Nog adres

Хæрзаудæн акци

Нæ горæты зæрæдты хæдзар «Забота»-йы не 'мбæстæгтæй цы æвæгæсæг æмæ рынчын адæймæгтæ ис, уыдоны арæх бабæрæг кæнынц нæ республикæйы бирæ уагдæтты кусджытæ æмæ хицæн цæрджытæ дæр. Арæх сын равдисынц концерттæ аивадон къордтæ дæр æмæ сын иу цъус рæстæджы айрох кæнын кæнынц сæ уæззау царды мысинæгтæ.
Ног азы размæ хæрзаудæн акциимæ ацы пансионаты æвæгæсæг адæймæгты бабæрæг кодтой Цхинвалы бирæпрофилон колледжы студенттæ сæ ахуыргæнджытимæ. Бирæпрофилон колледжы баконд æрцыд кулинарон факультет дæр, кæцыйы студенттæ ныртæккæ цæуынц лабораторон-практикон ахуыртæ. Уыдон сæ ахуыргæнæг Цоциты Фатимæимæ сцæттæ кодтой хæрзад хæринæгтæ, уыцы нымæцы ирон уæливыхтæ дæр æмæ дзаджджын хуынимæ фæуазæг сты пансионат «Забота»-мæ. Студенттæй сæ иу та скодта тынг рæсугъд торт. Пансионаты цæрæг зæронд адæймæгтæн тынг æхсызгон уыд, кæй сыл аудынц, уый æмæ дзы бирæтæн сæ цæсгæмттыл цины цæссыгтæ дæр æрхъуызыдысты.

Кондадон ахуыры фæдыл колледжы директоры хæдивæг Козаты Гюльнарæйы ныхæстæм гæсгæ, уыдон фæнд кæнынц ахуыры азы æппынкъаддæр дыууæ хатты ахæм хæрзаудæн акцитæ аразын пан-сионат «Забота»-йы цæрджытæн.
Джиоты Е.