Nog adres

22 декабрь - Энергетикы бон/ Рухс æмæ хъарм цард кæнут сымах дæр

307fea41718933c733058ec169738c2d_x1024.jpg
22-æм декабрь нымад цæуы Энергетикы боныл.
Энергетикæ адæймаджы царды цы ахсджиаг бынат ахсы, уый нæ адæмæй хуыздæр ничи æмбары. Æрмæстдæр хицæн ныхæстæй куы сисæм «рухс» æмæ «хъарм», уæддæр зæрдæйæн æхцондзинадхæссæг сты.
Нæ республикæйы фæстаг азты электрохызæджы инфраструктурæйы райрæзты бирæ ивындзинæдтæ æрцыд хорзæрдæм. Дæрддзæф хъæутæм уагъд цæуынц электрохæххытæ. Иуæй-иу дæрддзæф хъæуты 20 азы дæргъы нæ уыд электроны рухс. Уыдонмæ электроны хæххытæ ивæзт нæ цæуынц ног, нырыккон домæнтæн ног цæ-джындзтыл. Ацы куыстытæ æххæст кæнынц паддзахадон унитарон уагдон «Энергоресурс - Южная Осетия»-йы кусджытæ. Ам куыд зæгъынц, афтæмæй сын сæ разы ахæм хæс сæвæрдта Президент Тыбылты Леонид. Уый йæ сæйраг хæстæй сæ иуыл нымайы, цæмæй алы хæххон хъæумæ дæр уа фæндаг, ифтонг уа электроэнергийæ. «Энергоресурс - Южная Осетия»-йы генералон директоры хæдивæг Гæбæраты Анатоли куыд зæгъы, афтæмæй ацы аз сæ къухы бирæ æнтыстытæ бафтыдис.
- Æрмæст Дзауы районы электрификацигонд æрцыдысты 9 хъæуы. Цхинвалы районы дæр бирæ хъæутæм уагъд æрцыд электроэнерги. Зæгъæм, Уæллаг Ортъеуы хъæуы цы цалдæр цæрæг хæдзары ис, уыдон электроэнергимæ æнхъæлмæ кастысты суанг 1990 азтæй фæстæмæ. Уымæй дарддæр ма ацы аз сæ хæдзæртты рухс ссыгъд Бихъар, Вилда, Чъалисубан, Æрчъынареты хъæуты цæр-джытæн. Иууыл иумæ ацы хъæутæм кæй сарæзтой, уы-цы хæххыты дæргъ у 16 километры.

Къаддæр куыстытæ нæ цæуы горæтæн йæхи мидæг дæр. Зæххы бын цы кабелтæ цæуынц, уыдон ивд нæ уы-дысты цыппор азæй фылдæр. Арæзт цы уынгтæ цæуынц, уыдоны ивд æрцыдысты электрохæххытæ дæр, цæмæй асфальт ногæй къахын мауал хъæуа. Уымæй дарддæр куыстæуыд æхсæвыгон уынгты рухс кæныныл дæр.
Гæбæраты Анатоли куыд зæгъы, афтæмæй ма Знауыры районы дæр иуæй-иу хъæуты æрцыд капиталон куыстытæ. Куатетрийы хъæуы ивд æрцыдысты электрохаххы цæджындзтæ. Уелиты хъæуы райдыдтой кæнын ахæм куыстытæ, фæлæ уыдон аххæсдзысты иннæ азмæ. Ахæм бакæнинаг куыстытæ республикæйы иннæ районты дæр нырма бирæ ис, фæлæ уыдоныл кусдзысты 2014 азы.
Къуайса æмæ Ленингоры районты дæр нырма бирæ бакæнинаг куыстытæ ис. Фæлæ уыдон дæр рохуаты нæ баззайдзысты. «Энергоресурс - Южная Осетия»-йы генералон директоры хæдивæг куыд зæгъы, афтæмæй æппæт ра-нымайгæ куыстытæ æххæст æрцыдысты уагдоны фæрæзтæй. Ацы куыстуат йæ куыстытæ сæрмагондæй кæны, адæм цы фиддонтæ фидынц, уыдонæй. Фæлæ иуæй-иу хатт рауайы афтæ дæр, æмæ адæм рæстæгыл кæй нæ фидынц сæ фиддонтæ, уый тыххæй «Энергоресурс - Южная Осетия»-йы бирæ хæстæ баззайы, электроэнерги кæмæй æлхæны, уыцы РАО ЭС-ы раз. Уæдæ электроэнергийæ куы пайда кæнай, уæд ын йæ аргъ дæр фидын хъæуы. Кæд «Энергоресурс - Южная Осетия»-йы кусджытæ рæстæгæй-рæстæгмæ рейдтæ фæуадзынц, уæддæр нырма уыцы хъуыддагæн уадиссаг фæстиуæг нæй. Иууыл мæгуыраудæр электроэнергийы фиддонтæ фидыны хъуыддаг у Къуайсайы, Дзауы районы иумиагæй сисгæйæ. Къуайсайы цæрджытæй электроэнерги фидынц æрмæстдæр сæ 7 проценты. Дзауы районы та - 14 проценты. Рап-пæлинаг у Ленингоры район. Уым адæм бахардзгонд электроэнергийы тыххæй фидынц, куыд æмбæлы, афтæ. Горæты цæрæн корпусты цы иумиаг электронымайæнтæ ис, уыдон æрвылмæй дæр бæрæг цæуынц æмæ уымæ гæсгæ рабæрæг вæййы, давд цæуы æви нæ электроэнерги.
Мах дæр арфæ кæнæм нæ республикæйы унитарон куыстуат «Энергоресурс - Южная Осетия»-йы кусджытæн сæ профессионалон бæрæгбоны цытæн. Сæ куысты сын кæддæриддæр уæт æнтыстытæ.
УАЗÆГТЫ Марфа