Nog adres

Бастдзинæдтæ фидар кæнынц

1401786564_dscn7078.jpg
Тыбылты Алыксандры номыл Хуссар Ирыстоны университеты ректор Тедеты Вадим йæхимæ райста Хуссар федералон университеты рагзаманы археологи æмæ историйы кафедрæйы сæргълæууæг, историон зонæдты доктор, профессор Алексей Кияшкойы. Фембæлды ма хайад райстой университеты ахуыры куысты фæдыл проректор Гобозты Станислав, стратегион партнерты фæдыл проректор Тедеты Залинæ æмæ историон факультеты декан Тадтаты Таймураз.
Алексей Кияшко фехъусын кодта, зæгъгæ, ХИПУ-йы историон факультеты рауагъдонтæн дæтты дыууæ бюджетон бынаты магистратурæмæ Хуссар федералон университеты археологийы фæдыл, кæцытæн уый фæстæ уыдзæн аспирантурæмæ бацæуыны фадат дæр.
Тедеты Вадим банысан кодта, зæгъгæ, ХИПУ-йы историон факультеты деканат равзардзæн историон факультеты уæлдай перспективондæр рауагъдонты магистратурæмæ сæ Хуссар федералон университетмæ арвитыны тыххæй.

«Дарддæры перспективæйы æркастæуыдзæн иумиаг куысты æндæр здæхтытæм дæр», - загъта Тедеты Вадим.
Алексей Кияшко банысан кодта, зæгъгæ, йæ фæнды йæ хуссарирыстойнаг коллегæтимæ æмæ иумиагæй университетимæ контакттæ саразын.
«Бастдзинæдтæ араздзыстæм æмæ дарддæр дæр æмгуыстад кæндзыстæм. Археолог у хъæуæг дæсныйад æмæ нæ уæлдæр ахуыргæнæндоны рауагъдонтæ сæ дæсныйады фæдыл æнцонтæй ссарынц куыст», - загъта Алексей Кияшко.
Уый ма йæ фæндондзинад равдыста ХИПУ-йы студенттæн археологийы фæдыл лекциты курс бакæсыны тыххæй дæр.