Nog adres

Цæгат Ирыстоны

vlad..jpg
МОТОЦИКЛТЫЛ – ФÆДИСМÆ
Фыдбылыз æмæ æнамонддзинады бахауæг тыхст адæмæн рæстæгыл баххуысы тыххæй диссаджы мадзал æрхъуыды кодтой республикæйы разамынд æмæ Æнæнхъæлæджы уавæрты министрад. Хъуыддаг уый мидæг ис æмæ нырæй фæстæмæ экстренон æмæ оперативон уавæрты æххуысмæ дæ фарсмæ æрбалæудзысты… мотоциклтыл æмæ мотовездеходтыл. Æмбæхсинаг никæмæн у, Тагъд æххуысы машинæ æмæ пъæлицæ бахъуаджы сахат алыхатт бынатмæ рæстæгыл кæй нæ фæзынынц, уый. Уыцы хъуагдзинад ныр æххæст æрцæудзæн ацы ногдзинадæй. Ома, уыдзысты уæлæмхасæн æххуыс. Мототранспортыл ирвæзынгæнджытæ хæсдзысты патрулон рад. Æппынæдзух зилдзысты горæты уынгты, семæ уыдзæн бастдзинад. Транспортæн уыдзæн цыфæнды зынбахауæн рæттæм дæр бацæуæн, ифтонг уыдзысты зынгхуыссынгæнæн æмæ фыццаг медицинон æххуыс бакæныны тыххæй æнæмæнгхъæуæг æрмæджытæй. Иуныхасæй, мототранс-портыл ирвæзынгæнджытæ уыдзысты дохтырты æмæ пъæлицæйы хуыздæр æххуысгæнджытæ. Ныртæккæ уал Æнæнхъæлæджы уавæрты министрадмæ æрвыст æрцыд дыууæ мотовездеходы, рæхджы райсдзысты иннæты дæр.

Бафиппайын хъæуы уый æмæ мототранспортыл бадæг ирвæзынгæнджытæ æнæмæнг хъуамæ рацæуой сæрмагонд ахуыр Гостехнадзоры æмæ радтой фæлварæнтæ. Кусæн сын ис æрмæстдæр официалон барлæвæрдимæ сæрмагонд экипировкæйы.
park.jpg
НОГ ПАРКÆН – НОМ
Дзæуджыхъæуы цы бирæ ног арæзтадтæ цæуы, уыдонæй иу у, горæтмæ æрбацæуæны раздæры базар “Фæллой”-ы бынаты цы улæфæн парк аразынц, уый дæр. 30 мин квадратон метры чи у, уыцы парчы арæзтадæн бындур æвæрд æрцыд, бауагътой йæм электрон тых, газ, дон, рæхджы райдайдзысты сæйраг куыс-тытæ, фæлæ паркæн хуыздæр ном æрхъуыды кæныныл ныхас рагæй цæуы. Цæмæй адæмы фæндонмæ гæсгæ æвзæрст æрцæуа, уый тыххæй Дзæуджыхъæуы администрацийы сæргълæууæг Дзантиаты Сергей расидт конкурс хуыздæр ном æрхъуыды кæныны тыххæй. Мæйæ фылдæр цы бирæ бавдыстытæ фæцыд, уыдоны 'хсæн уыдысты алыхуызон нæмттæ: «Ирыстон», «Сæуæхсид», «Задалескъы Нана», «Уæлахиз», «Олимпийский», Ирыстоны зынгæ адæймæгты номыл, фæлæ уыдонæй финалмæ бацыд æртæ. Уыцы æртæйæ хуыздæрты хуыздæр разынд ном «Олимпийский». Уыцы уынаффæ сфидар кодтой, æрæджы администрацийы цы 'мбырд уыд, уым. Ныр ног парк арæзт æмæ фæлгонцгонд æрцæудзæн тематикон символикæмæ гæсгæ. Йæ сæйраг фæзы арæзт æрцæудзæн Ирыстон æмæ нæ бæстæйæн кад æмæ ном чи скодта, уыцы Олимпаг чемпионты аллея сæ портреттимæ. Уыдзæн дзы алцæмæй æххæст улæфæн бынæттæ, спортивон æмæ сывæллæтты хъазæн фæзтæ, тренажерты æмæ фитнес клубтæ, дукани, хæрæндон, машинæты лæууæн… Ног парчы сагъд æрцæудзæн 800 алыхуызон талайы.
Горæты мэр Дзантиаты Сергей куыд фехъусын кодта, афтæмæй парк горæты æрбахизæны кæй ис, уый тыххæй йæ уындзысты фылдæр адæм, цы бирæ уазджытæ нæм цæуы, уыдоны цæст хъуамæ рæвдауа. Фæлæ ноджы ахсджиагдæр та у, йæ ном йæ нысаныл кæй сæмбæлд, уый. Ирыстоны тынг бирæ зындгонд спорт-сментæ ис, уыимæ Олимпаг чемпионтæ дæр æмæ сын хъуамæ кад кæнын фæразæм.
Нæ уацхæссæг