Nog adres

Фыссынц нæм

ЦЪИНАГАЙРÆГТÆ ДÆР
БАНЫСАН КОДТОЙ НОГАЗОН БÆРÆГБОНТÆ

Иннæ азтæм абаргæйæ, ацы ног азы бæрæгбонтæ банысан кæныны тыххæй Цъинагары зонæйы хъæутæн фылдæр æхцайы фæрæзтæ рахицæн кодта Ленингоры районы администраци. Куыд, зæгъæм, Захъор, Монастъер, Абреу, Дзукъаты хъæуты клубтæн, Орчъосан æмæ Цъинагары культурæйы хæдзæрттæн. Ацы хъæуты уагъд æрцыдысты ногазон мадзæлттæ, афтæ ма æрæвæрдтой адджын фынгтæ дæр.
Сæйраг ногазон назбæлас æвæрд æрцыд Цъинагары хъæууон администрацийы кæрты. Назбæлас уыд тынг рæсугъдвæлыст, йæ алыварс 14 боны дæргъы æмбырд кодтой скъоладзаутæ, хъæуы фæсивæд æмæ æрвыстой хъæлдзæг рæстæг. Ногазон назбæлас цытджын æгъдауæй бакодта Цъинагары культурæйы хæдзары директор Бестауты Емзар, кæцы ма сывæллæттæн бакодта ногазон лæвæрттæ дæр. Цъинагармæ ногазон улæфтыты рæстæджы Цæгат Ирыстонæй æрцыдысты ацы хъæуæй ацæугæ фæсивæд æмæ уыдон дæр хайад райстой ногазон мадзæлтты, зæрдылдарынæн фæистой нывтæ ногазон назбæласы цур. Ногазон мадзалы раныхас кодта æмæ хъæуы цæрджытæн зæрдæбын арфæтæ ракодтой Ленингоры районы администрацийы сæргълæууæджы фыццаг хæдивæг Гуссойты Ласко æмæ районы ахуырады хайады сæргълæууæджы хæдивæг Быценты Нугзар.

Уый фæстæ та Хуриты Гивийы номыл Цъинагары астæуккаг скъолайы уагъд æрцыд ногазон карнавал, кæцыйы амыдта Хъодалаты Аннæ. Скъолайы алкæцы кълас дæр йæхи бацæтæ кодта тынг хорз æмæ хайад райста карнавалы. Мадзаламонæг банысан кодта, зæгъгæ, ацы ног аз нын уæлдай банысангæнинаг у, уымæн æмæ нырæй фæстæмæ не скъола хæсдзæн йæ радтæг адæмы аккаг фырт Хуриты Гивийы ном. Ногазон карнавалы Митын Дада уыд Хуриты Сослан æмæ Митын чызг та Гуссойты Алисæ. Уыдон сывæллæттæн бакодтой ногазон лæвæрттæ дæр.
УАЛЫТЫ Зоя,
Цъинагар

РАЙГОНД СÆ СТЫ
ЦÆРДЖЫТÆ

Мæнгæй нæ фæзæгъынц, дæхицæн куыд зæрдæбынæй бакусай, афтæ искæмæн нæ бакусдзынæ. Уымæн æвдисæн - Знауырмæ цы сосæ фæндаг арæзт æрцыд, уый. Зæрдæ рухс кæны йæ уындæй. Фæндаджы рæсугъддзинадмæ ма ноджыдæр рæсугъддзинад æфтауынц, фæндаджы фæрсты цы рухсы цæджындзтæ арæзт æрцыдысты, уыдон. Ацы фæндаг аразыныл та зæрдæбынæй бакуыстой бынæттон цæрджытæ. «Дорэкспострой»-ы Знауыры районы фадыджы хистæр Козаты Ушанг æмæ йе 'мкусджытæ Зассеты Гурам, Зассеты Нодар, Мамиты Маирбег æмæ Козаты Ацæмæз. О, фæлæ уыцы рæсугъддзинад нæ уынынц нæ адæмæй бирæтæ æмæ, горæтмæ цæугæйæ, кæнæ горæтæй здæхгæйæ, сæ брæттæ бавæрынц машинæйы æмæ сæ аппарынц сосæ фæндаджы фæрсты. Афтæмæй фыдуынд кæнынц, афтæ тынг кæмæ бæллыдыстæм, уыцы сосæ фæндаг. Зын у, цы фæндагыл фæфыдæбон кодтой, йæ схæрзарæзт кæныныл йæ уд чи хъардта, уыцы аразджытæн фæндаг ахæм уавæры уынын æмæ уæлдæр цы лæппуты кой ракодтон, уыдон тынг арæх голджыты фæуидзынц уыцы брæтты æмæ сæ аласынц æмбæлон бынатмæ. Цыма ацы брæттæ уым чи аппары, уыдон кæд бамбардзысты, сыгъдæгдзинад иуæй рæсугъдддзинад у, иннæмæй та - æнæниздзинад.
Ацы фæндаг куы арæзтой, уæд дзы арæзт æрцыд автобустæм æнхъæлмæкæсæн бынæттæ дæр. Фæлæ ахæм æнхъæлмæкæсæн бынат арæзт не 'рцыд Бехъмары хъæуы. Ныр æрæджы ахæм æнхъæлмæкæсæн бынат арæзт æрцыд Бехъмары хъæуы дæр æмæ Хъорнис, Цъорбис, Ходабул, Сихиат æмæ æндæр хъæуты цæрджытæ хъызт, къæвда бонты нал æвзардзысты зындзинæдтæ. Ацы æнхъæлмæкæсæн бынатмæ æввахс ма ам ис дыууæ магазины дæр æмæ уыдонмæ дæр цæуынц бирæ адæм.
КОЗАТЫ Зауыр,
Бехъмары хъæуы цæрæг