Nog adres

Спорт | Бокс | Уæгъдибар хъæбысхæст

murat_11.jpg

Бокс

Хуссарирыстойнаг профессионалон боксер Гасситы Мурат радон хатт рингмæ рахиздзæн 1-æм февралы. Уæд Гассийы фырт бельгиаг тыхджын боксер Исмаил Абдулимæ фембæлды тох кæндзæн дунеон боксы федерацийы версимæ гæсгæ Европæйы чемпионы титулыл. Тох уыдзæн 12 раундон. Банысан кæнын хъæуы уый, æмæ РХИ-йы æмæ УФ-йы сгуыхт тренер Сланты Виталийы 20-аздзыд хъомылгæнинаджы ныхмæлæууæг профессионалон рингыл кæй акодта 80 тохы, уыдонæй фæуæлахиз 66 тохы, кæцытæй 44 рамбылдта нокаутæй. Гасси-ты Мураты ацы тохмæ цæттæ кæныны фыццаг этап уагъд æрцыд Дзæуджыхъæуы. Мурат уым ауагъта фыццаг спарринг. Уый 8 раундон тохы фембæлд зындгонд боксер Мурад Халидовимæ. Алы раунды дæр Мурат архайдта хуыздæр. Дыууæ хатты та йын бантыст Халидовы ногдауны арвитын.
«Кæд Халидов 15 кг уæззаудæр уыд, уæддæр Муратæн йæ цæфтæ тыхджындæр уыдысты», — банысан кодта Сланты Витали.
Ныр Мурат йæ тренеримæ атахт Челябинскмæ, цыран тренировкæтæ уадзынæн ис æппæт уавæртæ дæр. Уым ма Гассийы фыртæн арæзт æрцæудзæн цалдæр спаррингы.

* * *
Дзæуджыхъæуы уагъд цыдис клуб «Боец»-ы призтæ рамбулыны сæраппонд турнир. Ерысты дыууæ сыгъзæрин æмæ иу æвзист майданы рамбылдтой цхинвайлаг боксертæ. 60 кг уæзы категорийы иууыл тыхджындæр уыд Санахъоты Аслан, уый финалы фæуæлахиз Дзæуджыхъæуы минæварыл. 91 кг уæзы категорийы аккаг ныхмæлæууæг нæ разынд Сиукъаты Аланæн. Уый та финалы техникон нокаутæй рамбылдта Кировы районы боксеры. Æвзист майданимæ Цхинвалмæ æрæздæхт Бæззаты Тамерлан.
Спортсменты бацæттæ кодтой тренертæ Гæбæраты Гамлет æмæ Хаситы Владислав.
«Сæрмагондæй мæ фæнды рахицæн кæнын Бæззаты Тамерланы. Уый ерыс кодта йæхицæй хистæрдæр боксертимæ, фæлæ уæддæр йæ бон ссис майдан рамбулын», — банысан кодта Гæбæраты Гамлет. Уый ма бузныг загъта ерысты организатор Плиты Робертæн хорз сæ кæй райстой, уый тыххæй.

Уæгъдибар хъæбысхæст

4 сыгъзæрин, иу æвзист æмæ иу та бронзæ майданы рамбылдтой хуссарирыстойнаг богалтæ Цæгат Ирыстоны Горæтгæроны гом чемпионаты æвзæнгты ’хсæн. Ерысты уæлахиздзаутæ систы Бикойты Олег, Келеты Алыксандр, Джиоты Азæмæт æмæ Бекъойты Вадим. Æвзист майданы хицау баис Дзæгъиаты Сослан, бронзæ майдан та рамбылдта Зассеты Азæмæт. Спортсменты бацæттæ кодтой тренертæ Джыгкайты Роберт, Тедеты Мурат, Хъесаты Петр, Бестауты Мурат, Багаты Вадим æмæ Коцты Тамерлан.
ХУРИТЫ Батрадз