Nog adres

Рарасткæнинаг цухдзинæдтæ

2008-æм азы Гуырдзыстоны агрессийы фæстæ Цхинвалы фыццаг цалцæг цы административон бæстыхæйттæ æрцыдысты, уыдонæй иу уыд Анахарсисы номыл республикон библиотекæ. Æмæ уый, мыййаг, æнæнхъæлæджы нæ уыд. Библиотекæ у, зонындзинæдтæ парахатæй райсæн кæм ис, уыцы бынæттæй сæ иу.
Абон библиотекæйы уынд æмæ сыгъдæгдзинад кæд у нывыл, зæрдæ дзы рухс кæны, уæддæр йæ куысты хæсты, гуырдзыйы æрбабырсты рæстæджы цы цухдзинæдтæ сæвзæрд, уыдонæй бирæтæ нырма иуварс не 'рцыдысты. Нæ зæгъдзынæн æмæ дзы ницы куыст цæуы, фæлæ дзы ис бирæ цухдзинæдтæ. Абон библиотекæмæ фылдæр адæм кæдæм цæуы, уыдонæй иу у кæсæн зал. Ам хæсты рæстæджы ныппырх æмæ ныпаплой би-рæ, куыд æндæр бæстæты, афтæ бынæттон газеттæ æмæ журналтæ. Уыдон самал кæнын æмæ сæ фæткмæ æркæнын нæу хуымæтæджы хъуыддаг, фæлæ абон библиотекæ цы газеттæ æмæ журналтæ исы, уыдон хъæбæр цъæртты кæй нал хуыйынц, уый нæу раст. 2005 азмæ сæ æрвыстой Цхинвалы Полиграфион-кондадон баиугæндмæ. Уым газеттыл кодтой хъæбæр цъæртты чиныгарæзт æмæ сæ фæстæмæ æвæрын-мæ æрвыстой библиотекæмæ.

Цæмæннæуал сæ аразут, раздæр сæ куыд арæзтат, афтæ, куы афарстон кæсæн залы гæс Тыбылты Азæйы, уæд йæ дзуапп уыд, зæгъгæ, нын уыцы куыстытæ бакæнынæн нал ис æхцайы фæрæзтæ. Ахæм уыд библиотекæйы директоры хæдивæг Тедеты Маринæйы дзуапп дæр.
- Цæмæн рыхгæдтой ацы куыстытæ бакæныны тыххæй æхцайы фæрæзтæ? - Ныр та ахæм фарстимæ балæууыдтæн Хуссар Ирыстоны культурæйы министрады хынцæг Джиджджойты Жаннæйы раз. Уый та мын загъта, зæгъгæ, бакæнгæ куыстыты тыххæй фæстаг азты библиотекæйы разамындæй æхцайы фæрæзтæ райсыны сæраппонд махмæ домæн не 'рбацыд.
Фæстæдæр ацы фарстайы тыххæй мæ ныхас адарддæр кодтон Цхинвалы Полиграфион-кондадон баиугæнды директор Икъаты Мадинæимæ. Куыд фæбæрæг, афтæмæй цæмæй газет «Хурзæрин»-ы афæдзы фыццаг æмæ дыккаг æмбисты газеттæ хицæнтæй хъæбæр цъæртты бакæнай, уый тыххæй хъæуы æрмæстдæр 800 сомы. 800 сомы тыххæй ахæм, ахсджиаг куыст ма сæххæст кæнай, уый худинаг у æмæ уавæр домы рæстæгыл рараст кæнын.
Бафæндыд мæ библиотекæйы ныккæнды газеттæ æмæ журналты бæстытæ æфснайд кæм цæуынц, уый фенын дæр. Йæ ныххизæны уындæй рухс кæны адæймаджы зæрдæ, фæлæ бахизæны ис, уым бынат кæмæн нæй, ахæм зæронд, пайда кæмæй нал скæндзысты, ахæм хъæдын дзаумæттæ. Дуар бакодтам, ссыгътам рухс, бахызтыстæм даргъ къæлидормæ æмæ нæм алырдыгæй зынынц æнæфснайд къуымтæ. Цалдæр хатæны гом дуæрттæй та нæм зынынц чингуыты æмæ газетты бæстытæ. Чингуытæ калд сты кæрæдзийыл, сты хæццæмæццæ. Рæстмæ зынгæ дæр нал кæнынц, фесты рыджы бын. Газеттæ дæр калд сты полæй цармæ. Сæ фыстытæ нал зынынц æмæ нæу бæрæг, чи дзы цы газет у, уый. Æниу, кæд уæллаг рæгътæй райсай, уый йеддæмæ, бынæй чи фесты, уыдоны адæймаг змæлын дæр нæ фæкæндзæнис.
Газеттæ æмæ чингуытæ æфснайыны нормæтæй ам мур дæр æххæст ницы цæуы. Уыимæ ма ам тæссаг у зынгсирвæзтæй, рухсыты арæзт нывыл кæй нæу, техникон нормæтæ хæлд кæй цæуынц, уый аххосæй. Тæссаг у, фæлæ дзы нæй зынгсирвæзты ныхмæ тохы хъæуæг фæрæзтæ дæр.
ГÆЗЗАТЫ Иван