Nog adres

Къуыдаргомы цæрджыты ифтонг кæнынц дзулæй

Нæ республикæйы районты æмæ хъæуты цæрджытæ фæстаг цалдæр азы дæргъы цы социалон проблемæйыл æмбæлдысты - дзулæй ифтонгкæнынад, уый иуварс цæуы цадæггай. Фæстаг фондз-æхсæз азы дæргъы республикæйы районты, хъæуты нæ горæтты дзулфыцæн комбинат ифтонг кæны йæ рауадзгæ продукцийæ. Ацы комбинат фæстаг рæстæджы стыр хæрзиуæгон хъуыддаг сарæзта - дзулæй ифтонг кæны Къуыдаргомы цæрджыты дæр. Уыдон дæргъвæтин рæстæджы тыхстысты, сæ горæты дзулфыцæн цех йæ куыст кæй æрурæдта, уый тыххæй.
Цахæм уавæртæ арæзт æрцыд ацы фарст аскъуыддзаг кæныны тыххæй, уый тыххæй нын радзырдта нæ республикæйы дзулфыцæн комбинаты директор Цхуырбаты Вадим. Уый куыд банысан кодта, афтæмæй æхсæз азæй фылдæр районтæм ласынц дзул. Фыццаг райдыдтой дзул ласын Дзау, Знауыр æмæ Цхинвалы районтæм. Алы аласты фæстæ дæр фæфылдæр кæнынц, цы бынæттæм ласынц, уыдоны нымæц. Хъыгагæн, иууыл къаддæр дзул ласт цæуы Ленингоры районмæ объективон аххосæгтæм гæсгæ.

«Къуайсайы горæты администрацийы къухдариуæгадимæ баныхæсты фæстæ, цыранмæ мæхæдæг сæрмагондæй æртæ хатты бацыдтæн, иумиаг æвзаг кæд не ссардтам, уæддæр, ацы фарст скъуыддзаг æрцыд. Уыдон нын дзул уæй кæнынæн нæ рахицæн кодтой магазин, иунæг уæйгæнæн бынат дæр нын нæ радтой, фæлæ æппæт уыцы зындзинæдтæм нæ кæсгæйæ, мах абон аскъуыддзаг кодтам ацы проблемæ. Рахицæн кодтам сæрмагонд дзулласæн машинæ, ис ын сæрмагонд шофыр, уымæн бахæс кодтам, цæмæй цæуа æмæ дзул уæй кæна, цы уæйгæнæн бынæттæ ссардтам, уымыты. Сарæзтам график, йæ саразынæн нын баххуыс кодта горæты администрацийы сæрдары хæдивæг Æлборты Леонид. Йæ рады нын уый баххуыс кодта уæйгæнæн пункттæ саразыны хъуыддаджы æмæ уыцы æххуысы фæрцы фарст скъуыддзаг æрцыд. Æрмæст Къуайсайы цæрджыты нæ ифтонг кæнæм дзулæй, фæлæ ма æввахс хъæуты цæрджыты дæр. Къуыдаргоммæ ласт æрцæуы 400 дзулы бæрц. Уыдонимæ ма вæййынц кондитерон продукттæ дæр, куыд фехъуыстам, уымæ гæсгæ сæ зæрдиагæй æлхæнынц бынæттон цæрджытæ. Дзулимæ абаргæйæ, кондитерон продукттæн сæ аргъ кæд фылдæр у, уæддæр сæ æфтиаг æмхуызон вæййы. Дзул уæй цæуы, ам, махмæ, горæты цы аргъæй уæй цæуы, уыцы аргъмæ -13 соммæ», - банысан кодта Цхуырбайы фырт.
Дзулфыцæн комбинат ласыны хæрдзтæ æхгæны йæхи тыхтæй. Къуыдаргомы цæрджытæ тынг райгонд кæй сты, уый тыххæй бирæ бузныджы ныхæстæ ис фехъусæн Къуайсайы цæрджытæй. Цхуырбаты Вадим нын куыд фехъусын кодта, афтæмæй Къуайсамæ дзул ласынц къуыри æртæ хатты: къуырисæр, æртыццæг æмæ майрæмбоны. Куы бахъæуа, уæд график ивд æрцæудзæн æмæ алы бон дæр ласт цæудзæн Къуыдаргоммæ дзул. Афтæ ма кондитерон продуктты ассортимент æмæ бæрц дæр фæфылдæр кæндзысты бахъуыдыйы рæстæджы. Ныртæккæ уырдæм ласт цæуы фондз хуызы кондитерон продукци. Вадим куыд банысан кодта, афтæмæй ахуыр цæуынц фæлхасгæнджыты домæнтæ.
Горæт Къуайсайæн йæхицæн уыдис дзулфыцæн цех, цыран кодтой хæрзад æмæ хæрзгъæд дзул. Ныртæккæ дзулфыцæн цех капиталон цалцæггæнинаг у. Æмæ уымæ гæсгæ иу афæдзы дæргъы цех йæ куыст нал кæны. Банысан кæнын хъæуы уый, æмæ ацы дзулфыцæн цех уыд хицæн амалиуæггæнæджы æмæ, уымæ нæ кæсгæйæ, Цхуырбаты Вадим куыд загъта, афтæмæй-иу уыдон се 'ххуысы къух бахъуыдыйы рæстæджы фæдаргъ кодтой, цæмæй ацы цех йæ куыст ма æрурæдтаид. Уыимæ иумæ истой кæрæдзийы фæлтæрддзинад.
Йæ рады Цхуырбаты Вадим бузныджы ныхæстæ зæгъы Æлборты Леонидæн, кæцы архайдта æмæ арæзта æппæт дæр, цæмæй дзулфыцæн цех скуыстаид. Афтæ ма Вадим куыд банысан кодта, афтæмæй йæм бирæ хæттыты æрцыдысты Къуыдаргомы цæрджытæй минæвæрттæ æмæ-иу æм хатыдысты, цæмæй ацы фарст скъуыддзаг æрцæуа. Æмæ абоны бонмæ сæ бон куыд уыд, афтæ аскъуыддзаг кодтой ацы фарст, кæд кæронмæ иуварсгонд не 'рцыд, уæддæр.
Нæ рады мах бацымыдис кодта, зæгъгæ, нæй дзы саразæн, нырыккон домæнтæн чи дзуапп кæна, ахæм дзулфыцæн цех? Йæ рады Вадим фехъусын кодта, зæгъгæ, бизнеспроект сарæзтой хицауады æххуысæй дыууæ модулон дзулфыцæн цехæн, иу дзы æвæрд æрцæудзæн Ленингоры районы, иннæ та - горæт Къуайсайы.
Нæ уацх.