Nog adres

Кусынц горæты сыгъдæгдзинадыл

PB070071_2.JPG
Цæмæй нæ горæт сыгъдæг уа, уый тыххæй æрмæст хæрзарæзтады кусджыты архайд фаг нæу, хъуамæ алы адæймаг дæр бæрндзинад хæсса. Хатт иуæй-иу хæдзæртты раз цардуагон брон къорд азты дæр фæлæууы, æмæ йæ аласынмæ горæты администрацимæ фенхъæлмæ кæсынц. Иумиагæй сисгæйæ, нæ алфæмблайы сыгъдæгдзинад æмæ хæрзарæзтад та комкоммæ нæ зæрдæйы равгыл дæр кæй æндавы, æвæццæгæн, уый алчи нæ хаты. Нæй афтæ зæгъæн, нæ уынгты цы арæзтадон æрмæджыты, алыгъуызон брæттыл схæцы нæ цæст, уыдон 2008 азы хæсты фæстиуджытæ сты. Уыдонæй бирæтæ сты, суанг ма 1989-92 азты хъæутæм ацæуæнтæ куынæуал уыд, горæт блокадæйы куы уыд, æмæ адæм сæргой куы уыдысты, уыцы рæстæджытæй дæр дзы ис.
Фæлæ ныр цард бирæбæрцæй фæивта. Хъуамæ мах иумæйаг тыхтæй æрæвналæм, уæд фæстиуæг уыдзæнис æмæ нæ горæт дæр раздæрау дидин æфтаудзæнис. Афтæ куы уа, уæд та, дызæрдыггаг нæу, республикæйы цард дæр размæ кæй цæудзæнис.
Цалдæр мæйы размæ горæты администрацийы сæргълæууæгæй нысан æрцыд æвзонг, фæлæ компетентон адæймаг Æлборты Алан. Уый йæ куыст райдыдта горæты районты цæрджытимæ фембæлдтытæй. Сæ проблемæтæ æмæ сын сæ фæндиæгтæм хъусгæйæ, арæзта йæхицæн хатдзæгтæ. Цæрджыты горæты сыгъдæгдзинады фарстатæ кæй æндавынц, уый хынцгæйæ, йæ куыст райдыдта иумæйаг зиутæ ауадзынæй.

Фæстаг рæстæджы самал кодта æхцайы фæрæзтæ дæр æмæ бавнæлдта, Гафезы, Нæузæххонты æмæ БАМ-ы районты бирæуæладзыгон хæдзæртты рæзты цы мæнгагъуыстытæ æмæ горæты иумæйаг хуыз чи фыдуынд кодтой, уыдон пырх кæнынмæ. Ацы куыстытæм сентябры мæйы бавнæлдтой, фæлæ йæм цæрджытæ бахатыдысты, цæмæй æххæст сæ фæззыгон тыллæг бафснайой æмæ горæты администраци дæр сæ уавæры бацыд. Ныртæккæ сымах къамы уынут, БАМ-ы районы горæты цардуагон лæггæдты хайады кусджытæ цы сыгъдæггæнæн куыстытæ кæнынц, уыдон.
Æлборты Алан куыд загъта, афтæмæй адæм сæхæдæг дæр хъуамæ серьезон ахаст равдисой нæ горæты сыгъдæгдзинадмæ. Горæт у, цы адæм дзы цæры, уыдоны æмæ йыл чъизийæ мачи хъуамæ худа. Уымæ гæсгæ нæ горæты алы цæрæг дæр хъуамæ бæрндзинад хæсса. Стæй горæты уынгты æрмæст ныссыгъдæг кæнын фаг нæу. Хъуамæ йæ сфæлындзæм цъæхдарæнтæй дæр. Иумиагæй куы æрæвналæм ацы хъуыддагмæ, уæд нын уыдзæнис, фæстиуджытæ дæр, - зæгъы горæты администрацийы хистæр.
УАЗÆГТЫ Марфа