Nog adres

Æддагон знагæй мидæггагон знаг тæссагдæр у

SDC10697.JPG
Æртыццæджы, 12-æм марты паддзахадон телерадиокомпани «ИР»-ы алæвæрд «Ног хабæртты» равдыстой адæймаджы зæрдæ кæмæй ныккæрзыдта, ахæм кадртæ. Горæт Цхинвалмæ Тъбетæй æрцæуæны цур гуырдзиаг агрессийы амæттæгтæн мемориалон комплекс саразынæн цы бынат рахицæн кодтой, уый уал æрбахгæдтой декоративон цæгæй.
Ацы бынаты нырма кæд хъайтар лæппутæн цыртдзæвæн æвæрд нæма æрцыд, уæддæр йæ цурты дæр хъуамæ сæркъулæй цæуæм, ацы бынат нын дзуарбадæны хуызæн хъуамæ уа, фæлæ… Цавæрдæр «хъайтартæ» ацы бынаты сæ фæд ныууагътой, сæ кады фæд нæ, фæлæ сæ худинаджы фæд. Афтæ зæгъæн ис æмæ уыцы «хъайтартæ» кæй сты ирон адæмы знæгтæ.
Телеуынынадмæ кæсгæйæ æмæ хъусгæйæ нæдæр мæ цæстытыл æмæ нæдæр мæ хъустыл баууæндыдтæн, дыккаг бон райсомæй бацыдтæн уырдæм æмæ мæ зæрдæ дывæр рыст фæкодта уым цы ныв федтон, уымæй. Декортаивон цæг цы ныллæг цæджындзтыл конд уыд, уыдоны цавæрдæр дурзæрдæ æнæадæймæгтæ стыдтой æмæ дзы машинæ мидæмæ баскъæрдтой. Сæ нозтыты афтид мигæнæнтæ æмæ къухты сæрфæн гæххæттытæм гæсгæ дзы, æвæццæгæн, цæл - минас дæр фæкодтой. Ау, цавæр мæдтæ ныййардтой ахæм хъæддаг сырдты æмæ ахæм сырдон ми сарæзтой, ахæмтæн цæсгом нæй, æгъдау та сын фæстаг бынат ис, фæлæ æппын Хуыцауæй дæр нал тæрсынц.

Ацы бынаты цыртдзæн æвæрд цы хъайтартæн хъуамæ æрцæуа, уыдоны ныййарджытыл куы амбæлын, уæд сæ тынг фефсæрмы вæййын, мæхи сæ разы азымджынæй рахатын, уымæн æмæ уыцы ныййарджыты зæрдиæгтæ мах, ирон адæмы, Ирыстоны тыххæй рауæлдай кодтой се ‘взонг удтæ, сæ сæртæ нывондæн сæ радтæг Ирыстоны тыххæй æрхастой æмæ сау мæрмæ бацыдысты хæрз æвзæнгтæй сæ фидæны царды плæнттæ æрдæгыл аскъуыйгæйæ. Бирæтæн дзы нæ бантыст сæхицæн æмкъæйттæ æркæнын дæр, нæ сын бантыст сæ фыццаг ноггуырды сæ къухмæ сиысын æмæ йын йæ уарзт банкъарын.Уыцы æдзард хурмондаг, цардбæллон æмæ хъайтар лæппуты ном зæгъынæй дæр хъуамæ аргъуц кæнæм иууылдæр æмæ уый бæсты цавæрдæр дыкъахыг сырдтæ фæхынджылæг кодтой ацы сыгъдæг бынатæй. Ау, куыд сæ ферох сты ацы бынаты æмæ уырдæм æввахс 2008 азы августы тугуарæн хæсты рæстæджы афтид армæй танкæты ныхмæ цы ирон лæппутæ рацыдысты, уыдоны нæмттæ. Куыд сæ ферох сты Багаты Амиран, Джиоты Азæмæт, Санахъоты Алан æмæ бирæ æндæрты хъайтардзинæдтæ, кæцытæ сæ фæстаг сулæфты онг дæр сæ хæцæнгæрзтæ не ‘руагътой сæ къухтæй æмæ афтæмæй хæцыдысты тæссаг зæнаджы ныхмæ, сæ фæстаг сулæфты онг дæр архайдтой, цæмæй знæгтæ мидæмæ горæтмæ ма æрбахызтаиккой, ууыл. Уыдон куынæ уыдаиккой, уæд ирон адæмæй бирæ фылдæр фæмардаид хæсты. Афтæ мæм кæсы æмæ ацы æбуалгъ ми барæй арæзт æрцыд, цæмæй æнæуый дæр нæ рыст зæрдæтæ уæлдай рыст фæкæной. Æндæра йæ куыд нæ хъуамæ зыдтаиккой ацы бынат хъайтарты рухс ном арынæн кæй рахицæн кодтой, уый. Хуыцау сын тæрхонгæнæг фæуæд.
Куыд зыны, афтæмæй та нæм фæзынд мидæггагон знæгтæ. Ууыл дзурæг у æрæджы РХИ-йы Президенты Администрацийы къухдариуæггæнæг Цоциты Барисы хæдзары кæртмæ гранат кæй баппæрстæуыд, уыцы цау дæр. Гранат йæ чъизи къухтæм чи райста æмæ йæ чи æппæрста уымæн æппын кæнæ мад нæй кæнæ хо, кæнæ сывæллæттæ. Афтæ цæмæннæ ахъуыды кодта ацы хæдзары Барис йедтæмæ кæй цæрынц йæ цардæмбал æмæ йæ хъæбултæ дæр. Уæд та Хуыцау бахизæд, фæлæ сæ исчи уыцы рæстæджы æддæмæ рахызт. Науæд кæмæн цы ракодта Цоциты Барис йæхæдæг дæр, Ирыстоныл уæззау дуг куы ныккодта, уæд уый дæр кæйдæртау хуыздæр цардагур æндæр ранмæ куынæ фæлыгъд, кæнæ та 2008 азы августы хæсты уый дæр Дзауы кæйдæр ныккæндты куынæ æмбæхст, мыййаг. Æппæт уыцы азты Барис уыд йæ радтæг адæмы цур æмæ семæ иумæ рацыд уыцы даргъ æмæ уæззау фæндагыл, семæ цин кодта сæ цинтыл, семæ хъыг кодта сæ хъыгтыл. Тынг бирæ сарæзта Ирыстоны политикæйы къабазы дæр. Науæд æм гранат чи баппæрста кæнæ та йæ чи баппарын кодта, уыдон æм кæд исты аргъуц хæссынц, уæд æм комкоммæ цæмæннæ бацыдысты æмæ йын цæмæннæ загътой æргомæй сæ ныхас. Ау, ирон лæг ма ахæм æгаддзинад йæ сæрмæ кæд хаста æмæ сусæг хъырггаг куыдзау хæца, æви бынтондæр нæ кадджын фыдæлты æгъдæуттæ фесæфтам. Æниу, ахæмтæн цæй æгъдау æмæ фæтк ис.
Куыд рабæрæг, афтæмæй 26-æм февралы та гранаттæ баппæрстой Къæбысты Георги æмæ Къæбысты Дауыты хæдзæртты кæртытæм. Горæты куыд дзурынц, уымæ гæсгæ ма гранат баппæрстой хибахъхъæныны къордты командиртæй сæ иуы æввахс хæстæг сылгоймаджы хæдзары кæртмæ дæр. Ацы æрцæугæ цаутæ нысан кæнынц, уый æмæ та мидæггагон знæгтæ æддагон знæгты фæндæй кæй бахъавыдысты Хуссар Ирыстоны уавæр фæвазыгджындæр кæнынмæ. Уый та баст у æввахс рæстæджы уагъд кæй æрцæудзысты Хуссар Ирыстоны Парламентон æвзæрстытæ, уыимæ.
Гæнæн ис афтæ зæгъæн дæр æмæ ацы срæмыгъдтытæ арæзт кæй æрцыдысты Гуырдзыстоны спецслужбæты закъазмæ гæсгæ. Ууыл дзурæг у, 3-æм марты Хуссар Ирыстон æмæ Гуырдзыстоны ‘хсæн паддзахадон арæнмæ æввахс гуырдзиаг хъæу Атоцийы цур гуырдзиæгтæ цы акци ауагътой, уый дæр. 500 радикалон зондыл хæст æвзонг адæймаджы Гуырдзыстон æмæ Украинæйы националон тырысатимæ бацыдысты арæнгæрон зонæмæ, кæцытæн сæ къухты уыд плакаттæ «Уæрæсе - оккупант», «Уырыссæгтæ - фашисттæ», «Ацу дæ хæдзармæ» æмæ æндæртæ. Уыдон ма хъæр кодтой алыгъуызон æнæцензурон ныхæстæ дæр. Сæххæст кодтой Гуырдзыстоны гимн дæр. Гуырдзыстоны ‘рдыгæй алы къахдзæф дæр нын бæрæгæй æмбарын кæны, уыдон ирон адæммæ ахасты сæ хъуыды кæй никуы аивдзысты æмæ та сын куыддæр гæнæн фæуа, афтæ та Ирыстонмæ «сыгъдæг быдыр» аразынмæ кæй æрбацæудзысты.
Ныр цалдæр мæйы дæргъы Украинæйы цы цаутæ цæуынц, уый алчидæр зоны. Украинæйы уавæр вазыгджын кæй у, уымæй спайда кодтой «нæ хорзмæбæллæг» сыхæгтæ дæр æмæ та радон хатт фенын кодтой ирæттæм рагæй фæстæмæ цы зæрдæ дарынц, уый. Украинæйы райхъал фашизм, мæлынц æнæаххос адæм дæр æмæ нырма дæр бæрæг нæу хъуыддаг цæуыл фæуыдзæн, уыцы хабар. Гуырдзыстон æмæ Украинæйы националисттæ Уæрæсейы нымайынц сæ иумиаг знагыл, Уæрæсейы руаджы бирæ азты дæргъы кæй цардысты, уыцы хъуыддаг айрох кæнгæйæ. Æрæджы Украинæйы митингтæй сæ иуы йæ сæт калгæ фæзынд Гуырдзыстоны раздæры галстукхор президент Михаил Саакашвили, кæцы йæ раныхасы банысан кодта, зæгъгæ, мах, дам, хъуамæ иумæ тох кæнæм нæ иумиаг знаг Уæрæсейы ныхмæ. Уæрæсе, дам, нын соккупаци кодта нæ территоритæ æмæ афтæ дарддæр. Æгæрыстæмæй, Украинæйы афтæхуыйнæг ног хицауад уынаффæ кæнынц æнæзонд Саакашвилиимæ. Уый фæдыл йæ хъуыды загъта Гуырдзыстоны премьер-министр Иракли Гарибашвили: «Æз дисы бахаудтæн Украинæйы ныртæккæйы хицауад Саакашвилимæ кæй ныхас кæнынц, кæй уынаффæ кæнынц, уый тыххæй. Æз федтон кадртæ, цыран Украинæйы æдасдзинады министр уынаффæтæ кæны Саакашвилиимæ. Мæнмæ афтæ кæсы æмæ уый у серьезон рæдыд, уымæн æмæ уый у ахæм адæймаг, кæцыйæн йæ бон не сси 2008 азы хæст ма æруадзын. Саакашвили Гуырдзыстоны æркодта хъаймæтмæ», - банысан кодта уый.
Ирон адæм ныртæккæйы вазыгджын рæстæджы хъуамæ уой иу зондыл хæст, хъуамæ уой æнгом. Афтæ куынæ уа, уæд та не знгæтæ сæ сæртæ сдардтой залиаг кæлмытау æмæ Ирыстоны уавæр сдестабилизаци кæнын сæ къухты куы бафта, уæд та йын цахæм фæстиуджытæ уыдзæн, уый нæ алкæмæндæр зындгонд у. Иннæ ахæм нæ ирвæзынгæнæг, стыр Уæрæсейы цæсты дæр нæхи ма дæлдзиныг кæнæм. Ирон адæмæй рох ма хъуамæ уа æнæ хæстæй дæр гуырдзыйы къухæй мидæггагон знæгты руаджы цас ирон лæппуйы бабын сты, уыцы хъуыддаг. Политикон амбицитæ æмæ чъизи æхцатæ та не сты иу адæймаджы царды аргъ дæр. Ацы хъуыддаг ирон адæмæй алчидæр хъуамæ бамбара. Науæд…
ДЖИОТЫ Екатеринæ