Nog adres

Ног ахуыры азмæ - ног скъола

P2070085.JPG
Ахуыргæнæджы зонындзинæдтæй, йæ амындтæй скъоладзау куыд райгонд хъуамæ уа, афтæ райгонд хъуамæ уа скъолайы ахуыры уавæртæй дæр. Ныры дуджы домæнтæн хъуамæ дзуаппдæттой.

Къостайыхъæуы астæуккаг скъола куы ныппырх, уæдæй нырмæ ацы хъæуы скъоладзаутæ ахуыр кæнынц, скъолайы фарсмæ цы цалдæр вагон æвæрд æрцыдысты, уыдоны. Ахуырадон процесс никуы бауагъта фæцудын ацы скъолайы директор Хуыбиаты Зоя. Фæлæ, кæддæры нæргæ Къостайыхъæуæй дæр бирæ цæрджытæ фæлыгъдысты, уымæ гæсгæ сцух ис скъола йæ ахуырдзаутæй. Стæй ма цалдæр азы дæргъы скъолайæн саразын кæй не 'нтыст, уымæ гæсгæ дæр цæрджытæ сæ сабиты горæты скъолатæм кæнын райдыдтой.

Ивгъуыд аз æрæвнæлдæуыд ацы скъола аразынмæ. Фæлæ цалдæр мæйы фæстæ арæзтадон куыстытæ æрлæууыдысты, финанстæ кæй нæ уыд, уый аххосæй. Инвестпрограммæйы фæлгæтты ацы аз цы арæзтæдтæ хъуамæ æрцæуой эксплуатацимæ лæвæрд, уырдæм бахауд Къостайыхъæуы скъола дæр. Æмæ азы райдианæй, ам сцырын сты куыстытæ. Арæзтадон фирмæйы сæйраг инженер Бæззаты Илья куыд загъта, афтæмæй сын куыддæр æхцайы фæрæзтæ рахицæн кодтой, афтæ æрæфтауц кодтой аразынæн сæ цыдæриддæр æрмæг хъæуы, уыдон.

Зымæгон уазал бонтæ скъолайы агъуыст æрæййæфтой æмбæрзтæй. Скъолайы бæстыхай уыдзæн егъау æмæ дзуапп дæтдзæн нырыккон домæнтæн. Иууыл иумæ йæ фæзуат у 2 100 кв. м. Дыууæуæладзыгон скъолайы къултæ амад æрцыдысты агуыри дурæй. Скъолайы ныккæнд дæр у арф æмæ капиталон арæзт. Дыууæ уæладзыджы рудзгуытæ дæр сты гъæдджын пластикæй арæзт. Скъолайы уыдзæнис стыр спортивон зал.
Мах куы фæуазæг стæм скъоламæ, уæд дзы цыд къулсæрдæн æмæ электроны рухсы хæххытæ уадзыны куыстытæ. Ам кусгæ цы кусджыты баййæфтам, уыдон райгонд уыдысты арæзтадон фирмæйы къухдариуæггæнджытæй, рæстæгыл сын куыстмызд кæй фидынц, уымæй.
Арæзтады сæйраг инженер куыд загъта, афтæмæй скъола эксплуатацимæ лæвæрд æрцæудзæнис сæрды, цæмæй ног ахуыры аз Къостайыхъæуы скъоладзаутæ бацæуой ногарæзт агъуыстмæ.
УАЗÆГТЫ М.