Nog adres

РХИ-ЙЫ ПАРЛАМЕНТЫ/ Закъонмæ бахастой ивындзинæдтæ

2014 азы 14-æм майы уагъд æрцыд Республикæ Хуссар Ирыстоны Парламенты фарастæм сессийы æстæм рабадт. Рабадт уагъта РХИ-йы Парламенты Сæрдар Коцты Станислав.
Хъахъхъæнынады æмæ æдасдзинады фæдыл парламентон комитет уынаффæмæ рахаста «Паддзахадон сусæгдзинæдты тыххæй» РХИ-йы Закъонмæ ивындзинæдтæ бахæссыны тыххæй» РХИ-йы закъоны проект. Комитеты сæрдар Дудайты Эрик банысан кодта, зæгъгæ, ацы закъоны проектмæ æркастысты æмæ йæ хорзыл банымадтой РХИ-йы Хицауады рабадты. Уый здæхт у «Паддзахадон сусæгдзинæдты тыххæй» Республикæ Хуссар Ирыстоны закъоны æбæлвырддзинæдтæ æмæ ныхмæвæрдтытæ аиуварс кæнынмæ, кæцытæ баст сты паддзахадон сусæгдзинæдтæ бахъахъхъæныны къабазы æххæстгæнæг хицауиуæгады органты функцитимæ.

«Паддзахадон сусæгдзинæдты тыххæй» Республикæ Хуссар Ирыстоны Закъоны 20-æм статьяйы æмæ паддзахадон сусæгдзинæдтæ бахъахъхъæныны фæдыл æхсæнведомствойон къамисы тыххæй уагæвæрды ирдæй æвдыст æрцыдысты æхсæнведомствойон функцитæ. Къамисы æхсæнведомствойон контролмæ бахæссын Закъоны æвзæрын кæны ныхмæвæрдтытæ.
Закъоны проектыл уынаффæ кодтой комитеты рабадты æмæ йæ хорзыл банымадтой хъахъхъæнынады æмæ æдасдзинады фæдыл комитеты уæнгтæ. Закъоны проектæн йемæ ис æнæмæнгхъæуæг документтæ: РХИ-йы Юстицийы министрады экспертон хатдзæг, РХИ-йы Президенты Администрацийы паддзахадон-барадон управленийы экспертон хатдзæг, афтæ ма РХИ-йы Парламенты барадон управленийы хатдзæг. Ацы закъоны проекты среализаци кæнынæн нæ бахъæудзæн паддзахадон бюджеты фæрæзты уæлæмхас хæрдзтæ. Ацы закъоны проектыл сразы сты РХИ-йы Хъахъхъæнынады министрад æмæ РХИ-йы Æддагон развæдсгæрсты службæ.
Закъон ист æрцыд фыццаг æмæ кæройнаг бафарсты.
Закъондæттынад, закъондзинад æмæ бынæттон хæдразамынды управленийы парламентон комитеты сæрдар Диакъонты Амиран уынаффæмæ рахаста «Æнæкоммерцион организациты тыххæй» закъоны проект. Банысан чындæуыд, зæгъгæ, ацы закъоны проектыл иу æмæ дыууæ хатты нæ уынаффæ кодтой Парламенты комитеты, Президиумы æмæ ист æрцыд фыццаг бафарсты. Быцæудзинад расайдта 2-æм статьяйы 7-æм пункт. Ацы фарсты фæдыл раныхас кодтой депутаттæ Коцты Станислав æмæ Дзиццойты Юри. Кæройнаг хуызы закъоны статьяйы ацы пункт у афтæ: «Æнæкоммерцион организацийæ, кæцы æххæст кæны фæсарæйнаг партнеры функцитæ, ацы Закъоны æмбæрстгонд цæуы хуссарирыстойнаг æнæкоммерцион организаци, кæцы æхцайы фæрæзтæ æмæ æндæр исад исы фæсарæйнаг паддзахадтæй, се ‘мбæстæгтæй, æнæ æмбæстагдзинады адæймæгтæй, кæнæ се ‘ххæстбарджын адæймæгтæй æмæ (кæнæ) хуссарирыстойнаг юридикон цæсгæмттæй, кæцытæ æхцайы фæрæзтæ æмæ æндæр исад исынц бацамынд гуырæнтæй (паддзахадон хайадистæй гом акционерон æхсæнадты æмæ сæ дæлбар æхсæнадты йедтæмæ) (дарддæр - фæсарæйнаг гуырæнтæ)».
Закъон ист æрцыд дыккаг æмæ кæройнаг бафарсты.
Ацы комитет ма уынаффæмæ рахаста 2014-2018 азты РХИ-йы къухдариуæггæнæг кадрты резерв бацæттæ æмæ ногæй бацæттæ кæныны Программæйы проект. Программæ РХИ-йы Президент арвыста Парламентмæ, йемæ æрвыст æрцыдысты экспертон хатдзæгтæ дæр. Программæмæ æркастысты РХИ-йы Парламенты профилон комитеты æмæ Президиумы.
Ацы документ арæзт æрцыд паддзахадон управлени дарддæр баххæст кæныны нысанæн. Республикæ Хуссар Ирыстоны Президенты Администраци сорганизаци кодта кадрты резервы бæрæггæнæнты бындур саразыны фæдыл куыст, цыран ис Республикæ Хуссар Ирыстоны Президенты дæлбар резервы тыххæй информаци, æмæ республикон резерв, кæцымæ хаст æрцыдысты æххæстгæнæг хицауиуæгады паддзахадон органты, ахуырадон уагдæтты, архайды алыгъуызон къабæзты паддзахадон организациты рекомендацигонд адæймæгтæ.
Ацы фарсты фæдыл раныхас кодтой депутаттæ Кокойты Геннади æмæ Дзигойты Маринæ, РХИ-йы Парламенты барадон управленийы хистæр Бесаты Зитæ. Фылдæр хъæлæстæй Программæ ист æрцыд.
Сессийы куысты хайад райстой РХИ-йы Юстицийы министр Уанеты Мурат, Паддзахадон Æдасдзинады комитеты сæрдар Щаргаев Виктор, РХИ-йы æнæхицауадон организациты минæвæрттæ Цхуырбаты Лирæ æмæ Æлборты Динæ.
Республикæ Хуссар Ирыстоны Парламенты
информацион-аналитикон центр