Nog adres

Инвестицион программæты сæйраг принциптæ

Мæскуыйы уагъд æрцыд радон фембæлд Республикæ Хуссар Ирыстоны социалон-экономикон рæзты æмархайды Инвестицион программæ среализаци кæныны фæдыл кусæгон къорды фæлгæтты.
Фембæлды цы фарстатыл уынаффæ цыд, уыдоны хатдзæгты тыххæй радзырдта РХИ-йы Хицауады Сæрдары хæстæ æххæстгæнæг Хъуылымбегты Доменти. Йæ ныхæстæм гæсгæ, 2014 азæн Инвестицион программæ фидар æрцыд æмæ ныридæгæн реализаци цæуы. Ныртæккæ цы фарстатыл уынаффæ кæнæм кусæгон къорды фæлгæтты, уыдон хауынц 2015-2017 азтæн Инвестицион программæ бакусыны фæдыл.

«Уынаффæ цыд бирæ фарстатыл, йæ саразыны фæдыл. Куыст райдыдта ивгъуыд азы кæрон, Хуссар Ирыстонмæ алыгъуызон фадгуыты уæрæсейаг специалистты стыр кусæгон къорд куы æрцыд, уæд. Уыдон сæ хуссарирыстойнаг коллегæтимæ басгæрстой алы объект дæр, кæцы хъуамæ хаст æрцæуа Инвестицион программæмæ. Ахуыр цыдысты уыцы проектты среализаци кæныны гæнæнтæ æмæ вазыгджындзинæдтæ, сæ хъомыс æмæ æнæмæнгхъæуындзинад», - загъта Хъуылымбегты Доменти. Уый бахахх кодта, зæгъгæ, Инвестицион программæ афтæ хъуамæ саразæм, цæмæй дзы иунæг каппек дæр æнæхъуаджы хардз ма æрцæуа, æмæ Инвестицион программæйы алы объектæн та йæ бон уа дарддæр республикæйы рæзтæн лæггад кæнын».
Хицауады Сæрдары хæстæ æххæстгæнæг банысан кодта, зæгъгæ, «2015-2017 азтæн приоритетонæй баззайдзысты Хуссар Ирыстоны столицæйы хæрзарæзтады фарстатæ, зæххыбын коммуникациты дарддæры арæзтад, æнæ уыдон нæй гæнæн дзурæн æндидзынад æмæ цæрджыты цард фæхуыздæр кæныныл».
«Йæ бынат дзы бацахсдзæн цæрæнуат арæзтады фарста дæр, уый тыххæй бакуыст æрцæудзæн хицæн цæрæнуатон программæ. Мах иууыл дзурæм уый тыххæй, зæгъгæ, æнæ экономикæйы реалон секторы рæзтæй махæн нæ бон нæу рæзын, куысты бынæттæ аразын, уымæ гæсгæ ацы къабаз, уыцы нымæцы хъæууон хæдзарад, сæудæджерад, чысыл æмæ астæуккаг амалиуæгад дæр ссардзæн йæ бынат программæйы. Социалон къабаз - æнæниздзинады , ахуырады, культурæйы объекттæ дæр æнæхъусдардæй нæ баззадысты», - фехъусын кодта Хъуылымбегты Доменти.
2015-2017 азтæн Инвестицион программæ дих æрцæудзæн хицæн азтыл, фæлæ фидар æрцыд, куыд иу æнæхъæн программæ, афтæ. Уырдæм хаст æрцæудзысты фæрæзтæ проектон-сметæйон документаци бакусыны тыххæй.
«Ацы куыст мах сæвæрдтам сæрæй. Ис принцип, кæцы мах иумæ сбæрæг кодтам: æнæ проектон-сметæйон документаци иунæг объекты арæзтад дæр нæ райдайдзæн», - банысан кодта Хицауады сæрдары хæстæ æххæстгæнæг.
Инвестицион программæ кæронмæ фидар æрцæудзæн Республикæ Хуссар Ирыстон æмæ Уæрæсейы Федерацийы 'хсæн социалон-экономикон æмгуысткæнынады фæдыл æхсæнхицауадон къамисы рабадты, кæцы фæнд кæнынц Мæскуыйы ацы аз марты ауадзын.
РХИ-йы Президент æмæ Хицауады пресс-службæ