Nog adres

Дон уадзынц Дменисмæ

Æрæджы Президент Тыбылты Леонид кусæгон балцы уыд нæ республикæйы иууыл стырдæр хъæутæй сæ иу - Цхинвалы районы Дменисы хъæуы. Уый бынаты федта æмæ байхъуыста, Дменисы хъæуы цæрджытæ цæуыл тыхсынц æмæ сæ æрвылбонон царды цы проблемæтыл æмбæлынц, уымæ.
Кæддæр нæргæ хъæуыл нымад уыд Дменис. Дих кæны Уæллаг, Дæллаг æмæ Ачъарайы сыхтыл. Йæ адæм исджын, фæрæзджын уыдысты. Сæ сæйраг куыст уыд дыргъмæ зилын. Куыстой, фæллой кодтой æмæ афтæмæй цардысты. Фæлæ уыцы амондджын цард дменисæгтæн фескъуыдтой гуырдзиаг фашисттæ. Иу æмæ дыууæ хатт, Дменисы алыварс цы гуырдзиаг хъæутæ ис - Ксуис, Дисеу, Мерет, Къосчийы хъæуккаг гуырдзиæгтæ, æддейæ æрбацæуджытимæ иумæ сæ тыхтæ не 'взæрстой дменисæгтыл. Уыдонмæ ма - иу ноджыдæр бафтыдысты Еред æмæ Уанаты гуырдзиæгтæ дæр. Фæлæ, уæддæр, нæдæр 1992 азы, 2004 азы æмæ нæдæр 2008 азы нæ фæсастысты йæ адæм. Кæд-иу мæдтæ рæстæгмæ сæ чысыл сабиты бааууон кодтой знагæй, уæддæр-иу Дменисы фæсивæд се знæгты ныхмæ æнæмсæр хæстон цауты лæууыдысты кæронмæ. Къордтæ-къордтæй-иу алкæцы æрбацæуæнты лæууыдысты кæрæдзийы ныфсæй. Дменисы хъæуæй дзæвгар адæм фæмард, 24 азы дæргъы цы гуырдзиаг-ирон конфликт цыд, уым. Ис дзы æбæрæг сæфтытæ дæр. Хъæуы сæ номыл арæзт æрцыд чысыл мемориалон фæйнæг æмæ сын сæ рухс ном мысыны охыл ам æрвылаз дæр ауадзынц мысæн бонтæ.

Хæсты фæстæ цадæггай фæстæмæ æндидзын райдыдта Дменисы хъæу. Бирæ пробле-мæтæ сын ис, фæлæ уал дзы иу, сæйрагдæр, цы астæуккаг скъола сæм уыд, хъæуы сæрмæ, уый цалцæг æрцыд æмæ дзы абон ахуыр цæуы æмбæлон уавæрты. Хъæу тынг тыхсы, сывæллæтты рæвдауæндон сын кæй нæй, уымæй дæр. Сæ бæллиц у, цæмæй хъæуы астæу паркæн цы бынат хицæн æрцыд, уым, хъæуæй Стыр Фыдыбæстæйон хæсты чи фæмард æмæ гуырдзыйы хæсты амæттаг чи баисты, уыдон номыл номарæн цыртытæ сæвæрой.
Æппæт ацы хъуыдытæ æмæ фæндтæ фехъусын кодтой Президентæн, куы сæм фæуазæг, уæд. О, фæлæ Уæллаг Дменисы цæрджытæ иууыл тынгдæр донхъуагæй кæй тыхсынц, ууыл катай кодтой Президенты раз. Цæрджытæ куыд дзырдтой, афтæмæй ацы проблемæ иу æмæ дыууæ хатт нæ фехъусын кодтой Цхинвалы районы администрацийæн, стæй уæлдæрлæууæг органтæн дæр. Æрвылхатт-иу сæ дзуапп уыд, кæй сахуыр кæндзысты проблемæ. Дменисæг-тæ тынг ныфс æвæрдтой Президент Тыбылты Леонидæй. Уымæн æмæ уый йæ куыст райдыдта дæрддзæф хъæутæм дон уадзын æмæ фæндæгтæ аразынæй. Президент сын ныфс бавæрдта баххуыс кæнынæй æмæ, æцæгдæр, дыууæ къуырийы размæ æрæвнæлдæуыд Уæллаг Дменисмæ донуадзæн куыстытæм.
Цхинвалы районы, цæрæнуатон-эксплуатацион управленийы хистæр Хъотайты Барис нын загъта:
- Дменисæгты проблемæимæ зонгæ уыдыс-тæм. Иннæ хъæуты æмрæнхъ хъавыдыстæм уырдæм дæр йæ рады дон бауадзын. Фæлæ иуæй, районы администрацийы бюджеты уый-бæрц финансон фæрæзтæ нæ уыд, аннæмæй та, районы цы бæрцыл техникæ ис, уыдон уый бæрц не 'ххæссынц. Ныр Президенты амындмæ гæсгæ, сæрмагонд финанстæ хыгъд æрцыд нæ районы бюджетмæ, цæмæй Уæллаг Дменисы хъæумæ уагъд æрцæуа дон. Ацы куыстытæ ныртæккæ сты сæ тæмæны. Куыстытæ цы арæзтадон фирмæ кæны, уый хистæр у ацы хъæуы цæрæг Бибылты Анатоли, кусджытæ дæр сæйраджыдæр хъæуы цæрджытæ сæхæдæг сты. Иуæй - фæлтæрдджын фирмæ у, аннæмæй та - сæхимæ, хъæумæ уагъд кæй цæуы дон, уымæ гæсгæ уæлдай зæрдæбын куыст кæнынц. Лæмбынæг сæ хъус дарынц алцæмæ дæр, тырнынц, цæмæй бæстон бакæной куыстытæ. Куыстытæн сæ фылдæр хай фæудгонд у, кæд нæ боныгъæд нæ бахъыгдара, уæд ног азмæ Уæллаг Дменисы цæрджытæн уыдзæнис дон, - загъта Цхинвалы районы администрацийы цæрæнуатон-эксплуатацион управленийы хистæр Хъотайты Барис.
УАЗÆГТЫ Марфа