Nog adres

Сразыдзинад фæбæрзонддæр кæндзæн æмархайды æмвæзад

DSC01069.JPG
Хуссар Ирыстоны Паддзахадон статистикæйы управлени æмæ Уæрæсейы Паддзахадон статистикæйы федералон службæйы разамонджытæ æрæджы Хицауады хæдзары цытджын уавæрты сæ къухтæ æрфыстой æмгуыстады фæдыл сразыдзинадыл. Ахсджиаг документыл сæ къухтæ æрфыстой Республикæ Хуссар Ирыстоны Паддзахадон статистикон управленийы сæргълæууæг Пухаты Эрик æмæ Уæрæсейы Паддзахадон статистикæйы федералон службæйы къухдариуæггæнæг Александр Суринов.
Дыууæ бæстæйы ацы уагдæтты 'хсæн 2009 азы бафыст æрцыд æмгуыстады фæдыл суагъæ. 2013 азы та арæзт æрцыд иумиаг мадзæлтты план. Ацы сразыдзинад фæтыхджындæр æмæ рауæрæхдæр кæндзæн дыууæ бæстæты æмахастыты иумиаг мадзæлтты план реализаци кæныны хъуыддаг.
Бафысгæ сразыдзинады руаджы фадат уыдзæн дыууæ фарсы цымыдисгæнæг фарстыты фæдыл статистикон ин-формаци кæрæдзийæн дæттын, статистикæйы организаци æмæ методикæйы фарстыты фæдыл фæлтæрддзинад кæрæдзийæ исын, иумиаг семинартæ æмæ кусæгон рабадтытæ организаци кæнын.
Сразыдзинад бафыссыны цытджын церемонийы хайад райстой Хицауады Сæрдары хæстæ æххæстгæнæг Хъуылымбегты Доменти, Фæсарæйнаг хъуыддæгты министры хæдивæг Коцты Алан, Хуссар Ирыстоны Уæрæ-сейы Федерацийы æххæстбарджын минæвар Къарджиаты Эльбрус æмæ Уæрæсейы статистикæйы службæйы кусджытæ.

Хицауады Сæрдары хæстæ æххæстгæнæг Хъуылымбегты Доменти банысан кодта уæрæсейаг æмæ хуссар-ирыстойнаг статистикон службæты æмархайды бæрзонд æмвæзад. Мах, зæгъгæ, аргъ кæнæм ацы æмгуыстадæн æмæ цæвиттон у хъуыддагон партнердзинадæн, кæцыйы руаджы скъуыддзаг цæудзысты нæ разы лæууæг конкретон хæстæ.
Йæ хъуыдымæ гæсгæ æмгуыстады фæдыл сразыдзинад æвæрццагæй бандавдзæн процесстыл, Хуссар Ирыстоны æмæ Уæрæсейы статистикон службæты æмархайд та схиздзæн ног æмвæзадмæ.
Хуссар Ирыстоны Уæрæсейы минæвар Къарджиаты Эльбрус куыд загъта, уымæ гæсгæ барадон базæ саразын у хæрзиуæгон хъуыддаг.
«Сæудæджерады ис практикон æгъдауæй æмархайды æппæт фадгуытæ. Минæварад дæр кусы æмæ архайы эффективон æмæ æнтыстджынæй, æнгом æмгуыстад кæны йæ уæрæсейаг коллегæтимæ», - банысан кодта минæвар.
Къарджиаты Эльбрус ма банысан кодта горæт Мæскуыйы Уæрæсе æмæ Хуссар Ирыстоны 'хсæн социалон-экономикон æмгуыстады фæдыл Æхсæнхицауадон къамисы дæсæм рабадты æвæрццаг фæстиуджытæ.
«Бæрæг æмгъуыдты конкретон æмæ вазыгджын фарстатыл дзырд цыд. Уыцы фарстытæ аскъуыддзаг кæныны фæстиуджытæ систы бакуыстгонд æмархайды механизмтæ. Стыр оптимизмимæ кæсæм арæзтад, размæцыд æмæ куыд рæздзæн нæ республикæ, уымæ. Ацы вазыгджын хæстæ реализаци кæныны фæдыл цы фæрæзтæ хъæуы, уый тыххæй арæзт цæуы план, уыдонæй пайда хъуамæ æрцæуа рæстæгыл æмæ эффективонæй», - загъта Къарджиаты Эльбрус.
Дарддæр ма куыд банысан кодта, афтæмæй кæрæдзиæмбарынад æмæ конструктивон куысты руаджы азы кæронмæ хъуамæ фенын кæнæм, цы хъуыддæгтæ арæзт æрцыдысты, уый.
Уæрæсейы статистикон службæйы къухдариуæггæнæг Александр Суринов ныфс бавæрдта, йæ хуссарирыстойнаг коллегæты фарс кæй лæудзæн æппæт фарстатæ скъуыддзаг кæныны хъуыддаджы дæр æмæ дыууæ паддзахады æнгæс ведомствотæн кæй уыдзæн эффективон æмгуыстад.
Пухаты Эрикы хъуыдымæ гæсгæ бафысгæ сразыдзинад фæбæрзонддæр кæндзæн æмархайды гъæд æмæ æмвæзад.
КЪÆБУЛТЫ Маринæ