Nog adres

УЫРЫССАГ КЪÆБИЦЫ ФИДЫЦ ÆМÆ ДЗАДЖДЖЫНДЗИНАД

Стыр Уæрæсе куыд бирæгъуызон æмæ бирæфарсон у, афтæ бирæгъуызон у йæ хæринæгты къæбиц дæр. Йæ территори æгæрон кæй у, уымæ гæсгæ, сæ традицион хæринæгтæ дæр хицæн кæнынц, цы бынæтты цæрынц, уымæ гæсгæ. Афтæ кæй у, уый ирдæй разынд æрæджы 12 июны нæ республикæйы Уæрæсейы Бон нысан кæныны рæстæджы, цы уырыссаг национ хæринæгты конкурс уагъд æрцыд, уым дæр. Ацы конкурсы хайад райстой нæ горæты цы ресторантæ æмæ кафетæ ис, уыдонæй æрмæстдæр æртæ. Уыдон уыдысты: «Ассель», «Фатимæ» æмæ «Берег». Конкурс ауадзыны тыххæй нæ республикæйы хицауад развæлгъау бацархайдта æмæ сарæзтой сæрмагонд къамис, кæцытæ æххæст кодтой жюрийы рольтæ дæр. Къамис зылдис ресторантыл æмæ бæрæг кодта, уыдон сæхи куыд бацæттæ кодтой сæ бæрæгбонон конкурсмæ æмæ цахæм хæринæгтæ æмæ нуазинæгтæ æрцæттæ кодтой, æппæт уыдон. Фыццаджыдæр, жюрийы уæнгтæ аргъ кодтой хæринæгты дзаджджындзинадæн, фынгæвæрд, афтæ ма куыд рæсугъд фæлындзыд уыдысты, хæринæгты æрæвæрды стиль æмæ къæбицы бирæ лыстæг сусæгдзинæдтæ.

Жюрийы уæнгтыл алы рестораны дæр æмбæлдысты хъæлдзæгæй. Уыдон-иу цæхх æмæ къæбæрæй суазæг кодтой сæ уазджыты æмæ-иу сын бæрæгбоны цытæн арфæтæ ракодтой. Банысан кæнын хъæуы уый, æмæ ресторан «Фатимæ»-йы уазджытыл дуаргæрон сæмбæлдис къаннæг чызг уырыссаг националон дарæсы. Уый уазджыты зæрдæмæ тынг фæцыдис æмæ йын аккаг аргъ скодтой. Фысымтæн-иу арфæтæ ракодтой мадзалы организатор, РХИ-йы Президенты паддзахадон уынаффæгæнæг Зассеты Жаннæ æмæ нæ горæты мэр Æлборты Алан. Зассеты Жаннæ ма-иу йæ раныхæсты уый дæр банысан кодта, цæмæй хæрæндæтты хицæуттæ мæй иу хатт расидой уырыссаг къæбицы бонæй. «Куыд зонут, афтæмæй абон нæ республикæйы цæры бирæ уырыссаг адæм, уыдон æмрæнхъ æндæр нациты минæвæрттæ дæр. Уыдонæн дæр æмæ сымахæн дæр хорз уаид, арæхдæр-иу уырыссаг къæбицы бон куы саразиккат, уый», - загъта Зассеты Жаннæ. Уыцы хъуыдыйыл сразы сты, куыд жюрийы уæнгтæ, афтæ ресторанты администратортæ дæр.
Банысан кæнын хъæуы, уый æмæ алы ресторанты фынгтыл дæр рæсугъдæвæрдæй кæй уыдысты æндæр æмæ æндæр уырыссаг зындгонд хæринæгтæ. Ресторантæ «Ассель» æмæ «Фатимæ»-йы сæрмагондæй æвæрд уыдысты æнæхъæн Уæрæсейы зындгонд чи сты, уыцы «Тулæйаг самовартæ». Сæ алыварс рæсугъд æвæрд уыдысты, цайимæ цы мигæнæнтæ æрæвæрынц, уыдон. Сæ цуры уыд мыд æмæ адджинæгтæ. Нуазинæгтæй ма ацы ресторанты фынгтыл æвæрд уыдысты къуымæл, рагон уырыссаг нуазинаг «Сбитень» , фæткъуыйæ арæзт къампот æмæ «Русская водка».
Жюрийы уæнгтæ 1 бынат саккаг кодтой кафе «Фатимæ»-йæн, дыккаг бынат æрхауд «Ассель»-мæ, æртыккаг - «Берег».
ЦХУЫРБАТЫ Л.