Nog adres

Æндидзынад/ КУСЫНЦ ФÆНДАДЖЫ АРÆЗТАДЫЛ

DSCF3858.JPG
Цы ис хæрзвадат фæндагыл цæуынæй хуыздæр. Уый удæнцой у куыд автомашинæты хицæуттæн, афтæ бæлццæттæн дæр. Уымæ гæсгæ фæндæгты арæзтад, се схæрзарæзтад кæнынмæ нæ республикæйы фæстаг рæстæджы здæхтæуы хуыздæр хъусдард æмæ цасдæрбæрцæй рогдæр кæны цæрджыты къух.
Ацы ахсджиаг æмæ æнæмæнгхъæуæг куыстытæ сæйраджыдæр кæны «Дорэкспострой» -ы коллектив æмæ сын æнтысгæ дæр кæны. Фаг сæм ис алыгъуызон техникæ, чи сыл кусы, уыдон сты сæ хъуыддаджы арæхст-джын специалисттæ æмæ сæ разылæууæг хæслæвæрдтæ дæр ахицæн кæнынц æнæзæрдæхудтæй. Цух не сты кусæгдыхæй дæр. Генералон директор Лалыты Мураты куы бафарстон ацы азы сæйрагдæр куыстытæй, уæд мын афтæ радзырдта:
- Республикæ Хуссар Ирыстоны социалон-экономикон рæзты Инвестицион программæмæ хаст æрцыд Дменис-Бихъары фæндаг дæр. Фæндаджы дæргъ æдæппæт у 23 км æмæ 665 метры æмæ нын уыцы дæрддзæгæй ацы аз аразинаг ис 18 км æмæ 419 метры. Кæй зæгъын æй хъæуы, уый чысыл куыст нæу, фæлæ нæ коллектив нæ тæрсы зындзинæдтæй æмæ бацархайдзæн уыцы хæс рæстæгыл æмæ гъæдджынæй сæххæст кæныныл. Ис нын график æмæ кусæм уымæ гæсгæ, - зæгъы Лалыйы фырт. Уыцы куыстытæ бакæндзысты октябры мæйы фæудмæ.

Проектмæ гæсгæ хицæн бынæтты фæндаг у бынмæ хауд æмæ йыл схæцын бахъæудзæн 80 м хæрдмæ. Аххосджын сты, уымæй размæ йыл чи куыста, уыдон. Ныртæккæ арæзтады кусы 3 экскаватор, 2 бульдозер æмæ 60 та - кусджытæ æмæ æххæст кæнынц æндæр æмæ æндæр куыстытæ. Иутæ хуыздæр кæнынц фæндаджы был-гæрæттæ, æвæрынц доны хæтæлтæ æмæ афтæ дарддæр. Сæйраг куыст райдайыны агъоммæ фæндагыл калдæуы хуыр, æмбæлон техникæ йæ алæгъз кæны æмæ æрнæмы.
Куыддæр боныгъæд фæхуыздæр уа, афтæ æрывналдзысты асфальт кæнынмæ, сæвæрдзысты йыл дыууæ цъары. Фыццаг цъар сæвæрынæн сæ хъæуæг æрмæг бахъæудзæн 19 мин æмæ æрдæг тоннæ, дыккаг цъарæн та бахардз кæндзысты 14 мин тоннæ, битум балхæдтой 1,5 мин тоннæйы бæрц. Бынаты сын резервуартæ кæй нæй, уый тыххæй сæ ласдзысты Дзæуджыхъæуæй, куыстытыл куыд тых кæной, афтæ. Асфальты завод æмæ дурцъæлгæнæн цехтæ сты нæ республикæйы æмæ сын уый ахъаз уыдзæн куыстытæ æнæкъуылымпыйæ æххæст кæнынæн.
Зæгъын хъæуы, Транскамы автомобилон фæндаджы хуссар хай кæй æрцыд мæгуырау уавæрмæ. 2008 азы августы хæсты фæстæ фæндаджы арæзтадмæ 2009 азы æрæвнæлдта Уæрæсейы «Спецстрой». Æргом зæгъын хъæуы, аразджытæ не’ нкъардтой фаг бæрндзинад æмæ бакодтой фауддзаг куыст, йе 'мгъуыдмæ дæр нæ фæлæууыд, афтæмæй æрцыд мæгуырау уавæрмæ. Йæ цалцæг кæныны тыххæй «Дорэкспострой»-мæ уый бæрц фæрæзтæ нæй, фæлæ нæ республикæйы хицауады æххуысы руаджы хуссар хайы 58 км хъуамæ иуцасдæр бацалцæджытæ кæной. Уый фæстæ 2015 азы проектон-сметæйон документаци æмæ экспертизæ йын арæзт куы æрцæуа, уæд хъуамæ бахауа Инвестицион программæмæ, цæмæй æрцæуа капиталон цалцæг.
ХУЫБИАТЫ Н.