Nog adres

Фембæлд Цхинвалы районы цæрджытимæ

РХИ-йы Президент Тыбылты Леонид йæхимæ райста Цхинвалы районы цæрджыты, уыдон паддзахады сæргъæлæуæгимæ фембæлды рæстæджы уынаффæмæ рахастой сæ хæдзæртты дарддæры хъысмæты фарста, кæцытæ уыдысты Цхинвалы районы территорийыл æмæ сæ хъæуы фехалын. Фембæлды хайад райста РХИ-йы Хицауады Сæрдар Хъуылымбегты Доменти.

2014 азæн Хуссар Ирыстоны социалон-экономикон рæзты Инвестицион программæйы фæлгæтты æххæст цæуынц куыстытæ Дзау-Цхинвалы фæндагмæ æввахс территориты реабилитацийы фæдыл. Номхуындæй, ныхас цыд ацы территориты тыххæй, цыран уыдысты Президентмæ бахатæг цæрджыты хæдзæрттæ. Бынæттон цæрджыты тыхсын кодта сæ хæлд æмæ æрдæгхæлд хæдзæртты дарддæры хъысмæт.
«Уæ хæдзæрттæ цæрынæн бæзгæ нал сты. Алцыдæр арæзт цæуы, цæмæй территори хæрзарæзт æмæ сыгъдæг æрцæуа», - загъта уый.

Паддзахады сæргълæууæг банысан кодта, зæгъгæ, сæ хæдзæрттæ раздæр кæм уыдысты, уыцы фадгуыты фæдыл нæм ис цалдæр варианты æмæ фæндоны, уыдонæй сæ иу у раздæры фадгуыты бæсты ног зæххы фадгуытæ рахицæн кæнын.
«Къухдариуæгады плæнтты ис цæрæнуат саразынæн ног зæххы фадгуытæ рахицæн кæнын», - йæ ныхасмæ бафтыдта Президент.
Ацы фæндоныл сразы сты хæдзæртты хицæуттæ дæр, уымæн æмæ уый æмхуызон у сæ фæндæттæ æмæ плæнттимæ. Цæрджытæ домдтой, зæгъгæ, хъæуы фæтагъддæр кæнын æмбæлон документаци саразыны тыххæй.
Тыбылты Леонид бахæс кодта фембæлды хайадисæг Цхинвалы районы сæргълæууæг Плиты Аланæн, цæмæй дарддæр бакусой хæдзæртты æмæ сæ хицæутты нымæцы фæдыл номхыгъд саразыныл æмæ бакæнгæ куысты тыххæй акт æрбавдисой иу къуырийы æмгъуыдмæ. Уый фæстæ ацы фарсты фæдыл куыст адарддæр кæндзысты.
Фембæлды хайадисджыты ма тыхсын кодтой социалон нысаниуæджы проблемæтæ дæр. Уыцы фарстатæй сæ иуæй-иутæн сдзуапп кодта паддзахады сæргълæууæг. Проблемæтæй бирæты аскъуыддзаг кæнын та бахæс æрцыд Хицауады Сæрдар Хъуылымбегты Доментийæн.

РХИ-йы Президенты пресс-службæ