Nog adres

«Комкоммæ ныхас»

Советон Цæдис куы ныппырх æмæ Уæрæсе йæхæдæг дæр тыхст æмæ уæззау уавæры куы бахаудта, уæд чысыл Хуссар Ирыстон иунæгæй, сидзæргъуызæй аззади æмæ йæм гуырдзиаг тыхæйисджытæ алырдыгæй куы лæбурдтой, хуссарирыстойнаг цæрджытæн алы фыдмитæ куы кодтой æмæ сын алыгъуызон блокадæтæ куы арæзтой, уыцы нымæцы информацион блокадæ дæр, уæд тыхст адæм бæргæ фæдисы хъæр кодтой куыд Уæрæсемæ, афтæ æгас дунемæ дæр, фæлæ йын æппындæр йæ тыхст æмæ фæдисы хъæр ничи хъуыста.

Хуссарирыстойнаг цæрджытæ уыцы рæстæджы цух бирæ цæмæйдæрты баййæфтой, фæлæ абон æппæт уыдоныл нæ дзурдзынæн.

Мæ зæрдыл арæх æрлæууы иу цау, дæргъвæтин информацион блокадæйы фæстæ Цхинвалмæ Цæгат Ирыстонæй ног мыхуыры фæрæзтæ куы æрластой, уæд сæм адæм рады лæууыдысты, сау, задыны хуызæн дзулмæ-иу стыр рады куыд лæууыдысты, афтæ. Уæды хуызæн æй никуы бамбæрстон, адæймагæн хойрагæй æххормаг куыд вæййы, афтæ йын æххормаг кæй вæййы информацион фæрæзтæй дæр. Раст уымæ гæсгæ-иу газеттæ цы машинæйыл уыдысты, уырдæм-иу адæм лæбурдтой æмæ-иу газет кæй фæцис, уый-иу йæхицæй амондджындæр никæй уал æнхъæлдта æмæ-иу æй цингæнгæ фæцæйскъæфта. Кæй зæгъын æй хъæуы, газеттæ-иу алæкæйы фаг не систы æмæ-иу сæ уымæ гæсгæ зонгæтæ кæрæдзийы къухтæй истой исты ног хабар бакæсыны охыл. Адæмы уæлдай тынгдæр цымыдис кодта Хуссар Ирыстоны тыххæй Уæрæсейы мыхуыры фæрæзты цы фыстой, уыдон.
2008 азы августы тугкалæн хæсты дæр Цхинвалыл нæ «хорзмæбæллæг» сыхæгтæ пайда кæныны бар кæмæй нæй, ахæм кассетон бомбæтæ куы калдтой, алыгъуызон егъау хæцæнгæрзтæй йæ æнæвгъау æмæ æгъатырæй куы æхстой, уæд, кæй зæгъын æй хъæуы, ныскъуыдтæ сты электроны хæххытæ дæр æмæ та цасдæр рæстæджы дæргъы баззадыстæм информацион блокадæйы, нал дæр телевизормæ кастыстæм æмæ нал дæр нæ телефонтæ куыстой. Сыхæгтæй-иу электрогенераторы руаджы рухс кæмæ ссыгъд, уырдæм-иу лыгъдысты иннæтæ дæр телевизормæ бакæсынмæ.
О, фæлæ 2008 азы 26-æм августы Уæрæсейы Федераци Хуссар Ирыстоны хæдбардзинад куы банымадта, уæдæй фæстæмæ нæ царды уавæртæ цæхгæр фæхуыздæр сты. Ныртæккæ куыд Хуссар Ирыстоны мыхуыры фæрæзтæ, афтæ уæрæсейаг прессæ дæр хæццæ кæны нæ республикæйы дæрддаг районтæ æмæ хъæутæм дæр. Нæ царды уавæртæ кæд бирæбæрцæй хуыздæрырдæм фæивтой, уæддæр иуæй-иутæй айрох вæййынц раздæры рæстæджы тыхст цæрдтытæ æмæ арæх фехъусæн вæййы ахæм ныхæстæн, зæгъгæ, мыхуыры фæрæзтæ нæ исæм постхæссæг нын кæй нæй, уымгæ гæсгæ. Æрæджы телерадиокомпани «ИР»-ы алæвæрд «Комкоммæ эфиры» уазæг уыд РХИ-йы Мыхуыр æмæ информацийы комитеты сæргълæууæг Гобозты Вячеслав æмæ йæм эфиры рæстæджы Знауыры районæй фæдзырдта иу адæймаг æмæ йын фехъусын кодта, зæгъгæ, газеттæ нæ рафыссынц, постхæссæг сæм кæй нæй, уый аххосæй. Ахæм ныхæстæ æнæразы-дзинад сæвзæрын кодтой РХИ-йы постон-телеграфон службæйы генералон директор Хуыгаты Анатолимæ:
- Нæ республикæйы иуæй-иу хъæу-тæй нæм æрæхъуысы ахæм информаци, зæгъгæ, газеттæ рæстæгыл нæ исæм, кæнæ та газеттæ нæ рафыстон постхæссæг нын кæй нæй, уый аххосæй. Уый фæдыл цы зæгъдзынæ?
- Уыцы ныхæстæ раст не сты. Нæ телеграфон-постон службæ «Почта России»-имæ æмгуысткæнынады тыххæй бадзырд куы бафыста, уæдæй фæстæмæ нæ хъуыддæгтæ бирæ фæхуыздæр сты. Абон нæ республикæйы ис 19 постон хайады: Цхинвал æмæ Къуайсайы, районты - 4 æмæ нæм 13 та ис хъæууон хайадтæ. Кæй зæгъын æй хъæуы, алы чысыл сыхы, ома, цыппар-фондз цæрæджы кæм ис, уыдонæн сæрмагонд постхæссæг снысан кæнын нæ бон нæу, фæлæ алы хъæууон администрацийы территорийыл дæр ис дыууæ-æртæ постхæссæджы. Уыдон хæсджын сты, цæмæй постон æрвитæггæгтæ рæстæгыл хæццæ кæной адресаттæм алы чысыл сыхмæ дæр…
- Редакцимæ вæййы ахæм сигналтæ дæр, зæгъгæ, нæм газеттæ хæссынц, фæлæ къуырийы мидæг иу кæнæ дыууæ хатты, ома, къонагай, ног хабæрттæ куы базæронд вæййынц, уæд?
- Ахæм ныхæстæ чи дзуры, уыдон дæр раст не сты. Иумиагæй сисгæйæ, мыхуыры фæрæзтæ афойнадыл хæццæ кæнынц районтæм. Районон центрты æмæ нæ республикæйы хъæуты цæрджытæ республикон газеттæ райсынц, мыхуыры цы бон ра-цæуынц, уыцы бон. Чысыл афæстиатимæ прессæ райсынц ахæм районтæ, куыд зæгъæм, Синагуры зонæ æмæ Ленингоры район, дæрддзæф кæй сты, уымæ гæсгæ.
- Арæх фехъусæн ис ахæм ныхæстæн дæр, зæгъгæ, тæрхондæтты хъусынгæ-нæн гæххæттытæ рæстæгыл нæ фæхæццæ кæнынц адресаттæм посты кусджытæ?
- Постон службæ систематикон æгъдауæй адресаттæм хæссы тæрхондæтты хъусынгæнæн гæххæттытæ (извещение). Арæх уыдоны тыххæй дæр бахауæм конфликтон уавæрты, чи зæгъы, рæстæгыл æй нæ райстон, чи та - бынтондæр æй нæ райстон, зæгъгæ. Уый аххосæй тæрхондæтты куыст къуылымпы ‘рцæуы, бахъæуы тæрхондонон процесс аргъæвын. Чи вæййы аххосджын? Нæ адресат, тæрхондонмæ кæй фæхонынц, уый, газеткæсæг æви постхæссæг?
Цæмæй ацы æмæ бирæ æндæр фарстытæн раст дзуаппытæ радтæм, цæмæй нæ куыст æмбæлон æгъдауыл цæуа, уый тыххæй сфæнд кодтам Хуссар Ирыстоны постон бастдзинады «Комкоммæ ныхас» ныббиноныг кæнын.
Цыбырдзырдæй, посты куысты фæдыл фиппаинæгтæ, зæгъинæгтæ кæмæ уа, уый нæм-иу æрбадзурæд мæнæ ахæм телефоны номыртæм:
1. Службæйон телефон: 45-53-70.
2. Мобилон телефон: 8-929-808-09-39.
Зынаргъ æмбæстæгтæ! Æрмæст уæ фæдзæхсæм, ацы телефонтæм чи дзура, уый хъуамæ зæгъа йæ мыггаг, ном æмæ фыды ном, адрес æмæ мобилон телефоны номыр. Анонимон фæдзырдтытæ нысан нæ цæудзысты.
ДЖИОТЫ Екатеринæ