Nog adres

Шахмæттæ æмæ шашкæтæн - сæхи федераци

chahmati.jpg
Спорты хуызтæ бирæ сты æмæ уыдонæй суинаг спортсмен равзары, йæ зæрдæмæ тынгдæр кæцы хуыз фæцæуы, æмхицдæр кæцымæ у, стæй йæ курдиат фылдæр кæм райхæлдзæн, уымæ. Иутæ сæ свæййынц зынгæ спортсментæ, сæ кой айхъуысы æнæхъæн дунейыл, кад æмæ ном скæнынц канд сæхицæн нæ, фæлæ ма сæ радтæг адæм æмæ уарзон фыдыбæстæйæн дæр. Иннæтæ дæр ыл зæры бонмæ не сивынц сæ зæрдæ, фæисынц дзы уды æхцондзинад. Уый нæ, фæлæ ма уыцы архайдæй æндæрты дæр разæнгард кæнынц спорты архайынмæ.
Цæмæй спортсменæн зæрдæйы фæндиаг фæстиуджытæ йæ къухы æфта, дзыллæты фылдæр хай спортмæ разæнгардæй тырной, хайад исой алыгъуызон ерыстæ æмæ турнирты, уый тыххæй хъæуы ахадæн куыст се 'хсæн. Ронбæгъдæй хъуыддаг размæ нæ цæуы, фæлæ йын фæхъæуы уæрæх фадæттæ йæ райтынг æмæ рæзын кæнынæн.

Зæгъын хъæуы уый, æмæ спорты бирæ хуызтæн нæ республикæйы сырæзт федерацитæ, уый фæрцы сæ куыст кæнынц бакуыстгонд нывæзтмæ гæсгæ. Хъыгагæн, шахмæттæ æмæ шашкæты хуызтæн нæ республикæйы нырма нæ уыд федераци, æнæуый та æнæмæнгхъæуæг у, цæмæй спорты ацы хуызтæ дæр махмæ популярондæр кæной. Раст у, ис нæм, хъазын сæ чи уарзы, хорз фæстиуджытæ чи равдисдзæн бæрнон ерысты дæр, ахæм спортсментæ, фæлæ сын уый тыххæй нæй æмбæлон уавæртæ æмæ фадæттæ.
Цухдзинад бахынцыдта хицæн æмбæстæгты къорд æмæ аскъуыддзаг кодтой, цæмæй арæзт æрцæуа федераци. Ивгъуыд аз ноябры мæйы райстой «РХИ-йы Шахмæттæ-шашкæты федераци»-йы æхсæнадон организацийы устав. Æрæджы та ауагътой бындурæвæрæн æмбырд. Хайад дзы райстой спорты ацы хуыз-тæн табугæнджытæ, загътой сæ фæндæттæ æмæ фиппаинæгтæ сæ спопуляризаци кæныны тыххæй. Æмбырдмæ хуынд æрцыдысты Ленингор, Дзау, Знауыр, Цхинвалы район æмæ горæты минæвæрттæ. Федерацийы скондмæ бацыдысты 9 адæймаджы, уыдонæй 4 адæймаджы - районтæй, иу - Къуайсайæ æмæ иннæтæ та сты горæтæй.
Шахмæттæ æмæ шашкæты федерацийы хистæрæй æвзæрст æрцыд Лолоты Барис, йæ хæдивæгæй та Тедеты Витали. Æвзæрст ма æрцыд ревизион къамис, сæрдарæй йын равзæрстой Тедеты Никъалайы. Федерацийы хистæр куыд банысан кодта, афтæ-мæй сæ дарддæры фæндтæ бирæ сты. Ацы бонты федераци хъуамæ фидар æрцæуа юридикон æгъдауæй.
ХУЫБИАТЫ Н.