Nog adres

Козаты Исидоры мысгæйæ

DSC06226.JPG
24-æм апрелы горæт Цхинвалы скъола-интернаты уагъд æрцыд зынгæ ирон поэт Козаты Исидоры номарæн изæр, кæцыйы райгуырдыл ацы аз 3-æм майы æххæст кæны 85 азы. Мадзал сорганизаци кодтой РХИ-йы телекомпани «ИР»-ы авторон алæвæрдты редакци.
Уырдæм æрбамбырд сты фысджытæ, интеллигенцийы минæвæрттæ, нæ горæты скъолаты ирон æвзаджы ахуыргæнджытæ, поэты хиуæттæ, скъолаудзаутæ.
Юбилейон изæр бацæуæн ныхасæй байгом кодта æмæ мадзал амыдта телерадиокомпани «ИР»-ы уацхæссæг Джиоты Оксанæ. Уый цыбыртæй æрдзырдта поэты цардвæндаг æмæ сфæлдыстадыл: «Козаты Исидор райгуырд 1929 азы 3-æм майы Знауыры районы Хъорнисы хъæуы. Исидоры хæрз чысылæй фæцахуыр кодтой фæллой кæнынл йæ бирæсывæллонджын ныййарджытæ. Уый ахуырмæ разынд хæрзæвзыгъд æмæ Хуссар Ирыстоны паддзахадон институты ахуыр кæнгæйæ, уайтагъд йæ хорз ахуыры тыххæй йæхимæ æркæсын кодта институты лекторты, ахуыр кодта иттæг хорз, хайад иста æхсæнадон царды дæр. Институт каст фæуыны фæстæ йæ кусынмæ ныууагътой ацы уагдоны ирон æвзаджы ахуыргæнæгæй.
Козаты Исидор куыста бирæ бæрнон бынæтты. Куыд зæгъæм, Хуссар Ирыстоны радиокомитеты сæйраг редакторæй, газет «Советон Ирыстон»-ы редакцийы культурæйы хайады сæргълæууæгæй æмæ газеты бæрнон нымæрдарæй. Дыууæ хатты æвзæрст æрцыд Хуссар Ирыстоны фысджыты цæдисы сæрдарæй».

Уый фæстæ ныхасы бар радта Ирыстоны Фысджыты æмсæрдар Хъазиты Мелитонæн. Уый лæмбынæг æрдзырдта фыссæджы цард æмæ сфæлдыстадыл. «Козаты Исидоры сфæлдыстад тынг хъæздыг у. Уый иу æмдзæвгæйæ иннæмæ хызт, куыд Ирыстоны иу бæрзæндæй иннæмæ, афтæ. Йе мдзæвæгты æвдыст цæуы йæ радтæг Ирыстоны æнæкæрон уарзтæй кæй уарзта æмæ сæ равдыста æцæг цард æрмæстæдæр кæй ис Райгуырæн уæзæгыл. Уымæн фыссы йæ иу æмдзæвгæйы афтæ, зæгъгæ: Зæххыл куынæ уыдаид Ир, уæд дуне уаид къахыр.
Сфæлдыстадон куыстæн Исидорæн рæстæг фаг никуы уыд æмæ-иу бирæ хатт сихор кæнын рæстæджы дæр къухсæрфæн гæххæттыл афыстаид йе ‘мдзæвгæйы бындур. Курдиатджын поэт йæ мадыл дæр ныффыста кадæг. Йæ иу æмдзæвгæйæ та йын гæнæн ис афтæ зæгъæн æмæ йын кæй у шедевр. Зын у Исидоры хуызæн адæймæгты тыххæй ивгъуыды дзурын. Кæд йе сфæлдыстад ахуыргæнæн чингуыты хицæнæй фыст нæу, уæддæр ныр программæмæ хаст æрцыд», - банысан кодта Фысджыты цæдисы æмсæрдар.
Уый фæстæ та раныхас кодта профессор Плиты Гацыр: «Козаты Исидоры тыххæй бирæ дзурæн ис. Мæ размæ ахуыр кодта институты æмæ йæ уæдæй фæстæмæ зонын. Кæддæриддæр йæ уд йæ дзæцц уыдысты йæ Ирыстон æмæ ирон адæм. Исидор поэзийы жанры цы бакуыста, уыдон абон дæр актуалон сты æмæ сæ ахуыр кæнын хъæуы. Абайты Васо ирон фынджы академи хуыдта æмæ æцæгæйдæр афтæ у, Исидоримæ адæймаг фынгыл бадынæй дæр не ‘фсæсти, йæ ацыд æмæ йе рбацыд дæр æгъдауыл уыдысты. Козайы фырт йæ фæстæ цы бынтæныууагъта, уыдон æй рох кæнын нæ бауаддзысты. Æвæццæгæн, адæймаг развæлгъау йæ адзал фæзоны, ууыл дзурæг у Исидор Мæскуыйы рынчындоны цы æмдзæвгæтæ ныффыста, уыдон ын кæй сты иууыл зæрдæмæхъаргæдæр. Козаты Исидор фæдзæхста, зæгъгæ, куы амæлон, уæд-иу мæ баныгæнут мæ уарзон Хъорнисы»- банысан кодта Плиты Гацыр.
Уый фæстæ та поэты цард æмæ сфæлдыстады тыххæй зæрдæмæхъаргæ ныхæстæ загъта поэт Бахъаты Нугзар: «Бузныг дзурын ацы мысæн изæр чи сорганзиаци кодта, уыдонæн. Æцæгæйдæр, Исидоры ацыд ирон литературæйæн уæззау цæф уыдис. Йе сфæлдыстад у сыгъдæг лирикæ, йæхæдæг та уыд стыр адæймаг. Адæймаг фыццаг поэт ма хъуамæ уа, адæймаг фыццаг адæймаг хъуамæ уа». Бахъаты Нугзар Исидоры тыххæй бакаст йæхи фыст æмдзæвгæ «Хæлары мысгæйæ», зæгъгæ.
Фыссæг Харебаты Леонид дæр бирæ хъарм ныхæстæ загъта курдиатджын поэт æмæ æмгары тыххæй: «Козаты Исидоримæ иумæ ахуыр кодтам, æцæг уый институт каст фæцис сырх дипломыл. Уыд тынг æнæхин æмæ æмгаруарзаг адæймаг. Йе ‘мдзæвгæтæн сæ фылдæр фыст сты йæ радтæг Ирыстоны тыххæй, æвдисы сæ цахæм стыр уарзтæй йæ уарзта, уый. Исидоры амæлæты фæстæ йын йе ‘мдзæвгæтæ æрæмбырд кодта йе фсымæр Хазби æмæ йын сæ хицæн чиныгæй руагъта, кæцытæ сты мидисджын».
Исидоры тыххæй йæ мысинæгтæ радзырдта РХИ-йы сгуыхт журналист, ХИПУ-йы ахуыргæнæг Туаты Шота дæр: «Исидор йæхæдæг куыд загъта, зæгъгæ, æнæ Ирыстон дуне уыдаид къахыр, афтæ æз та Исидоры тыххæй зæгъын, Ирыстон æнæ Исидор къахыр кæй у, уый. Æз æмæ Исидор газет «Советон Ирыстон»-ы редакцийы иумæ бирæ азты дæргъы бакуыстам æмæ тынг хорз зонын уый куыд диссаджы адæймаг уыд, уый. Курдиатджын поэт, æцæг адæймаг. Афтæ æнæхин уыд æмæ йæ никуы никæйы æвзæр бафæндыд, Йе ‘мкусджытæй алкæмæндæр уыд æцæг хæлар. Амард бынтон æнæнхъæлæджы, йæ тæккæ сфæлдыстадон тæмæны бацæугæйæ, фæлæ Исидоры хуызæттæ нæ мæлынц», - банысан кодта Туаты Шота.
Юбилейон изæры Козаты Исидоры фыст æмдзæвгæтæ бакастысты 12-æм скъолайы ахуыргæнинæгтæ Санахъоты Анжела æмæ Джиоты Азæмæт, афтæ скъола-интернаты ахуыргæниæнгтæ Козаты Виолеттæ, Хъæцæмæзты Кристинæ, Габадты Сæрмæт, ХИПУ-йы 1-æм курсы студенттæ Хуыбылты Каринæ, Хъоцыты Моникæ, ирон кафт та сæххæст кодта Елойты Георги. Афтæ ма сывæллæттæ сæххæст кодтой поэты æмдзæвгæтыл фыст зарджытæ.
Мадзалы кæрон Козаты Исидоры хиуæттæ - йæ чындз Мананæ æмæ йæ хъæбулы хъæбул Дианæ бузныджы ныхæстæ загътой мадзалы организатортæ æмæ залмæ æрбацæуджытæн.
Банысан кæнын хъæуы уый дæр, æмæ Исидоры хъæбулы хъæбултæ, Козаты Дзерассæ æмæ Дианæ абон кæй лæггад кæнынц ирон журналистикæйæн.
Козаты Исидорæн нæ бантыст йæ рæсугъд фæндтæ кæронмæ сæххæст кæнын, йæ зарæг æрдæгыл фескъуыд бынтон æнæнхъæлæджы 57-аздзыдæй 1986 азы. Ноджыдæр рухсаг у!
ДЖИОТЫ Е.
КОКАЙТЫ З.