Nog adres

Æрæвнæлдтой йæ цалцæг кæнынмæ

DSCF3925.JPG
Нæ горæты уазæгдон «Ирыстон»-ы ветерантæн йæ рæстæджы рахицæн кодтой иу хатæн. Ам уыдонæн фадат уыд шахмæттæ, шашкæтæ æмæ æндæр ахæмтæй сæхи ирхæфсынæн, истой бынæттон газеттæ æмæ зонгæ кодтой нæ республикæйы æрцæугæ хабæрттимæ. Уымæй дарддæр ма ам зæрдылдарæн бонты уагъдæуыд ерыстæ спорты уæлдæрæрхæсгæ хуызтæй, уæлахиздзаутæ æмæ призон бынæттæ чи ахста, уыдон та цытджын æгъдауæй хорзæхджын цыдысты алыгъуызон лæвæрттæй.
Фæлæ зæгъын хъæуы, хатæн дзуапп кæй нæ лæвæрдта сæ домæнтæн, уымæн æмæ цалцæггæнинаг уыд. Уавæр бахынцыд æрцыд æмæ йæ цалцæг кæнынмæ æрæвнæлдтой. Раст зæгъгæйæ, аразджытæ мæгуырау нæ куыстой, се 'рмдзæф бæрæгæй разынд фæлæ сын кæронмæ нæ бантыст. Йæ аххосаг уыд, финансон фæрæзтæй кæй фæцух сты, уый æмæ ныр афæдз æмæ æрдæг æрдæгарæзтæй баззад. Кæй зæгъын æй хъæуы, йæ рæстæг ацы бынаты чи æрвыста, уыдон æнæрхъæцæй æнхъæлмæ кæсынц йæ сырæзтмæ, фæлæ сын сæ къух рог кæныныл ничи тыхст.

Æрæджы горæты ветеранты Советы сæрдар Гобозты Æхсар бахатыд нæ республикæйы Уæлвæткон уавæрты фæдыл министры хæстæ æххæстгæнæг Бибылты Анатолимæ, цæмæй се 'нцой балæууа æмæ сын баххуыс кæна ацы хатæн кæронмæ сцалцæг кæнынæн. Бибылы фырт ныфс бавæрдта йе сцалцæг кæнынæй. Æмæ, æцæгдæр ацы бонты ам аразджытæ æххæст кæнынц арæзтадон цалцæггæнæн куыстытæ, куыд зæгъынц, афтæмæй йæ ахицæн кæндзысты æввахс рæстæджы æмæ та нæ ветерантæн фадат уыдзæн сæ сæрибар рæстæг æрвитынæн. Уый тыххæй бузныг зæгъынц Бибылы фыртæн.
ХУЫБИАТЫ Н.