азы ацы конкурсы лауреат ссис Цхинвалы 5-æм астæуккаг скъолайы ахуыргæнæг, 2010 азы конкурс «Учитель года»-йы уæлахиздзау Мулдарты Аллæ. Æмæ та нæм мæнæ ныр дæр æхсызгон хабар æрæхъуыст Мæскуыйæ. 2014 азы Пушкины номыл дунеон XIV-æм конкурсы лауреат ссис 5-æм астæуккаг скъолайы райдиан кълæсты ахуыргæнæг Тогойты Миленæ. Кæй зæгъын æй хъæуы, ацы хъуыддаг æхсызгон уыд куыд йе ’мкусджытæн, афтæ нæ горæты скъолаты ахуыргæнджытæ æмæ цæрджытæн дæр. Уымæн æмæ иу скъолайæ дыууæ ахуыргæнæджы кæй систы ахæм кадджын конкурсы лауреаттæ, уый скъолайы хорз куыстыл дзурæг у.
Конкурсы хайадисджытæ бавдыстой эссетæ ахæм ак-туалон темæйыл: «Пушкин. Интернет. Базар. Кто же настоящий учитель русского языка в моей стране?», зæгъгæ. Конкурс баст уыд Александр Пушкины райгуырæн бонимæ.

— «Конкурсы хайад райсын-мæ мæ сразæнгард кодта мæ коллегæ, ацы конкурсы лауреат Мулдарты Аллæ. Мæ куыст — уырыссаг æвзагыл раст æмæ рæсугъдæй, Пушкины æвзагыл дзурыны фæдыл арвыстон ацы аз 21-æм апрелы. Раст зæгъгæйæ, мæнмæ цæмæдæр гæсгæ афтæ каст æмæ мын мæ куыстæн æмбæлон аргъ не скæндзысты, фæлæ раст нæ разындтæн. 6-æм июны мæм Мулдарты Аллæ фæдзырдта æмæ мын раарфæ кодта, Пушкины конкурсы лауреат кæй сдæн, уый фæдыл. Æвæццæгæн, Аллæ мæнæй тынгдæр æнхъæлмæ каст конкурсы фæстиуджытæм æмæ йæ лауреат кæй сдæн, уый дæр фыццаг уымæн базыдта. Кæй зæгъын æй хъæуы, тынг æхсызгон мын уыд. Конкурсы лауреатты сентябры мæйы фæхуыдтой Мæскуымæ, цыран цытджын церемонийы хорзæхджын æрцæудзысты дипломтæ æмæ æхцайы премитæй», — радзырдта конкурсы лауреат.
Тогойты Миленæ райгуырд горæт Цхинвалы. Астуæккаг ахуырад райста, ныртæккæ йæхæдæг йæ зонындзинæдтæ рæзгæ фæлтæрæн кæм амоны, уым — 5-æм астæуккаг скъолайы. 1998 азы ахуыр кæнынмæ бацыд Хуссар Ирыстоны паддзахадон педагогон университеты райдиан ахуырады педагогикæ æмæ методикæйы факультетмæ. Куыд скъолайы, афтæ уæлдæр ахуыргæнæн-доны дæр ахуыр кодта æрмæстдæр тынг хорз нысæнттыл. Райдиан кълæсты ахуыргæнæджы дæсныйад райсыны фæстæ нæ горæты 6-æм астæуккаг скъолайы бакуыста дыууæ азы. 2000 азы йæ райдиан кълæсты ахуыргæнæгæй фæхуыдтой Цхинвалы фыццаг сæрмагонд скъола «Элита»-мæ, фæлæ скъола бæрæг аххосæгтæм гæсгæ æхгæд æрцыд дыууæ азы фæстæ. Уæд Миленæ йæ къласы ахуыргæнинæгтимæ рацыдысты сæрмагонд скъола «Эрудит»-мæ, кæцыйæн къухдариуæг кодта Зубрицкий Булат. Ацы скъолайы кусгæйæ, æвзонг ахуыргæнæгæн саккаг кодтой РХИ-йы Президенты преми, кæцы лæвæрд цыд республикæйы хуыздæр ахуыргæнджытæн.
2006 азы Тогойты Миленæ кусын райдыдта 5-æм астæуккаг скъолайы райдиан кълæсты ахуыргæнæгæй æмæ абоны онг дæр кусы йæ уарзон скъолайы. 2009 азы Дзæу-джыхъæуы уагъд цыд Уæрæсейы Федерацийы Социалистон куысты хъайтар, адæмон ахуырады отличник Цæлыккаты Нинæйы номарæн конкурс райдиан кълæсты ахуыргæнджыты ’хсæн. Конкурс уагътой Цæгат Ирыстон-Аланийы профцæдисты комитет Тезиты Таймуразы сæргълæудæй. Конкурсмæ фæхуыдтой хуссарирыстойнаг ахуыргæнджыты дæр. Ацы конкурсы Тогойты Миленæйы Цæгат Ирыстон-Аланийы адæмон ахуырады профцæдисты комитет схорзæхджын кодта дипломæй.
2011 азы та æвзонг ахуыргæнæджы схорзæхджын кодтой арфæйы фыстæгæй, куыд 2010-2011 ахуыры азты хуыз-дæр къласон къухдариуæггæнæг. 2012 азы Миленæйы рауагъдонтæ — 4-æм къласы ахуыргæнинæгтæ хайад райстой горæтон олимпиадæйы уырыссаг æвзаг, математикæ, ирон æвзаг æмæ æндæр предметтæй. Ацы олимпиадæйы йæ ахуыргæнинæгтæн уыд стыр æнтыстытæ, кæцытæй асты бæрц хорзæхджын æрцыдысты арфæйы фыстæджытæй. Тогойты Миленæ æмæ йæ ахуыргæнинæгты схорзæхджын кодта горæт Цхинвалы администрацийы ахуыры хайады сæргълæууæг Джиоты Агуындæ. Фидæны кæцыфæнды профессийæн дæр фидар бындур райдиан кълæсты ахуыр кæнгæйæ кæй æрцæуы æвæрд, уый æмбаргæйæ, Миленæ йæ ахуыргæнинæгтимæ кæны алыварсон куыст, арæх сын ауадзы куыд тематикон, афтæ календарон мадзæлттæ дæр, кæцытæн скъолайы къухдариуæгад скæны æмбæлон аргъ, райгонд дзы сты йе ‘нувыд куысты тыххæй.
Йæ профессийыл æнувыд та уымæн у æмæ уый раджы бауарзта ахуыргæнæджы дæсныйад. Иннæ ахæм йæ ный-йарджытæ Петр æмæ Светæ дæр хæрз чысылæй фæцайдагъ кодтой сæ цоты — дыууæ чызджы æмæ иу лæппуйы фæллой кæныныл. Фыццаг хатт йæ къах 5-æм скъолайы кæртæй куы бавæрдта æмæ йын йæ фыццаг ахуыргæнæг Медойты Венерæ йæ зонындзинæдтæ æнæвгъау куы амыдта, кæссын-фыссын ын куы бацамыдта, уæдæй фæстæмæ аскъуыддзаг кодта, уый дæр йæ фыццаг ахуыргæнæгау кæй суыдзæн райдиан кълæсты ахуыргæнæг. Уымæн æмæ фыццагкъласон цæрæн-бонтæм бахъуыды кæны йæ фыццаг ахуыргæнæджы, фыццаг хатт ыл чи баузæлы æмæ йын зонындзинæдты дунемæ фæндаг чи бакæны, уыцы ахуыргæнæджы.
Уæдæ куыд уынæм, афтæмæй 14 азы дæргъы æвзонг ахуыргæнæгæн йæ къухты бафтыд дзæвгар æнтыстытæ æмæ йын нæ зæрдæ зæгъы ноджы стырдæр æнтыстытæ. Бирæ азты фæрнæй фæлæуу дæ уарзон ахуыргæнинæгты раз!
ДЖИОТЫ Екатеринæ