Nog adres

Ардбахæрд/ «УÆЛАХИЗ УÆД ИРЫСТОН!»

IMG_1403.JPG
Лæппуйы гуырдмæ бæллæг ирон адæммæ ноггуырд лæппуйæн кæддæриддæр сæ сæйраг арфæ уыд, цæмæй дзы афицер лæг рацæуа. Æнусты дæргъы алы æмæ алы хæстыты къаддæрæй-къаддæр кæй нымæц кодта, уыцы ирон адæм куыднæ хъуамæ бæллыдаиккой лæппуйы, мыггаг дарддæргæнæджы фæзындмæ, стæй дзы хæстон лæг, йæ Фыдыбæстæйы хъахъхъæнæг лæг рацæуа, уымæ! Афтæ уыд советон дуджы дæр, ирон адæмæн æддагон знаджы ныббырстæй тас куы нал уыд, уæддæр æнæмæнгхъæуæгыл нымадтой, цæмæй алкæй фырт дæр йæ хæс бафида Райгуырæн бæстæйы раз, гарзджын тыхты баслужбæ кæнгæйæ. Æгæрыстæмæй чындздзон кары чызджытæ дæр æргом дызæрдыгимæ кастысты, æфсады чи нæ баслужбæ кодта, уыцы усгур лæппутæм, сæхи сыл тигъ кодтой.
Нæ иумæйаг бæстæ куы ныппырх, уæд Ирыстоны лæппутæм нал хауд Советон æфсады службæ кæныны хæс. Уыйхыгъд сæ бахъуыд нæхи, нæ чысыл Райгуырæн бæстæйы бахъахъхъæнын. Нæхи æфсад нын куы фæзынд дзæнæттаг Хуыбылты Валерийы хъæппæрис æмæ иузæрдион архайды фæрцы, уæд та, уæлдайдæр - алы æвзонг ирон лæппу дæр бæллыд æмæ бæллы Фыдыбæстæйы раз йе 'мбæстагон хæс бафидынмæ. Уый тыххæй нæм ссис традицион бæрæгбоны хуызæн афæдз дыууæ хатты ног æрсидтонты æфсæддон ардбахæрды церемони.

Ацы азы фæззыгон æрсидты æвзонг æфсæддонтæн дæр ахæм уавæры уыд сæ ардбахæрд. 22 ноябры нæ республикæйы столицæ Цхинвалы Хъайтарты аллейæйы райсомæй уыд бæрæгбонвæлыст. Ардæм æрбацыдысты республикæйы разамынад æмæ Хъахъхъæнынады министрады минæвæрттæ, ног æрсидтонты ныййарджытæ, министрады дæлхæйттæ æмæ кадетон скъолайы курсанттæ. Хъахъхъæнынады министрады штабы хистæр Цъæритты Тамерлан рапорт радта министры хæдивæг инæлар-лейтенант Гассеты Ибрагиммæ, æрсидтонтæ ардбахæрдмæ цæттæ кæй сты, уый тыххæй. Республикæ Хуссар Ирыстоны паддзахадон гимны айзæлды фæстæ æвзонг æрсидтонтæй алчи дæр ард бахордта, Райгуырæн бæстæйы æдасдзинад, йæ суверенитет æмæ территориалон æнæхъæндзинад кæй хъахъхъæндзæнис цæсгомджын æмæ æнæзæрдæхудтæй. Ардбахæрды фæстæ-иу сæ алчи дæр загъта: «Уæлахиз уæд Ирыстон!»
Æрсидтонтæн нæ республикæйы Президент, Хицауад æмæ йæхи номæй арфæйы ныхæстæ загъта Республикæ Хуссар Ирыстоны Æдасдзинады советы нымæрдар Плиты Анатоли:
«Абон ацы æрыгон лæппутæн у бæрндзинады бон - уыдон суыдзысты фыдыбæстæйы хъахъхъæнджытæ æмæ ацы бонæй фæстæмæ се 'взонг уæхсджытыл æрæнцайдзæн Райгуырæн бæстæ хъахъхъæныны хæс. Уый та у бæрнон æмæ хæрзиуæгон хъуыддаг», - банысан кодта Плиты Анатоли.
Ног æрсидтонтæн сæ ныййарджыты номæй раарфæ кодта Кокойты Вандæ, йæ цæст сын бауарзта сабыр арвы бын службæ кæныны амонд æмæ дарддæры хæрзиуджытæ.
«Ацы бон сымахæн у æрмæст бæрнон нæ, фæлæ циндзинады бон дæр. Арфæгонд ут, кад æмæ цытимæ цы сæххæст кæнат уе 'фсæддон хæс, ахæм амонд уæ уæд!», - загъта Кокойты чызг.
Ардбахæрды церемонийы фæстæ æрсидтонтæ азарыдысты Республикæ Хуссар Ирыстоны паддзахадон гимн.