Nog adres

Рæзты перспективæтæ ис æмæ сыл дарддæр кусдзыстæм

DSC00041_0.JPG
Ныры дуджы стæм куыстуатыл ис сæмбæлæн, æндæр куыстуæттимæ йæ бастдзинæдтæ кæмæн нæ фехæлдысты базарадон уавæрты конкурентхъом продукци уадзын кæмæн æнтысы, иудзырдæй, æппæт хъомысадæй чи кусы, ахæмыл. Уый уæлдай тынгдæр хауы нæ республикæмæ, кæцыйæн йæ сæудæджерадон объекттæ хæсты æмæ змæст, хæццæ дуджы аххосæй, раууатмæ æрцыдысты. Уыдонæй иутæ бынтондæр нал уæвынц, иннæтæн та абон дæр сæ къæхтыл слæууын, сæ астæу сраст кæнын сæ бон нал у.
Ацы хъуыддаджы амондджын разынд йæ хъысмæт Бæгъиаты суары заводæн. Абон махæн нæ горæты уынгты, магазинты, нæ республикæйы æмæ уымæн æдтейæ дæр базаргæнджыты раз цæст æнæмæнг схæцы, куыстуаты ном чи хæссы, уыцы минералон дон - «Бæгъиатæ»-йыл. Йæ хосгæнæн хиæдтæ рагæй зындгонд сты фæлхасгæнджытæн. Йе «ххуыс» ын банкъарынц хроникон гастриттæ, колиттæ, ахсæны хæлмагниз кæмæн вæййы, йæ маст кæмæн фæриссы, доныхуыппимæ баст низтæй, организмы буарадты ивд куы фехæлы, гепатит æмæ панкреатиты рынчынтæ. Æмæ канд ацы низты тыххæй нæу хъæуæг нуазинаг, фæлæ æнæниз адæймаг дæр нæ базивæг кæны ацы суарæй аназынмæ. Уымæн æмæ зоны, йæ организмæн ын пайда йедтæмæ зион ницы æрхæсдзæн. Уый сбæлвырд кодтой нæ фыдæлтæ алы кæмтты алыгъызон суæртты фарсмæ цæргæйæ æмæ сæ æдзух пайда кæнгæйæ.

Уæдæ алы бон дæр уæййаг цы «Бæгъиаты» дон уынæм, уымæн ацæуæм йæ фæдфæд, æмæ кæм райгуыры, уыцы куыстуаты къæсæрæй бахизæм, фенæм æмæ йын афæрсæм йæ директор Тедеты Роланды абон цы уавæрты архайы куыстуат, уымæй.
- Ды республикæйы иунæг æххæст хъомысадæй кусæг заводы сæргъ лæууыдтæ нæ царды иууыл уæззаудæр дуджы. Куыстуат никуы æрлæууыд йæ кусынæй. Уый нæ, фæлæ уæззау уавæры бахауæг Цхинвалы, стæй æрмæст Цхинвалы нæ, фæлæ хъæуты цæрджыты дæр куы ифтонг кодтат Бæгъиаты минералон донæй. Стæй, ома августы хæсты фæстæ, 2009 азы сæрибар æрцыдтæ дæ бынатæй. Дæ хъуыдымæ гæсгæ дæ цæмæн систой дæ куыстæй æмæ дæ стæй фæстæмæ цæмæн æрцагуырдтой?
- Æз кæддæриддæр мæ хæстæ æххæст кодтон мæ арæхстдзинад æмæ мæ мæ фæлтæрддзинад куыд амыдтой, афтæ. Æмæ мæ кæд систой мæ бынатæй, уæддæр уый мæ фæллойадон архайдимæ баст нæ уыди, хицæуттæ уæд афтæ хуыздæрыл банымадтой, фæлæ заводы хъуыддæгтæ хуыздæрæрдæм куынæ цыдысты, уæд та мæ æрцагуырдтой.
- Роланд, Бæгъиаты завод хъуамæ уаид рентабелон, пайда хæссид паддзахадæн. Уымæн æмæ хъомыс дæтты æрдз йæхæдæг. Афтæмæй та æрмæст 2012 азы йæ хæстæ схызтысты 2 милуан соммæ. Де 'рбацыдæй уавæр куыд ивы?
- Ахæм стыр хæстимæ заводы сæргъ слæууыдтæн 2012 азы кæрон. Уыцы хæстæ бафидыны тыххæй, стæй дæр æргътæ хæрдмæ цæуынц, æмæ йын мах та йæ пластикон мигæнæнтæ, стæй газ дæр таможнæйы сæрты ласæм æмæ иугæр ууылты цæугæйæ æргътæ куы фæфылдæр сты, уæд нæ бахъуыд Бæгъиаты доны аргъ чысыл фæзынаргъдæр кæнын. Уымæн æмæ йæ хæрдзтæ, йæ фиддонтæ бамбæрзын махæн фæзын. Ныртæккæ йыл цы этикеткæ ныхæст ис, уый дæр закъаз кæнæм Дзæуджыхъæуы, уымæн æмæ уым асламдæр лæууы. Ам, нæхимæ типографы, уыцы этикеткæ уадзыны фадат нæй. Гæххæттæй та нын лæууы тынг зынаргъ æмæ, куыд ма загътон, заводыл цы зæронд хæстæ баззад, уыдон фидын хъæуы. Ныртæккæ уал нын бафидын бантыст уыдонæй иу милуан сомæй фылдæр. Стæй дæр завод æфтиаг куынæ дæдта, уæд йæ куыст цы пайда у, хъуамæ уа æфтиагджын.
- Куыд заводы сæргълæууæг, афтæ йын цахæмæй уыныс йæ рæзты перспективæтæ?
- Мах, куыд ма загътон, афтæмæй бацæттæ кодтам бизнес-проекттæ æмæ мæ фидарæй уырны, сæ тыхы куы бацæуой нæ плæнттæ, уæд æнæмæнгдæр куыст йæ бынатæй æмгуырæй кæй фенкъуысдзæнис æмæ пайда кæй æрхæсдзæнис нæ республикæйы экономикæйæн.
БЕСТАУТЫ Валя