Nog adres

Хæрзарæзтады комбинат хæрзæфснайд кæны горæты уынгты

P3251704.jpg
Нæ горæты уынгты хæрзарæзтад кæронмæ нæма бахæццæ, уынгты фылдæр хайыл асфальт æвæрд æрцыд æмæ уый фæстиуæгæн нырма дæр, хъыгагæн, нæ горæты цæрджытæ ныхъуырынц рыг. Хурбон нæ горæты уынгты сбады рыджы мигъ. Асфальтгонд уынгтæм æнæарæзт уынгтæй цъыфбон машинæтæ сæ цæлхытыл хæссынц цъыф æмæ хус рæстæг рыгæй сысты уæлдæфы.
Паддзахадон автоинспекцийы статистикон бæрæггæнæнтæм гæсгæ цæрджыты нымæцмæ абаргæйæ машинæты нымæц æгæр бирæ у, уынгты машинæты змæлд дæр нæхи цæстæй уынæм - егъау у. Уыдон фæстæ не 'нæниздзинадæн стыр зианхæссæг рыг у æмæ йæ мах та парахатæй ныхъуырæм. Ахуыргæндты иртасынæдтæ куыд уынын кæнынц, уымæ гæсгæ рыг улæфын афтæ стыр зиан хæссы, куыд тамако дымын.
Цхинвалы администрацийы дæлбар хæрзарæзтады камбинаты кусджытæ æрвылизæр донпырхгæнæн машинæтыл зилынц уынгты æмæ сæ æхсынц. Æхсынц тротуарты дæр. Ацы бонты ныхсадтой Джиоты Аланы проспект. Хæрзарæзтады комбинаты механик, фадыджы сæргълæууæг Джиоты Инал нын куыд радзырдта, афтæмæй рæстæй-рæстæгмæ æхсад цæудзысты горæты асфальт уынгтæ æмæ тротуартæ, цæмæй цасдæрбæрцæй къаддæр кæна рыг. Уыцы бон ма горæты фаллаг фарс комбинаты кусджытæ лæмбынæгæй æрæвнæлдтой горæты ныгуылæн хай сыгъдæг кæнынмæ. Ахæм рæстæджы цæрджытæ дæр хорз бакæниккой, куы рахизиккой æмæ комбинаты кусджытимæ иумæ куы балæууиккой нæ иумиаг горæты сыгъдæгдзинады фæдыл куысты уæлхъус.

Уымæн æмæ хæрзарæзтады комбинат дæр æфснайæн техникæ æмæ лæгдыхæй нырма къуыхцы кæны, стæй дæр горæты уынгтæ бæстон æфснайд æмæ фæткыл не сты, кæронмæ арæзт кæй нæма сты, уымæ гæсгæ. Бирæ цæрджытæ сæ хæдзæртты раз срæдзагъд кæнынц сæнæфсиры æхсæдæнтæ, æндæр брæттæ, брондонмæ сæ цæйнæфæлтау бахæссой, фæлтау.
Дыууæ ныхасы броны зианхæссæг миниуджыты тыххæй. Уый у нæ царды немæ æмдзугæнæг, кæцы гæнæн ис æмæ суа нæ фыццаг знаг. Уый уæвынад кæны ныртæккæ алы ран дæр, уынгты дæр, хæдзæртты дæр. Рыджы зианхæссæг миниуджытæ, сæйраджыдæр, сты уыдон, æмæ йе сконды ис мингай зианхæссæг буарадтæ æмæ низты парахатгæнджытæ. Иртасынæдты руаджы куыд рабæрæг, уымæ гæсгæ уынджы рыгæй хæдзармæ бахауы алыгъуызон чъизи буарадтæ: бактеритæ, химикаттæ, пестицидтæ æмæ æндæр ахæм хъæстæ буарадтæ. Куыд рабæрæг, афтæмæй иууыл тæссагдæр рыг хæдзармæ хæссынц нæ дзабыртæ, уымæн æмæ уынгты цы хъæстæ буарадтæ ис, уыдон рыджы хуызы сбадынц дзабыры уæлцъарыл æмæ афтæмæй бахауынц хæдзæрттæм. Уымæ гæсгæ дæ де 'нæниздзинадыл аудын кæд фæнды, уæд фыццаг хæдзармæ бахизгæйæ, æнæмæнгдæр, хъуамæ асыгъдæг кæнай дæ дзабырты.
Рыджы мидæг бактеритæ, зокъотæ æмæ рыджы хъæндилтæ хорз æрбынат кæнынц сæхицæн уыдон, сæйраджыдæр, цæрынц рыгæй. Рыджы хъæндилтæ сты аллергийы тыхджынгæнджытæ. Уымæй дарддæр рыгæн ис ноджы бирæ зианхæссæг миниуджытæ æмæ йæ ныхмæ тох кæнын хъæуы хъазуатонæй, науæд не 'нæниздзинад æввахс рæстæджы йæ уагыл нал уыдзæн.
Æрмæст горæты администрацийы æмбæлон структурæтæ фаг не сты, цæмæй ацы тæссаг фæзынд иуварс æрцæуа. Уымæ гæсгæ нæ цæрджыты дæр хъæуы, нæ горæты сыгъдæгдзинадмæ сæ егъау хайбавæрд бахæссын.
КЪÆБУЛТЫ М.