Nog adres

Цæгат Ирыстоны

pocshta.jpg
МЫХУЫРЫ ФÆРÆЗТÆ - ЗЫН УАВÆРЫ
Бæрæг куыд у, афтæмæй 2014 азы дыккаг æмбисæн Уæрæсейы мыхуыры фæрæзтæ рафыссыны æргътыл бафтыд иу ахæм. Республикон газетты сæйрагдæртæ «Рæстдзинад» æмæ «Северная Осетия»-йæн кæд нырмæ дæр сæ аргъ фондзсæдæ соммæ æввахс уыд æмæ сæ адæм зынтæй фыстой, уæд ныр та сæ рафыссыны аргъ уыдзæн 960 сомы. Æмæ уый афтæ хъыгаг нæ уаид, уыцы æхцайæн йе 'мбис газетæн уæддæр куы заид, фæлæ уыдонæй газетæн дæтдзысты æрмæстдæр 109 сомы. Ома, фыдæбон дзы чи кæны, уыдон нымайгæ дæр ничи кæны, фæлæ цæттæ газет адæммæ чи фæхæццæ кæны, йæ хъаймагъ ын уыдон хæрынц. Газетты та кусынц, зæгъæн ис, къапеччытыл. Нал ис, æгæрмæгуыр, гонорар дæр. Зындгонд куыд у, афтæмæй газеттæ фыссынц фылдæр пенсиисджытæ, ныр ма сæ кадавар пенсийы муртæй уыцы æргътæй цавæр газеттæ хъуамæ рафыссой? Иуныхасæй, мыхуыры фæрæзтæ æрлæууыдысты сæрсæфæны былыл. Ууыл уыд сæ ныхас Цæгат Ирыстоны Парламенты ахуырад, культурæ æмæ информацион политикæйы комитеты æмбырды. Архайдтой дзы горæты æмæ районты газетты редактортæ, журналисттæ, «Почта России»-йы республикæйы регионалон хайады разамонджытæ.

Парламенты информацион технологитæ æмæ коммуникациты комитеты сæрдар Дзансолты Сослан йæ раныхасы куыд загъта, афтæмæй газет рафыссыны тарифтæ афтæ цæхгæр кæй сгæпп кодтой, уымæн афтæ ныууадзæн нæй. Уыимæ посты лæггæдты куыст нæу æмбæлгæ æмвæзадыл. Бирæ хъæутæм газет нæ бахæццæ вæййы цалдæргай бонтæм, афтæмæй уыцы лæггæдты æргътæ рæзынц æнæсцухæй. Хъæуы рæстæгыл исты ахадгæ мадзæлттæ райсын, цæмæй республикæйы бюджет газет рафыссыны иу хай йæхимæ уæддæр айса. Дзансолы фырт ма куыд бафиппайдта, афтæмæй ахъуыды хъæуы газет адæммæ альтернативон хуызы хæццæ кæныныл. Æмбырды архайджыты иумæйаг хъуыды уыд афтæ: газетыл бирæ фыдæбон кæнынц редакциты кусджытæ, уацхæсджытæ, йæ пайда та йын хæрынц посты кусджытæ. Уымæ гæсгæ уыцы хъуыддаг хъуамæ равзарой республикæйы Федералон антимонополон комитет, прокуратурæ, контролон-ревизион органтæ. Депутаттæ ма бацæттæ кодтой сидт нæ бæстæйы Хицауады Сæрдар Дмитрий Медведевмæ, УФ-йы Президенты Æххæстбарджын минæвар Цæгат Кавказы Александр Хлопонинмæ æмæ «Почта России»-йы разамындмæ, цæмæй уавæр равзарой.

ХЪЫРЫММÆ - НОГ РЕЙС
Хъырыммæ, Симферополмæ Цæгат Ирыстонæй арæх чи цæуы, уый зоны, уырдæм куыд зын бафтæн у, уый. Уымæн æмæ йæм комкоммæ поезд никуы цыдис. Раздæр азты ма-иу сæрды æртæ мæйы Минводæй Симферополмæ цыд комкоммæ поезд денджызон сезоны тыххæй, уыцы рейс дæр фæстаг æртæ азы æхгæд æрцыд. Ныртæккæ уырдæм ацæуыны тыххæй хъæуы Минводмæ ацæуын, уырдыгæй Днепропетровск, кæнæ Харьковмæ ацæуын, уырдыгæй та - Симферополмæ. Адæймаг æртæ бонмæ хæстæг фæндæгтыл баззайы. Ныр рæхджы уыцы хъуыддагæн кæрон æвæрд æрцæудзæн. Федералон пассажирон компанийы Цæгат Кавказы филиалæй куыд фехъусын кодтой, афтæмæй конд æрцæудзæн уæлæмхасæн рейс «Владикавказ - Анапа». Хъырыммæ чи цæуа, уыдонæн Анапайæ сæ бон уыдзæн денджызы сæрты Керчмæ бахизын, уый та у чысыл дæрддзæг. Ацы рейс тынг актуалон кæй уыдзæн, уый уырны компанийы разамонджыты. Уымæн æмæ Хъырыммæ нырмæ дæр бирæ адæм цыд, ныр Уæрæсейы иу хай куы ссис, уæд но-джыдæр рапарахат уыдзæн æмгуыстад, культурон бастдзинæдтæ. Уымæй дарддæр ма æфсæнвæндаджы компани фæнд кæны рейс «Симферополь - Ростов» -ы кæройнаг станцæ Кисловодскмæ рахæссын. Дзæуджыхъæуæй та уырдæм прицепæй æрвитын вагæттæ Хъырымы бæлцæттимæ æмæ сæ уыцы поездыл бафтауын. Ацы дыууæ рейсы уал компанийы кусджытæ аразынц фæлварыны хуызы курортон сезоны, фæлæ сæ уырны, се 'хгæныны сæр сæ кæй нæуал бахъæудзæн.

ДЗÆУДЖЫХЪÆУ - ЦЪÆХВÆЛЫСТЫ ГОРÆТ
Дзæуджыхъæуы цы бирæ акцитæ æмæ программæтæ арæзт цæуы, уыдоны руаджы горæты цъæхвæлыст хъæздыгдæр кæны. Æрвылаз сагъд æрцæуы бирæ бæлæстæ, декоративон къутæртæ, дидинджытæ… 2013-2015 азтæн цы программæ арæзт æрцыд, «Посади свое дерево», зæгъгæ, æрмæст уый фæлгæтты ивгъуыд аз сагъд æрцыд дыууæ мины хихджын бæлæстæ, æртæ мины сыфтæрджын бæлæстæ æмæ дыууын мины бæрц декоративон къутæртæ. Уымæй дарддæр арæзт цæуынц улæфæн бынæттæ Терчы былгæрæтты. Кæмдæриддæр цæугæдоны былтыл фæзуат амыдта, уымыты арæзт æрцыдысты улæфæн парктæ: бæлæстæ, дидинджытæ, бандæттæ, сывæллæтты хъеллаугæнæнтæ, хæрæндæттæ æмæ бирæ æндæр хиирхæфсæнтимæ. Ныртæккæ ахæм парк арæзт цæуы Китайаг фæзы Терчы был. Арæзтад райдыдта ацы бонты. Куыд зæгъынц, афтæмæй ацы проектæн Уæрæсейы аналогтæ нæй. Æппæт уыдæттæ нымайгæйæ, конкурсы бæрæггæнæнтæм гæсгæ, Дзæуджыхъæу йæ цъæхвæлыстæй Цæгат Кавказы бацахста фыццаг бынат. Специалисттæ куыд сбæрæг кодтой, афтæмæй горæты цъæхвæлысты фæзуатæй иу адæймагмæ хауы 73 квадратон метры, зæгъæм, уыцы нымæц Мæскуыйы у æрмæстдæр 14 квадратон метры, Налцыччы - 41, Сочийы - 24, Краснодары - 49 æмæ афтæ дарддæр. Хъыгагæн, ахæм рæсугъддзинадæн алчи аргъ нæ кæны æмæ сæ сафынц.

ÆХГÆД ÆРЦЫД «НАМЫСЫ АЛЛЕЯ»
Æрæджы горæты бынæттон администрацийæ куыд фехъусын кодтой, афтæмæй Дзæуджыхъæуы «Намысы аллея» 2014 азы марты мæйæ официалон æгъдауæй æхгæд æрцыд. Йæ аххосаг у, дарддæр дзы мæрдтæ æвæрæн кæй нæуал ис, уый. Куыд зонæм, афтæмæй Ирыстоны зынгæ адæймæгты ивгъуыд æнусы стайæм азты онг æвæрдтой Ирыхъæуы ирон аргъуаны фарсмæ. Уым сты Къоста, Байаты Гаппо, Хъулаты Хъуыбады, Дæбе æмæ бирæ æндæртæ. Ныр æртын азы бæрц уыцы уаз бынат хаст æрцыд «Намысы аллея»-мæ. Фæстаг хатт ма дзы йе 'нусон бынат ссардта зындгонд богал Къудухты Бесик. Ритуалон лæггæдты муниципалон куыстуаты директор Цхуырбаты Сергей администрацимæ цы куырдиат балæвæрдта, уым загъд ис, аллеяйы афтид бынаты фæзуат нырма дардыл кæй у, фæлæ йын бæлвырд аххосæгтæм гæсгæ ауæрæхдæргæнæн кæй нæуал ис. Специалистты басгæрсты бæрæггæнæнтæ куыд равдыстой, афтæмæй аллеяйы фарсмæ афтид зæххы фадыгыл цæуынц инженерон-техникон коммуникацитæ æмæ дзы уый аххосæй дарддæр пайдагæнæн нал ис.
Нæ уацх.