Nog adres

Цæгат Ирыстоны

ДИН ÆВИ ÆНÆНИЗДЗИНАД?

Дзæуджыхъæуы Церетелийы уынджы рæхджы сисдзысты, сæдæ азы бæрц не 'фсæддонты кæм дзæбæх кодтой, уыцы госпиталь. Куыд рабæрæг, афтæмæй йæ Уæрæсейы хъахъхъæнынады министрад балæвар кодта Дзæуджыхъæуы епархийæн. Ныр дзы сæ зæрды ис духовон-рухстауæн центр саразын. Бæстыхай рагæй кæлæдздзаг у, тас уыд, исты фыдбылыз дзы æрцæуынæй. 2003 азæй фæстæмæ министрад архайдта йе сног кæныныл, фæлæ сæ къухы нæ бафтыд. Уымæн æмæ бындурон цалцæг ног арæзт бæстыхайæ бирæ асламдæр нæ лæууы. Хъахъхъæнынады министрад бæстыхай епархийæн кæй радта, уый æнæнхъæлæджы нæу. Райдайæны, октябры революцийы онг госпиталь уыд епархийы кувæндон æмæ йæ бирæ æндæр кувæндæттау фехæлдтой, систой йын йæ куполтæ, йæ дзæнгæрæг, фæлæ баззадысты йæ къултæ, дыууæ уæладзыгыл ма бафтыдтой æртыккаг æмæ уæдæй абонмæ фæлæггад кодта æфсады æнæниздзинадæн.

Ныридæгæн епархийы хъæппæрисæй арæзт æрцыд æнæкоммерцион организаци «Владикавказский духовно-просветительский центр». Бæстыхай арæзт цæудзæн историон документтæ, зæронд къамтæм гæсгæ. Проектыл кусынц скульптортæ Мæхъиты Хъауырбег æмæ Болиаты Руслан. Куы сцæттæ уа, уæд æрвыст æрцæудзæн экспертизæмæ, стæй уæд æрывналдзысты арæзтадон куыстытæм.
- Абон та сног историон рæстдзинад. Кæддæр аргъуаны чи уыд, уыцы кувæндон раздæхт адæммæ. Уымæй мах стыр бузныг стæм инæлар Андрей Гурулевæй. Ног кувæндоны арæзтадæн чысыл фæрæзтæ нæ хъæуы, фæлæ нæ ныфс ис, арфæйаг хъуыддаджы адæм нæ фарсмæ кæй æрбалæудзысты æмæ иумийаг хъуыддагæн æххуысгæнджытæ кæй фæзындзæн, - загъта Дзæуджыхъæуы æмæ алайнаг епархийы архиепископ Зосима.
Æцæг, нырма бæрæг нæу, æфсад та се 'нæниздзинад кæм дзæбæх кæндзысты, уый. Рох кæнын нæ хъæуы, кувынæй рынчынты дзæбæх кæнын ахсджиагдæр хъуыддаг кæй у, уый.
Нæ уахц.