Nog adres

Пресс-конференци | Рæзы консулон лæггæдты гуырахст

Республикæ Хуссар Ирыстоны Уæрæсейы Федерацийы минæварады консулон лæггæдтæ кæны консулон хайад. Хайады сæргълæууæг Зассеты Тамерлан Информаци æмæ Мыхуыры комитеты дунеон пресс-центры информацион фæрæзты минæвæрттимæ фембæлды рæстæджы æрдзырдта УФ-йы минæварад Хуссар Ирыстонæн цы консулон лæггæдтæ кæны, æппæт уыдон фæдыл.
Уæрæсейы Федерацийы Фæсарæйнаг хъуыддæгты министрады бахæсмæ гæсгæ Хуссар Ирыстоны территорийыл 2008 азы 14 сентябры конд æрцыд рæстæгмæ консулон пункт. Консулон лæггæдты гуырахст уæд къаннæг уыд - куыстой фæсарæйнаг æмбæстагдзинад æвдисæг паспорттæ æмæ пенсион кары æмбæстæгты паспорттæ ивыныл, УФ-йы æмбæстæгты æнахъом сывæллæттæн æмбæстагдзинад дæттыныл.
Уый фæстæ 2009 азы апрелы мæйы Уæрæсейы Федерацийы минæварад Хуссар Ирыстоны куы байгом, уæд консулон хайад ссис минæварады дæлхай æмæ æрæвнæлдтой консулон лæггæдты æххæст спектр æххæст кæнынмæ. Абоны онг УФ-йы дипломатон ведомство кæм уæвынад кæны, уым цахæм куыст цæуы, ахæм куыст кæны Хуссар Ирыстоны уæвæг консулон лæггæдты хайад дæр.
Ацы хайад, сæйраджыдæр, архайы фæсарæйнаг æмбæстагдзинад æвдисæг паспорттæ дæттыныл æмæ сæ рæстæг кæмæн аивгъуыдта, уыдон ивыныл. Бирæ æмбæстæгтæ бацымыдис кæнынц мидæггагон уæрæсейаг æмбæстагдзинад æвдисæг паспорттæй ифтонг кæны ацы хайад æви нæ, уымæ. Нæ - ахæм паспорт Уæрæсейы арæнтæн æдтейæ райсæн нæй, хайады райсæн ис æрмæстдæр Уæрæсейы Федерацийы арæнтæй æдтейæ æмбæстæгты паспорттæ.

Консулон хайад афæдзæй фылдæр архайы æмæ æмбæстæгтæн сæ бон у равзарой фондз азы æмæ дæс азы æмгъуыдтæ кæмæн ис, ахæм паспорттæ. Дæс азы æмгъуыдмæ чи архайы, уыдон сты биометрион паспорттæ. Уым фылдæр сыфтæ ис, конд дзы цæуы æндæр ныв. Ныв ист цæуы бынаты. Уыцы паспорты руаджы бирæ æнцонвадатдæр у арæныл хизынæн, уымæн æмæ дзуапп дæтты нырыккон домæнтæн.
Ацы паспорттæ аразыны рæстæг иугъуызон у - æртæ мæйы æмгъуыд. Практикæ куыд уынын кæны, уымæ гæсгæ фондз азы æмгъуыдмæ чи архайы, уыдон тагъддæр цæттæ кæнынц. Уымæ гæсгæ консулон хайады кусджытæ сидынц æмбæстæгтæм, цæмæй сæ хъус дарой паспорты æмгъуыдмæ, науæд йæ архайды рæстæджы кæрон сæ зæрдыл æрлæууы, арæныл хизыны сæр сæ æнæаргъæвгæ хъуыддаджы фæдыл кæй хъæуы. Хатынц 2-3 бонмæ паспорт саразын, хъыгагæн, хайады тыхы нæй, архайæг регла-мент æмæ паспорттæ аразыны схемæмæ гæсгæ паспорт сцæттæ кæнын. Уымæ гæсгæ информацион фæрæзты руаджы ноджыдæр зæрдыл лæууын кæнынц, цæмæй рæстæгыл бахатой консулон хайадмæ. Иууыл хæрзва-датдæр у, паспортæн йæ рæстæг фæуынæй æртæ мæйы раздæр æмбæлон документтæ бавдисын хайадмæ, цæмæй рæстæгыл иф-тонг уой паспортæй.
УФ-йы консулон хайад æнгом куыст кæны Хуссар Ирыстоны паспортон-визæйон службæимæ. Ацы службæйы развæлгъау куыст цæуы паспорт райсынæн документтæ бацæттæ кæнын.
Консулон хайадæн ма, цæмæй бирæ рæстæг ма хардз кæной кæнæ рады ма лæууой, уый тыххæй интернет сайтыл дæ бон у куырдиат бадæттай. Фондз азы æмгъуыды паспорты фæдыл, интернеты спайдагæнæн ис ахæм сайтæй www.passportzu.ru, дæс азы рæстæгмæ архайæг паспортæн та www.vidpass.ru.
Ацы интернет-сайтыл æмбæстæгтæн йæ бон у бацæттæ кæной куырдиæттæ æмæ йын йæ регистрацион номыр рафысса. Куырдиат бахауы хайады информацион системæмæ. Дыккаг бон йæхи хайадистæй йын йæ курдиат райсдзысты, бæрæггæнæнтимæ. Уый бирæ-бæрцæй рæстæг экономи кæны хайады кус-джытæн дæр. Интернетыл йæ бон кæмæн нæу æрбадæттын куырдиат, уый, фыццаджыдæр хъуамæ бахата Хуссар Ирыстоны паспортон-визæйон службæмæ. Уым ын баххуыс кæндзысты куырдиат бацæттæ кæнынæн.
Зассеты Тамерлан ма куыд банысан кодта, уымæ гæсгæ УФ-йы фæсарæйнаг бæстæйы æмбæстагдзинад æвдисæг паспортты аргъыл дзырд куы цæуа, уæд архайынц, цæмæй йæ аргъ ма уа фылдæр Уæрæсейы мидæггагон паспортты æргътæй. Фондз азы æмгъуыдмæ чи архайы, уый аргъ у 930 сомы æмæ ног, дæс азы рæстæгмæ чи архайы, уый та у 2. 480 сомы.
«Сæ аргъ сын фидын хъæуы Цхинвалы Æфснайæн банчы. Уымæй дарддæр цы хъæуы æмбæстаджы, йæ рæстæг кæмæн фæцис, уыцы паспорт раивынæн? - паспорт æмæ иннæ документты халдихтæ гъæд-джынæй цæттæйæ æмæ 4 нывы. Уый фондз азмæ чи архайы, уый тыххæй, дæс азмæ чи архайы, уымæн нывтæ исæм бынаты, æрмæстдæр æмбæстагон дзаумæтты.
Банысан кæнын хъæуы уый, æмæ ацы паспорттæ кæй сты, уæрæсейаг æмбæстæг-тæй арæнтæн æдтейæ чи сты, уыдоны. Ацы паспорт цы æмбæстагæн ис, уый у Уæрæсейы Федерацийы æххæстбæрцон æмбæстаг, фæлæ цæры арæнтæн æдтейæ. Уымæн ис æппæт ахæм бартæ, кæцытæ ис уæрæсейаг æмбæстагæн», - загъта Тамерлан.
Уымæй дарддæр консулон хайад организаци кæны районтæм балцытæ, уымæн æмæ бирæ æмбæстæгтæн сæ бон нæу бынатмæ цæуын. Сæйраджыдæр, бынаты лæвæрд цæуынц цæттæ паспорттæ. Консулон хайад ма бынаты кæны нотариалон лæггæдтæ дæр.
Хатт вæййы ахæм цаутæ æмæ паспортæн йæ архайды рæстæг раджы аивгъуыдта. Ахæм уавæрты æмбæстаг ивар кæнæ æндæргъуызон æфхæрд не ‘ййафы, фæлæ æмбæлон документтæ хъуамæ æрбавдиса консулон хайадмæ.
Уæрæсейы Федераци Хуссар Ирыстоны Паддзахадон хæдбардзинад банымайынæй фæстæмæ консулон хайад нæ исы æмбæстагдзинад райсыны фæ-дыл документтæ. Уый баст у дыууæ бæстæйы закъондæттынадон базæйы хъаугъаимæ. Цæмæй ацы куыст 2008 азы августы онг куыд уыд, афтæ дарддæр цæуа, уый тыххæй хъæуы «дыууæ æмбæстагдзинады» фæдыл дыууæфарсон сразыдзинад бафыссын. Ууыл куыст цæуы дæргъвæтин рæстæджы.
Зассеты Тамерланы ныхæстæм гæсгæ сæм ацы хъуыддаджы фæдыл бирæ æмбæстæгтæ бахатынц. Уымæ гæсгæ информацион фæрæзты руаджы хъусын кæнынц, ацы куыст кæй адарддæр уыдзæн, «дыууæ æмбæстагдзинады» фæдыл сразыдзинад бафыст куы æрцæуа, æрмæстдæр уæд.
«Æмбæстагдзинады тыххæй» закъоны лæмбынæг фыст ис, æндæр бæстæйы æмбæстаг цы уавæртæ æмæ механизммæ гæсгæ йæ бон у уæрæсейаг æмбæстагдзинад райса, уый.
«Гуырдзыстонимæ нын «дыууæ æмбæстагдзинады» фæдыл сразыдзинад нæй. Кæй зæгъын æй хъæуы, гуырдзиаг æмбæстаг нæм куы æрбахата уæрæсейаг æмбæстагдзинад райсынмæ, уæд хъуамæ йе ‘мбæстагдзинадыл разы мауал уа, цæмæй иу бæстæйы æмбæстаг суа. Ахæм цаутæ нæм нæма уыд.
Хуссарирыстойнаг æмбæстæгты фæдыл дæр, цалынмæ «дыууæ æмбæстагдзинады» тыххæй сразыдзинадыл къухтæ æрфыстæуа, уæдмæ ацы лæггæдтæ кæнын нæ тыхы нæй. Фæлæ уый хыгъд активон куыст кæнæм, 18 азы онг кæуыл цæуы, уыдонæн æмбæстагдзинад дæттыныл. Уыдон, сæйраджыдæр, сты, уæрæсейаг уæлдæр ахуыргæнæндæттæм чи цæуынц, уыдон. Æмбæстагдзинад райсыны хорздзинад уый мидæг ис, æмæ цæрын æмæ цæуын æнцондæр у Уæрæсейы территорийыл. Науæд хуссарирыстойнаг æмбæстæгтæн, æнæвизæйон сразыдзинадмæ гæсгæ æртæ мæйы æмгъуыдæй фылдæр фадат нæй Уæрæсейы территорийыл цæрын.
Уымæ гæсгæ алы ныййарæг дæр развæлгъау хъуамæ ахъуыды кæна йæ сывæллоны хæрзæбонæн. Уымæн æмæ фæсарæйнаг æмбæстагдзинады паспорты размæ æмбæстагдзинад хъуамæ уа æмбæстагæн», - загъта Тамерлан.
Дарддæр уый куыд дзырдта, уымæ гæсгæ цæмæй Хуссар Ирыстоны цæрæг æрыгон ныййарджытæ мады капиталы сертификат къухмæ райсой, уый тыххæй, фыццаджыдæр, сывæллон хъуамæ суа Уæрæсейы æмбæстаг. «Ацы хъуыддаджы фæдыл мах цалдæр мæйы дæргъы кусæм æмæ æххуыс кæнæм канд Хуссар Ирыстоны сылгоймæгтæн нæ, фæлæ ма цы уæрæсейаг сылгоймæгтæ цæры Хуссар Ирыстоны территорийыл, уыдонæн дæр. Æххуыс сын кæнæм, сæрмагондæй, мады капиталы сертификат райсыны фæдыл цы документтæ саразын хъæуы, уый тыххæй. Ацы куыст мах кæнæм официалон æгъдауæй, кæцы регламентаци кæны Уæрæсейы Федерацийы æнæниздзинад хъахъхъæнынады министрад æмæ Уæрæсейы Федерацийы Пенсион фонды уагæвæрдмæ гæсгæ.
Фæнды мæ зæгъын уый, æмæ мады капиталы сертификат райсыны фæстиуæгæн цы æхцайы фæрæзтæ хицæн цæуы, уыдонæн райсæн кæй уыдзæн æрмæстдæр Уæрæсейы Федерацийы территорийыл. Зæгъæм, сертификат æрцæудзæн Хуссар Ирыстоны территоримæ, регистраци кæм дæ, уыцы бы-натмæ, фæлæ уæ кæд æмæ æхцайы фæрæзтæй фæнда спайда кæнын, уæд уый саразæн ис æрмæстдæр УФ-йы территорийыл. Уымæн æмæ ацы фарст хауы, УФ-йы арæнтæй æддейæ цы уæрæсейаг сылгоймæгтæ цæрынц, уы-донмæ. Æнæмæнгхъæуæгыл нымад цæуы, цæмæй ныййарæг мад æмæ йæ иннæ сывæллæттæ уой уæрæсейаг æмбæстæгтæ.
Бынæттон Пенсион фонды хайады кусджытæ, афтæ ма Алагиры районы Пенсион фонды кусджытæ, кæцытæ ныртæккæ сæ куыст кæнынц Хуссар Ирыстоны территорийыл, æмбарынгæнæн æмæ æмбæлон куыст кæнынц ацы фарсты фæдыл. Кæд æмæ ныййарæг мад Уæрæсейы территорийыл фыст у, уæд регистраци кæм у, уыцы районы Пенсион фонды хайадмæ хъуа-мæ радта йæ документтæ, кæд æмæ йæ бон нæу цавæрдæр аххосæгтæм гæсгæ, уæд йæ бон у æмæ æууæнчы гæххæтт сараза цавæрдæр адæймагыл, нотариалон æгъдауæй йæ сфидар кæна ам, бынаты, цæмæй уыцы адæймаг ацæуа йæ бæсты Пенсион фондмæ æмæ йын бадæтта йæ документтæ. Ис ма æртыккаг хуыз дæр - арвитын хъæуы мады капиталы сертификаты фæдыл документтæ посты руаджы. Ацы уавæрæй пайда кæнынц ахæм сылгоймæгтæ, кæцытæ УФ-йы не сты регистраци. Уæд документтæ æрвыст цæуынц сæй-раг Пенсион фондмæ Мæскуымæ, уым ис сæрмагонд хайад, кæцы кусы ацы фарстаты фæдыл. Документтæ арæзт куы æрцæуынц, уæд сын саразæм хуызæгтæ, уыдон вæййынц консулон хайады, цыран сæ хъæуы байдзаг кæнын, иуæй-иу хатт сын нæхæдæг дæр феххуыс кæнæм сæ байдзаг кæныны. Документтæ кæронмæ куы сцæттæ вæййынц, уæд сæ радтæм хицаумæ, уый сæ йæ рады арвиты Уæрæсейы Сæйраг Пенсион фондмæ кæнæ та регистраци кæм у, уыцы Пенсион фонды хайадмæ. Иу мæйы бæрц документты фæахуыр кæнынц æмæ сæ фæдыл куы ницы фарстатæ сæвзæры, уæд сертификат æрвыст æрцæуы посты хайадмæ, мад кæм у регистраци, уыцы адресыл. Иудзырдæй, ацы хъуыддаджы фæдыл цæуы оперативон æмæ нормалон куыст. Стыр æмбарындзинад нын ис Цæгат Ирыстоны Пенсион фонды къухдариуæгадимæ æмæ Мæскуыйы социалон бафыстыты хайадимæ», - дзырдта Тамерлан.
Журналистты ма цымыдис кодта ахæм фарст дæр, зæгъгæ, Уæрæсейы Федерацийы территорийыл Хуссар Ирыстоны сывæллæттæ куы райгуырынц, уæд уыдоны райгуырды бæлвырдгæнæнтыл фæстейæ цæмæн фæ-хъæуы мыхуыр æрæвæрын? Йæ рады Зассеты Тамерлан банысан кодта, зæгъгæ, ацы хъуыддаджы фæдыл Дмитри Медведев йæ президентон куысты рæстæджы радта сæрмагонд указ УФ-йы æмбæстаг бæлвырдгæнæн документ, цыран дзырд цæуы, зæгъгæ, райгуырды бæлвырдгæнæн у уæрæсейаг æмбæс-таджы зонæн документ, кæд æмæ дзы бæрæг у, сывæллоны мад æмæ фыд сты УФ-йы æмбæстæгтæ, уæд. Йæ рады ма уый загъта, зæгъгæ, минæварады консулон хайад ма кæнынц нотариалон куыст дæр, Уæрæсейы æм-бæстæгтæй арæнæй æддейæ чи цæры, уыдонæн. Уыдон æххæст кæнынц, УФ-йы нотариустæ цы функцитæ æххæст кæнынц, уыцы функцитæ. «Æрмæст-дæр нæ бон нæу махæн ахæм æмбæс-тæгтæн баххуыс кæнын, кæцытæн Уæрæсейы территорийыл ис хисæрмагонд исад æмæ æнæзмæлгæ исад, уы-доны фæдыл документтæ радтын. Æн-дæр фарстатæ æмæ куыстытæ æх-хæст кæнæм, уæлдæр ма йæ куыд загъ-тон, афтæмæй Уæрæсейы Федерацийы Нотариалон функцитæм чи хауынц, уы-цы функцитæм гæсгæ. Зæгъæм, дæт-тæм æууæнчы гæххæттытæ, фæлæ дыууæ фарсæрдыгæй легализацийы фæдыл сразыдзинадыл къухтæ фыст кæй нæма æрцыдис, уый фæдыл Хуссар Ирыстоны территорийыл ист æу-уæнчы гæххæттытæ. Уæрæсейы территорийыл нæ кусынц, зæгъæм, нæдæр бангты, пенсион фонды æмæ афтæ дарддæр. Цалынмæ дыууæ фарс сразыдзинадыл къухтæ æрфыссой, уæд-мæ Хуссар Ирыстоны æмбæстæгтæн æнцондæр у махмæ æууæнчы гæххæтт райсын. Уымæ гæсгæ ацы аз æууæнчы гæххæттытæ райсыны нымæц фæфыл-дæр ис. Дæттæм ма æууæнчы гæххæт-тытæ пенси райсыны тыххæй. Мах цы æууæнчы гæххæттытæ дæттæм, уыдон нымад цæуынц Уæрæсейы территорийыл æмæ уымæ гæсгæ æмбæстæгтæ тынг фæцымыдис кæнынц ам, махмæ, æууæнчы гæххæтт райсынмæ», - загъ-та ныхасгæнæг.
Куыд зонæм, афтæмæй ацы аз октябры мæйы Цæгат Ирыстоны Регионты райрæзты Банк йæ лицензи фесæфта, уый фæстиуæгæн фæбанкрот ис. Хуссар Ирыстоны цæрæг уæрæсейаг пенсиисджытæн сæ фылдæр хай уыцы банчы истой пенситæ. Ныртæккæ уыцы хъуыддаджы фæдыл цы куыст кæны консулон хайад, уый фæдыл радзырдта консулон хайады атташе Цадаев Сослан. Уый ныхæстæм гæсгæ Цæгат Ирыстоны территорийыл æртæ банчы кæ-нынц уыцы æхцайы фæрæзтæ радтыны куыст: Сбербанк, Россельхозбанк æмæ Связьбанк. Пенсиисджытæй Хуссар Ирыстоны чи цæры, уыдонæн ис æртæ фадаты пенситæ райсынæн: сæрмагондæй дæхæдæг куы ныццæуай, уæд хъуамæ бацæуай консулон хайадмæ æмæ æууæнчы гæххæтт саразай, æууæнчы гæххæттт æрвыст цæуы банкмæ æнæмæнгхъæуæг уавæрмæ гæсгæ. Æнæмæнгæй пенсиисæг хъуамæ æрбацæуа консулон хайадмæ, кæд æмæ рынчын у æмæ йæ бон нæу цæуын, уæд сæм нæхæдæг цæуæм хæдзæрттæм æмæ бынаты аразæм æу-уæнчы гæххæтт. Афтæ ма Хуссар Ирыстоны цæрæг УФ-йы æмбæстаг пенсиисджытæ хъуамæ бавдисой консулон хайадмæ бæлвырдгæнæн документ, кæнæ регистраци кæм у Хуссар Ирыстоны территорийыл, уыцы документ. Алы бон дæр консулон хайадмæ цæуынц бирæ пенсиисджытæ æмæ уымæ гæсгæ нæ куыст иу ран нæ лæууы. Зæгъæм, пенсиисæг нæм куы æрбацæуы, уæд нын хъуамæ йæ хыгъды номыртæ зæгъа, кæнæ æрбавдиса йæ банчы гæххæтт. Хæсты ветерантæн алы куыст дæр æххæст цæуы æнæаргъæй.
Сывæллæттæн æууæнчы гæххæтт райсыны фæдыл æнæмæнгæй хъæуы развæлгъау фехъусын кæнын. Ахуы-рады министрад æмæ Фæсивæд æмæ спорты комитеты къухдариуæгадæн, цæмæй цы къорд сывæллæтты кæнынц территорийæ æддæмæ, уыдоны номхыгъд нын æрбарвитой. Æнæмæнгæй сæм хъуамæ уа райгуырды бæлвырд-гæнæн документ æмæ семæ цы хистæр кары адæймæгтæ цæуынц, уыдонмæ та хъуамæ уа паспорттæ. Кæннод та хъуа-мæ уой æууæнчы гæххæттытæ, кæимæ æрвыст цæуынц, уыцы адæймаджы бæрæггæнæнтимæ. Уый фæдыл развæлгъау хъæуы цæттæ кæнын ацы документтæ.
Æрдзырдæуыд ма, документы легализаци цæмæн хъæуы, уый фæдыл. «Уый у документы раст æмæ æцæгдзи-над æвдисæг», - загъта Зассеты Тамерлан. Уыцы хъуыддаг хауы дипломтæм кæнæ муниципалитет цы документтæ дæтты, уыдонмæ, афтæ ма хицауадмæ хауæг документтæ æмæ æууæнчы документтæ. Фидаргонд цæуы цалдæр мыхуырæй документтæн иннæ фарс, кæцы бар дæтты Уæрæсейы бæрнон кусæгæн документыл æцæгдзинадыл ды-зæрдыг ма кæныны фадат. Ацы сразыдзинад кæй нæй, уый тыххæй УФ æмæ Хуссар Ирыстоны фæрстæ домынц консулон легализаци документтæн, зæгъæм, кæцыдæр пенсиисæг цæры дард хъæуы, кæй зæгъын æй хъæуы, индивидуалон æгъдауæй махæн нæ бон нæу уымæ бацæуын, уымæн æмæ уæд ам, бынаты, нæ куыст æрлæудзæн, фæлæ йе ‘ууæнчы гæххæтт æнæмæнг-дæр хъæуы. Уый йæхимæ фæхондзæн, цы районы цæры, уыцы районы нотариусы æмæ бынаты аразынц æууæнчы гæххæтт. Цæмæй ацы æууæнчы гæххæтт банымайа Уæрæсейы территорийыл кусæг банк, уый тыххæй йæ хъæуы легализаци скæнын. Æнæмæнгхъæуæг у, цæмæй бацæуа Хуссар Ирыстоны юстицийы министрадмæ, цæмæй йыл уыдон сæ рады æрæвæрой штамп, кæцы дзурæг уыдзæн документы æцæгдзинадыл. Уый фæстæ хъуамæ бацæуа Фæсарæйнаг хъуыддæгты министрадмæ, сæ рады уыдон дæр хъуамæ æрæвæрой штамп, кæцы дзурæг уыдзæн Юстицийы министрады æцæгдзинадыл. Уый фæстæ хъуамæ æрба-цæуа консулон хайадмæ æмæ йæ мыхуырæй бафидар кæндзысты Фæсарæйнаг хъуыддæгты министрады.
2009 азæй фæстæмæ, Хуссар Ирыстоны Уæрæсейы минæварад арæзт куы æрцыд, уæдæй фæстæмæ цытджын æгъдауæй уагъд æрцæуы æмкъайад саразыны церемони. Зассеты Тамерланы ныхæстæм гæсгæ алы аз дæр срегистраци кæнынц 10 къайы бæрц. Сæйраджыдæр, æмкъайад саразынц Федералон æдасдзинады службæйы æфсæддон службæгæнджытæ. Официалон æгъдауæй ацы аз регистраци æрцыдысты 15 къайы.
ТАНДЕЛАТЫ Виленæ,
КЪÆБУЛТЫ Маринæ