Nog adres

Арфæ - развæдсгарджытæн

5 ноябры куыд Уæрæсейы Федерацийы, афтæ Хуссар Ирыстоны дæр банысан кодтой æфсæддон равæдсгарæджы бон.
Сæ профессионалон бæрæгбоны цытæн Хуссар Ирыстоны Хъахъхъæнынады министрады цур Хицæн развæдсгарæн батальоны хæстонтæн раарфæ кодта Хъахъхъæнынады министр Валери Яхновец. Хъахъхъæнынады министрады пресс-службæйы хистæр Гуыцмæзты Галинæ куыд фехъусын кодта, афтæмæй æфсæддон развæдсгарджытæй чи фесгуыхт, уыдон хорзæхджын æрцыдысты «За боевое содружество» æмæ «За боевые заслуги»-йы майдантæй.

«Йæ арфæйы ныхасы Хъахъхъæнынады министр банысан кодта, зæгъгæ, Хицæн развæдсгарæн батальон кæддæриддæр уыд Хуссар Ирыстоны Гарзджын Тыхты иууыл цæттæдæр æмæ ифтонгдæр дæлхай, йæ хæстонты архайд æмæ развæдсгæрсты бæрæггæнæнтæ цас раст уыдысты, ууыл баст уыд тохы фæстиуæг», - загъта Гуыцмæзты Галинæ.
Бæрæг куыд у, афтæмæй Хуссар Ирыстоны Хицæн развæдсгарæн батальон арæзт æрцыд Республикæ Хуссар Ирыстоны Гарзджын тыхты фыццаг Сæйраг командæгæнæг Джиоты Аланы (Парпат) инициативæмæ гæсгæ. Йæхи сæрмагонд къухдариуæгадæй арæзт æрцыд гуырдзиаг-ирон конфликты зонæйы сабырад бахъахъхъæныны фæдыл Æмхæццæ тыхты ирон батальоны развæдсгарæн ротæ. Йе сконды уыдысты иууыл цæттæдæр хæстонтæ, кæцытæм уыд хæстон фæлтæрддзинад, сæхи равдыстой хъæбатыр хæстонтæй æмæ уыдысты сæ Фыдыбæстæйы æцæг патриоттæ.
1995 азы октябры уæды Хъахъхъæнынады министр Хуыбылты Валерийы уынаффæмæ гæсгæ, развæдсгарæн ротæ раконд æрцыд фидауынгæнæг батальоны скондæй æмæ баиугонд æрцыд Хуссар Ирыстоны Хъахъхъæнынады министрады структурæмæ.
2003 азы июлы уынаффæ райстæуыд Хъахъхъæнынады министрады цур Хицæн развæдсгарæн батальон саразыны тыххæй, кæцымæ рацарæзт æрцыд развæдсгарæн ротæ. Хицæн развæдсгарæн батальоны фыццаг командирæй нысан æрцыд майор Гассеты Ибрагим.
Хицæн развæдсгарæн батальоны сконды службæ кодтой Хуссар Ирыстоны Хъæбатыртæ Багаты Амиран æмæ Джиоты Азæмæт, кæцытæ фæмард сты 2008 азы августы горæт Цхинвал хъахъхъæнгæйæ.