Nog adres

Политикæ/ УÆДДÆР ÆМÆ УÆДДÆР - ÆДАСДЗИНАДЫ ФАРСТ

DSC01795.JPG
Фæскавказы æдасдзинады фæдыл Женевæйы дискусситы радон раундмæ цæттæ кæныны нысанæн æрæджы Хуссар Ирыстонмæ æрцыдысты дискусситы æмсæрдæрттæ ЕÆÆО-йæ, ИНО æмæ Евроцæдисæй.
Дискусситы Хуссар Ирыстоны делегацийы минæвæрттимæ фембæлды рæстæджы делегацийы сæргълæууæг, Постконфликтон æрбæстонкæнынады фæдыл РХИ-йы Президенты æххæстбарджын минæвар Джиоты Мурат банысан кодта, зæгъгæ, 2008 азы цы цаутæ æрцыд, уымæй куынæ бахизæм Хуссар Ирыстоны адæмы, Кавказы фидар сабырад куынæ æрфидар кæнæм, уæдмæ Женевæйы дискусситы актуалондзинад хъахъхъæд цæудзæн.

«Хуссар Ирыстонмæ ахасты Гуырдзыстон тыхæй кæй не спайда кæндзæн, уыцы бæрнджын документ бацæттæ кæныны хæс у нæ æвæджиаг хæстæй иу. Æз бæрнонæй хъусын кæнын - Хуссар Ирыстоны фарст цæттæ у æххæст гуырахстæй бакусынмæ регионы æдасдзинад ифтонг кæныныл, уымæ сидын фæсарæйнаг организациты минæвæрттæн дæр. Уымæй цæттæ стæм, æдасдзинадмæ хауæг æппæт фарстатыл дæр æруынаффæ кæнынмæ», - банысан кодта Джиоты Мурат.

«Фæрсты хъусдард здæхт цæуы, цæмæй бамбарой, æдасдзинад сæйраг кæй у. Уый фæстиуæгæн æдасдзинад бафидар хъæуы юридикон бæрнджын документæй», - загъта ныхасгæнæг, æмæ ноджыдæр æрсидт йæ коллегæтæм, зæгъгæ, нæ сæйраг хæс у ацы документ бацæттæ кæнын, кæцыйы руаджы уыдзæн фидар дунеон гарантитæ.
Æппæт хайадисджыты иузæрдиондзинад иумиаг хъусынгæнинаджы проектыл бакусынæн Джиойы фырт банымадта актуалоныл æмæ, зæгъгæ, хуссарирыстойнаг делегацийы ныфс ис дискусситы радон раунды размæцыды къахдзæфтæ хынцыд кæй æрцæудзысты. Æдасдзинадыл баст сты æндæр фарстатæ дæр - гуманитарон фадыджы фарстатæ. Æххæстбарджын минæвар ноджыдæр банысан кодта, зæгъгæ, нæ регионы адæмы хæрзæбонæн фарстатæ скъуыддзаг кæнынмæ цæттæ сты хуссарирыстойнаг делегацийы минæвæрттæ.
Женевæйы дискусситы ИНО-йы æмсæрдар Аннти Турунены ныхæстæм гæсгæ, цæттæ сты развæлгъау консультациты руаджы дискусситы радон раунды куыстмæ, æппæт æнæмæнгхъæуæг фарстатыл æрдзурынмæ ацы процессы фæлгæтты.
«Цæттæ стæм, цы фарстатæ раразмæ æрцыд - æдасдзинады фæдыл, гуманитарон характеры фарстытыл, уыдоныл æрдзурынмæ. Ныфс мæ ис, абоны консультациты бындурыл арæзт æрцæудзæн раст къахдзæфтæ Женевæйы дискусситы боны фæткмæ ахасты.
Дарддæр фембæлд цыд æхгæд дуæртты мидæг. Фембæлдæн фæстиуджытæ аразгæйæ, Аннти Турунен куыд банысан кодта, уымæ гæсгæ фембæлд ацыд продуктивон здæхты. Ныфс нæ ис, фылдæр дзырд кæй цæудзæн, фæстаг фондз азы цы фæлтæрддзинад райстам, уый фæстиуæгæн хаст æрцæудзæн ногдзинæдтæ Женевæйы дискусситæ уадзыны процессмæ. Æхсызгонæй банысан кодта, дискусситы хуссарирыстойнаг æмæ уæрæсейаг хайадисджытæ цæттæ кæй сты Женевæйы дискусситы фæлгæтты бадзырдтæм.
ЕÆÆО-йы минæвар Анджело Гнэдингер æхсызгонæй банысан кодта фыццаг хатт кæй исы хайад Женевæйы дискусситæм цæттæгæнæн куысты. Конструктивоныл банымадта фембæлд. Фадат сын, зæгъгæ, фæцис æрвыл мæй механизмты фæлгæтты цы куыст цæуы, ууыл æрдзурынæн дæр. Уыцы куыст банымадта сæйраг инструментыл, регионы чи цæры, уыцы цæрджытыл хæрзаудынæн æмæ æдасдзинад сифтонг кæнынæн.
Евроцæдисæй рæстæгмæ хæстæ æххæстгæнæг æмсæрдар Бьорн Кюне куыд банысан кодта, уымæ гæсгæ йæ æмсæрдар Филипп Лефоры мисси кæронмæ бахæццæ æмæ æввахс рæстæджы нысан æрцæудзæн æндæр минæвар, уыцы фарстыл, зæгъгæ, дзырд цæудзæн дискусситы куысты дæр. Евроцæдис серьезон ахаст дары ацы процессмæ æмæ, куыд баныфсæвæрдта, уымæ гæсгæ информаци лæмбынæгæй хаст æрцæудзæн Евроцæдисы къухдариуæгадмæ.
Хуссар Ирыстонæй дискусситы æмсæрдар Джиоты Мурат куыд банысан кодта, уымæ гæсгæ дзырд цыд фарстаты уæрæх зылдыл, кæцытæ хаст сты Женевæйы дискусситы куыстмæ. Фыццаджыдæр, Гуырдзыстоны фарсæрдыгæй Хуссар Ирыстоны адæмы æдасдзинад сифтонг кæнын.
«Хуссар Ирыстон æмæ Абхазы ныхмæ тыхæй ма спайда кæныны фæдыл юридикон бæрнджын документ у дискусситы сæйраг хæс. Æдасдзинадимæ баст къорд фарстатыл дзырд цыд фембæлды. Стыр хъусдард здæхт æрцыд рæстæгмæйы къахдзæфтæм ацы здæхты, цы аразын хъæуы, цæмæй максималон æнтыстджын къахдзæфтæ арæзт æрцæуа Хуссар Ирыстоны æдасдзинад сифтонг кæныны хъуыддаджы.
Дзырд цыд ивгъуыд уавæрыл дæр. Негативон аргъ æрцыд, æрæджы Хуссар Ирыстонмæ æввахс арæныл гуырдзиаг минæвæрттæ цы акци ауагътой, уымæн. Уымæн æмæ уыцы архайдтытæй уавæр кæны æндыгъд. Æрсидтыстæм европæйаг минæвæрттæм, цæмæй фылдæр хъусдард здахой ахæм хъуыддæгтæм.
Дзырд ма цыд гуманитарон фарстатыл, кæцытæ баст сты æдасдзинадимæ, фыццаджыдæр, хуссарирыстойнаг æбæрæгæй сæфт æмбæстæгты агурын æмæ Гуырдзыстоны ахæстæтты цы ирон æмбæстæгтæ хæссынц æфхæрд, уыдон хъысмæтыл.
Сæрмагондæй, Хуссар Ирыстоны къухдариуæгады хæларадон фездæхтæн бæрзонд аргъ скодтой дискусситы æмсæрдæрттæ, ахæстонæй сæрибар кæй æрцыд гуырдзиаг æмбæстаг Джерапов. Ныфс бавæрдтой, ацы къахдзæфæн æмбæлон аргъ кæй æрцæудзæн Гуырдзыстоны уæлдæр къухдариуæгады ‘рдыгæй æмæ æнгæс къахдзæфтæ арæзт кæй æрцæудзæн дыууæ бæстæйы æмбæстæгты ахæстæттæй ссæрибар кæныны хъуыддаджы», - банысан кодта минæвар.
Уый фæстæ Хуссар Ирыстоны делегацийы уæнгтæ фæсарæйнаг организациты минæвæрттæн фенын кодтой Гуырдзыстонимæ Хуссар Ирыстоны паддзахадон арæны иу хай Дицы хъæумæ хæстæг, цæмæй сæхи цæстæй феной, арæнтæ бæлвырд кæй цæуынц дунеон барады домæнтæм гæсгæ, æрмæстдæр Хуссар Ирыстоны территорийыл. Уыцы арæзтадтæ ныхдур не сты бынæттон цæрджытæн, фæлæ уыдонæн фадат ис арæнтæй дарддæр сабырадон цард кæнынæн.
Женевæйы дискусситы æмсæрдæрттæ уый фæстæ бон та бабæрæг кодтой Ленингоры районы социалон æмæ культурон нысаниуæджы объектты.
КЪÆБУЛТЫ М.