Nog adres

Цымыдисон мадзал Уæлахизы боны цытæн

 291.jpg
Стыр Уæлахизы бон... Цæй бирæ рæстæг хъуыд æнхъæлмæ кæсын ацы бонмæ. Бирæ мингай адæймæгтæ Стыр Фыдыбæстæйон хæсты сæ удтæ рауæлдай кодтой сæ Райгуырæн бæстæйы сæрвæлтау.
Рацыдис 69 азы Стыр Уæлахиз куы ‘рбалæууыд, уыцы бонæй. Куыд раздæры Советон цæдисы цæрæг адæмтæ, афтæ ирон адæм дæр æрвылаз фæнысан кæнынц Уæлахизы бон. Адæм кæд ацы боныл тынг фæцин кæнынц, уæддæр æй фæхонынц цæссыгимæ бæрæгбон. Уымæн æмæ æрымысынц, хæсты быдыры чи фæмард сты, уыдоны рухс нæмттæ дæр.
Ацы бонты нæ республикæйы уагъд цæуынц Уæлахизы боны цытæн алыгъуызон мадзæлттæ. Уыдонæй иу - бæрæгбонон концерт ауагъд æрцыдис 5-æм майы Профцæдисты хæдзары æмбырдгæнæн залы. Бацæттæ йæ кодта Хуссар Ирыстоны паддзахадон университет. Хайад дзы райстой куыд ХИПУ-йы студенттæ, афтæ ма Уæрæсейы 4-æм æфсæддон базæйы службæгæнджытæ дæр. Уыдон иумæ бацæттæ кодтой æмæ сæххæст кодтой алыгъуызон хæстон, уæлахиз æмæ сабырдзинадыл дзурæг зарджытæ.
Бæрæгбонон мадзал бацæуæн ныхасæй байгом кодтой йæ амонджытæ Хъоцыты Сергей æмæ Тедеты Ельзæ, уыдон æрдзырдтой бæрæгбоны нысаниуæгыл, цы стыр зиæнттæ бакодта Фыдыбæстæйон хæст æмæ афтæ дарддæр. Бæрæгбонон мадзалы программæйы фыццаг музыкалон номыр уыдис, «Вальс» кæцыйы сæххæст кодтой ХИПУ-йы студенттæ.

Уый фæстæ сценæйыл æххæст цыдысты иннæ музыкалон номыртæ дæр: Константин Симонов «Темная ночь», Елдзарты Дианæ æмæ Коцты Лорæ «Здесь птицы не поют», Джиоты Снежаннæ «Опустела без тебя земля», Быценты Ма-динæ «Журавли», Кирилл Сафанов «О земле», Икъаты Миленæ «Алеша», Гатыгкоты Каринæ «Не забывайте», Олег Нищенко «Союз», Анатолий Дючков «Виват Победа», Елдзарты Дианæ æмæ Джиоты Дианæ «Катюша», ХИПУ-йы кафты ансамбль «Сæр-мæт» та сæххæст кодтой цалдæр ирон кафты, концерты ма хайад райстой Цхинвалы районы администрацийы культурæйы хайады ансамбль «Амонд», сæххæст кодтой «Хæххон» кафт.
Бæрæгбонон мадзалы æрæмысыдысты, уыцы уæззау азты хæсты быдыры чи фæмард сты, уыдон рухс нæмттæ иу уысм æнæсымæй алæугæйæ.
Бæрæгбонон изæрмæ хуынд æрцыдысты Уæрæсейы Федерацийы Хуссар Ирыстоны æххæстбарджын минæвар Медойты Димитр, Баливайраг Республикæ Венесуэлæйы æххæстбарджын минæвар Хуссар Ирыстоны Хуан Висент Парадес Торреальбо йе ‘мкъаимæ, РХИ-йы Хицауады Сæрдары хæдивæг Пухаты Ерик, афтæ ма ХИПУ-йы ахуыргæнджытæ æмæ Уæрæсейы 4-æм æфсæддон базæйы службæгæнджытæ.
Концерт рауадис цымыдисон æмæ хъæлдзæг, сценæмæкæсджытæ баззадысты райгондæй.
Кæронбæттæны арфæ æмæ бузныджы ныхæстæ загъта нæ университеты ректор Тедеты Вадим:
- Нæ республикæйы алы цæрæг дæр хорз зоны, нæ паддзахады сæйраг атрибуттæй сæ иу нæ университет кæй у. Йæ иу хай сыгъд кæй у, уымæ гæсгæ уал не студенттæ рæстæгмæ æййафынц зындзинæдтæ, нæй сын ахуыр кæнынæн æмбæлон техникон фæрæзтæ æмæ уавæртæ, фæлæ уыдон тагъд рæстæджы иуварсгонд æрцæудзысты нæ республикæйы æмæ Уæрæсейы къухдариуæггæнджыты руаджы. Æз не студентты абоны аивадон архайдæй, баззадтæн райгондæй, мæнæн ма тынг æхсызгон у Уæрæсейы 4-æм æфсæддон базæ дæр немæ æмгуыст кæй кæны, уый. Иумæ бацæттæгонд мадзæлттæй абоны концерт у дыккаг, бафæнддзæнис мæ, цæмæй дарддæр дæр æмгуыст кæнæм.
Арфæйы ныхæстæ загътой 4-æм æфсæддон базæйы службæгæнджытæ дæр.
ТУАТЫ Ларисæ