Nog adres

Февралæй фæллойадон пенситæ фæфылдæр уыдзысты 6,5 проценты

1-æм февралæй уæрæсейæгты фæллойадон пенситæ фæфылдæр уыдзысты 6,5 проценты, æмæ 1-æм апрелæй та - ноджы 5 проценты. Пенситы астæуккаг бæрц суыдзæн 11, 4 мин сомы. Уый тыххæй фехъусын кодтой Уæрæсейы Пенсион фонды пресс-службæйы.
Индексаци æрцæудзысты 37,8 милуан уæрæсейаг пенсиисæджы пенситæ. Уый æдтейæ ма фæфылдæр уыдзысты 0,6 милуан æфсæддон пенсиисæджы пенситæ дæр, кæцытæ службæ фæуыны фæстæ кодтой æмбæстагон куыст. Уыдонæн бар ис «æфсæддон» пенсиимæ иумæ дыккаг, фæллойадон пенси дæр исын (йæ базæйон бæрцы йедтæмæ).

2014 азы августы уагъд æрцæудзæн традицион фæлхыгъд, кусгæ чи кæнынц, уыцы пенсиисджыты фæллойадон пенситæ, - зæрдыл æрлæууын кодтой Уæрæсейы Пенсион фонды.
Уыимæ афæдзы дæргъы уæрæсейæгты пенсион ифтонгкæнынады минималон бæрц нæ уыдзæн фæцæрæн минимумæй ныллæгдæр, цы ран цæры, уыцы регионы. Чи нæ кусы, уыцы пенсиисæджы пенси фæцæрæн минимумæй ныллæгдæр куы уа, уæд ын æвæрд æрцæудзæн социалон уæлфиддæн.