Nog adres

ХÆСТÆ ÆХХÆСТ КÆНЫНМÆ - БÆРНОН АХАСТ

Нæ республикæйы таможнæйон паддзахадон комитетæн ныр цалдæр азы арæхстджын разамынд кæны Цхуырбаты Мурат. Ам хорз æвæрд у куысты дисциплинæ æмæ уый фæстиуæгæн алы адæймаг дæр æнкъары бæрндзинад æмæ аккаг хайбавæрд хæссынц иумиаг æнтыстмæ. Æдæппæт ам кусы 79 адæймаджы. Таможнæйæн ис дыууæ посты, уыдонæй иу ис Ручъы хъæуы,иннæ та - Цхинвалы. Бæрæг кæнынц, автомобилон фæндагыл цы уæзтæ æмæ товартæ ластæуы, уыдон. Хатт хицæн товарласджытæ къаддæр бавдисынц, цы товар сæм вæййы, уый уæз, уымæй дарддæр ма дзы вæййы æндæр уæзтæ дæр. Ацы ран цырддзастдзинад равдисынц таможнæйы кусджытæ æмæ сæ рабæрæг кæнынц. Сæ хæстæ уæлдай хуыздæр æххæст кæнынц, Цхинвалы горæты сын цы пост ис, уый кусджытæ.Уæзласæн машинæ товаримæ куы уа, уæд ын бабæрæг кæнынц йæ товар, кæд уый тыххæй æмбæлы фидын, уæд хъуамæ сæххæст кæна йæ хæс. Фæлæ вæййы ахæмтæ дæр, кæцытæ кусынц Инвестпрограммæйыл, уыдон сæрибар сты фиддонтæй, æрмæст æй фæнысан кæнынц.

Цхуырбайы фырт куыд банысан кодта, афтæмæй амæйразмæ фембæлдысты Цæгат Кавказы таможнæйон управленийы се 'мкусджытимæ. Сæ фæнд æмæ нысан у, цæмæй сæ бынат уа Ручъы нæ, фæлæ Зæрæмæджы, кусой Уæрæсейы таможнæйы сæ коллегæтимæ.
- Ацы фарст куы æрбæстон уа, уæд уæлдай зындзинæдтæ нал æвзардзыстæм, иннæмæй та нæм статистикæ дæр уыдзæн. Кæй зæгъын æй хъæуы, уый иу боны фарст нæу,йæ аскъуыддзаг кæнынæн нырма бирæ къах-дзæфтæ бахъæудзæн. Фæлæ æвæрццагæй куы аскъуыддзаг уа, уæд, ноджы ма йæ зæгъын, товартæ æнцондæрæй хынцыд цæудзысты. Æввахс рæстæджы нын ам, Цхинвалы уыдзæн æмбырд Цæгат Кавказы таможнæйон управленийы кусджытимæ æмæ уым скъуыддзаг кæндзыстæм ветеринарон æмæ фитосанитарон контролы фарстатæ нæ таможнæйон посты, - зæгъы Цхуырбайы фырт.
Алы уагдоны æнтыст дæр фылдæр баст у, йæ хъуыддаг хорз чи зоны ахæм цæттæ кадртæй. Уый хынцы ацы комитеты хистæр æмæ архайы, цæмæй уыдонæй баххæст уа. Раст у, ныртæккæ сæм сæрмагонд уæлдæр ахуырадимæ ис дыууæ специалисты, каст фесты Уæрæсейы таможнæйон Академи, фæлæ уыдон фаг не сты. Не 'мбæстæгтæй ныртæккæ 16 æвзонг адæймаджы ахуыр кæнынц Уæрæсейы æмæ цæттæ кадртæй куы æрыздæхой, уæд, æнæмæнг, стыр ахъаз уыдзысты куысты размæцыдæн.

ХУЫБИАТЫ Н.