Nog adres

Уырыссаг æвзаджы рæзтæн

obrazovanie.jpgГуманитарон ахуырады нырыккон проблемæтыл уынаффæ кодтой зонадон семинары, кæцы уагъд æрцыд 22-23 январы Цхинвалы зонад æмæ культурæйы Уæрæсейаг центры. Мадзал уагъта Мæскуыйы паддзахадон педагогон университет «Россотрудничество»-йы æххуысæй.
Семинары нысан у фæсарæнты уырыссаг æвзаджы рæзт. Семинары хайад райсынмæ Хуссар Ирыстонмæ æрцыд Мæскуыйы паддзахадон педагогон университеты делегаци — психологийы кафедрæйы профессор Заграт Айгумова, уырыссаг æвзаджы кафедрæйы доцент Алек-сандр Грищенко, фæсарæйнаг ахуыргæнинæгтимæ куысты фæдыл хайады хистæр Сергей Алдошин. Семинары куысты хайад райстой РХИ-йы УФ-йы уæлвæткон æмæ æххæстбарджын минæвар Къарджиаты Эльбрус, «Россотрудничество»-йы къухдариуæггæнæг Михаил Степанов, Хуссар Ирыстоны уырыссаг æвзаг æмæ литературæйы ахуыргæнджыты Ассоциацийы президент Тедеты Зæлинæ, Хуссар Ирыстоны паддзахадон университеты студенттæ æмæ республикæйы скъолаты ахуыргæнинæгтæ.

Семинары хъусджытæ байхъуыстой социолингвистикæ, этнолингвистикæ æмæ психологийы фæдыл цымыдисон лекцитæм, докладгæнджытæ дзырдтой этнокультурон компетентондзинады проблемæты тыххæй. Мадзалы фæлгæтты ма уагъд æрцыдысты сфæлдыстадон, практикон æмæ семинарон ахуыртæ. Хис-тæркъласонтæм стыр цымыдисдзинад сæвзæрын кодта семинары уагъдæрцæуæг Мæскуыйы паддзахадон педагогон институты презентаци. Скъоладзауты базонгæ кодтой уæлдæр ахуыргæнæндæттæм бацæуыны æмæ ахуыр кæныны уавæртимæ, фæсарæйнаг студенттимæ куысты алыгъуызон формæтимæ.
Семинары кæрон Михаил Степанов зæрдылдарæн сертификаттæ радта дунеон конкурс «Лучший учитель русской словесности зарубежья»-йы хуссарирыстойнаг хайадисджытæн æмæ конкурсы финалисткæ — Цхинвалы 5-æм астæуккаг скъолайы уырыссаг æвзаг æмæ литературæйы ахуыргæнæг Мулдарты Аллæйæн та -«Россотрудничество»-йы къухдариуæггæнæг Константин Косачевы арфæйы адрес.
Мадзалы хайадисджытæ æмæ Уæрæсейы зонад æмæ культурæйы центры уазджытæн сæ бон ссис фойейы æвæрд центры нывты равдыст «Россия — мировая научная держава»-имæ базонгæ уæвын.