Nog adres

Амард легендарон конструктор

16RIAN_00092067.LR_.ru_.jpg
Ижевскы 94-аздзыдæй йæ цардæй ахицæн зындгонд советон æмæ уæрæсейаг конструктор, легендарон хæцæнгарзаразæг Михаил Калашников.

Михаил Калашников райгуырд 1919 азы 10-æм ноябры, Алтайы губернийы Курьяйы хъæуы. Æвзонг лæппуйæ, æфсады службæ кæнгæйæ, уый сарæзта танкты моторесурсты хынцæн прибор, кæцы рекомендацигонд æрцыд массон рауагъдмæ. Инæлар (фидæны маршал) Георги Жуковимæ беседæйы фæстæ æрвыст æрцыд Киевы танкон ахуыргæ-нæндонмæ ахæм хуызтæ саразыны тыххæй. 1941 азы Михаил Калашников ацыд хæстмæ хистæр сержанты номимæ, цыран командæ кодта танктыл. Уæззау цæфы фæстæ фидæны конструктор бахауд госпиталмæ æмæ йæм уæд фыццаг хатт æрцыд йæхи сæрмагонд хæцæнгарз саразыны идея, кæцы йын сном кодта æнæхъæн дунейы.
Михаил Калашников йæ автомат сконструкци кодта 1947 азы, кæцыйыл æвæрд æрцыд йæ ном. Æдæппæтæй дунейы æмбырд æрцыд 70 милуан автоматæй фылдæр.
Ныртæккæ Калашниковы автоматæй пайда кæнынц дунейы 100 бæстæйæ фылдæры гарзджын тыхтæ. Автоматы йедтæмæ ма, Калашников сконструкци кодта цуангæнæн хæцæнгарз, пистолеттæ æмæ пулеметтæ.

Калашниковы автомат бацыд 20-æм æнусы зынгæдæр æрымысæггæгты номхыгъдмæ.
Михаил Тимофейы фырт Калашников дыууæ хатты хорзæхджын æрцыд Социалистон куысты хъайтары номæй, 2009 азы та легендарон конструктор ссис Уæрæсейы Федерацийы хъайтар. Уый ма у Ленин æмæ Паддзахадон премиты лауреат, афтæ ма йын лæвæрд æрцыдысты Ленины æртæ ордены, Октябры революци, Фæллойы Сырх Тырысайы ордентæ æмæ бирæ æндæр хорзæхтæ.