Nog adres

НОГ АЗ - САБИТÆН ЦИНХÆССÆГ

Алы бæрæгбон дæр йæхирдыгонау æрхæссы циндзинад æмæ хорздзинад. О, фæлæ уæддæр æмæ уæддæр Ног азы бæрæгбонмæ уæлдай æнæрхъæцæй фенхъæлмæ кæсынц сабитæ. Уый сын алкæмæй уарзондæр бæрæгбон вæййы, уымæн æмæ сын æрхæссы бирæ хорздзинæдтæ. Сабиты тынг фæфæнды тагъддæр-иу куы æрцæуид Ног аз, фæлæ уый афæдз иу хатт йедтæмæ кæй нæ вæййы, уый сæ айрох вæййы. Уæдæ ныры Ног азмæ дæр тынг æнхъæлмæ кастысты сабитæ æмæ та сæ нæ ферох кодтой нæ республикæйы разамынад дæр. алы сабийæн дæр бакодтой тынг хорз лæвар æмæ сæ райстой Ног азмæ. Ахъуыды ма кæнæм цас хорз лæвæрттæ райсынц сабитæ. Ацы хъуыддагыл чи бакусы, уыдонæн алы хатт дæр зæгъæм бузныджы, арфæйы ныхæстæ. Сывæллæттæ стыр райгондæй хастой сæ лæвæрттæ æмæ циндзинад хастой сæ ныййарджытæн дæр. Уæдæ ма уымæй хуыздæр цы хъуамæ уа Ногазы къæсæрыл.
Æмæ æрмæст лæвæрттæ нæ вæййы Ног азы, акæсæм ма нæ горæты астæу цы назбæлас ис, уымæ. Куыд тынг рæсугъд вæййы, зæрдæйæн куыд тынг æхсызгон у йæ фенд, уæлдайдæр та изæрыгон. Æрмæст сабитæ нæ фæцин кæнынц назбæласыл, фæлæ фæсивæд дæр. Уым сæ рæстæг хъæлдзæгæй фервитынц адæм, ауадзынц дзы алыгъуызон мадзæлттæ. Цас хорздзинад æрхæссы сабитæн! Митын Дада æмæ Митын чызг сывæллæттæн æрхæссы циндзинад æмæ хъæлдзæгдзинад.
Æмæ æрмæст Театралон фæзуаты нæ уыдис алыгъуызон хъæлдзæг мадзæлттæ, фæлæ алы скъолайы, алы рæвдауæндоны, алы уагдоны дæр. Бирæ хиирхæфсæн мадзæлттæ уагъд æрцыд горæты районты дæр. Ног азы къæсæрыл ма ноджы иу хорз хъуыддагмæ фенхъæлмæ кæсынц куыд сабитæ, афтæ хистæр кары адæймæгтæ дæр. Уый та сын у алы районты назбæлæстæ хуыздæр сфæлындзын. Алкæй дæр фæфæнды, цæмæй сæ Назбæлас бацахса фыццаг бынат. Ацы хъуыддагмæ сæхи фæццæттæ кæнынц тынг бирæ æмæ 31 декабры изæрæй фенхъæлмæ кæсынц кæд разилдзысты æмæ призтæ кæд райсдзысты. Ахæм хорз хъуыддæгтыл сæ рæстæг фервитынц нæ горæты сабитæ æмæ æвзонг фæсивæд. Ноджы ма призтæ куы райсынц, уæд сæхицæй бабуц вæййынц. Гъе, ахæм хорздзинæдты тыххæй уарзынц сабитæ Ног аз. Нæ зæрдæ зæгъы нæ горæты æвзонг фæлтæрæн: бирæ, бирæ азты хорз Ног азтæ æрвитæт сыгъдæг арвы бын. Макуы уæт æнкъард. Алы хатт дæр уæнт Ног азы бæрæгбонау рæсугъд, æнæниз æмæ хъæлдзæг.
ЛАЛЫТЫ Ленæ