Nog adres

Президент фембæлд Къуайсайы цæрджытимæ

Республикæ Хуссар Ирыстоны Президент Тыбылты Леонид йæхимæ райста горæт Къуайсайы цæрджыты. Фембæлды рæстæджы къуайсайæгтæ дзырдтой социалон-экономикон фарстатыл, Къуыдаргомы фæндæгты проблемæйыл. Уыимæ иумæ ма дзырд цыд къуайсæйæгты иууыл карздæр проблемæтæ - Къуайсайы рынчындон æмæ скъолайы арæзтадтыл.
Президент сын куы байхъуыста сæ ныхасмæ, уæд банысан кодта, зæгъгæ, республикæйы социалон-экономикон рæзты фарстатæ скъуыддзаг кæнын у Хуссар Ирыс-тоны къухдариуæгады сæйраг хæс.
Паддзахады сæргълæууæг къуайсайæгтæн ныфс бавæрдта, зæгъгæ, районон центрты рæзты фарстатæ дæр сты приоритетон.

«Къуайсайы рынчындон æмæ астæуккаг скъолайы арæзтад скъуыддзаггонд у. Ацы сæйраг социалон нысаниуæджы объекттæ хаст сты 2015-2017 азты Республикæ Хуссар Ирыстоны социалон-экономикон рæзтæн æххуысы Инвестицион программæмæ», - загъта Хуссар Ирыстоны Президент Тыбылты Леонид.
Фембæлды кæрон паддзахады сæргълæууæг бахæс кодта Хицауадæн, цæмæй сорганизаци кæна цæугæ æмбырд горæт Къуайсайы.